ރައީސްގެ ތ. އަތޮޅު ދަތުރުފުޅު: އޮމަދޫގައި މަތީ ސާނަވީ ތަޢުލީމު ހާސިލްކުރެވޭނެ މަގެއް ފަހިކޮށްދެއްވުމަށް އެރަށުގެ ޑަބްލިއުޑީސީން ރައީސަށް ދަންނަވައިފި

ތ. އޮމަދޫގައި މަތީ ސާނަވީ ތައުލީމު ހާސިލުކުރެވޭނެ މަގެއް ފަހިކޮށްދިނުމަށް އޮމަދޫ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރުން ރައީސުލްޖުމްހޫރިއްޔާގެ އިބްރާހީމް މުޙައްމަދު ޞާލިޙުގެ އަރިހުގައި ދަންނަވައިފިއެވެ.

އޮމަދޫ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރުންނާއި ކައުންސިލް މެންބަރުންނާއެކު ބޭއްވި ބައްދަލުުވުމުގައި އެ ކޮމިޓީގެ މެންބަރުން ވަނީ ކޮމިޓީގެ މަސައްކަތްތައް ކުރިޔަށްދާ ގޮތްތަކާއި ރަށުގެ ތަރައްގީއަށާއި އަންހެނުން ބާރުވެރިކުރުމަށް ބޭނުންވާ ކަންކަމާ ގުޅޭ މަޢުލޫމާތު ރައީސުލްޖުމްހޫރިއްޔާއާ ހިއްސާކުރައްވާފައެވެ. މިގޮތުން ދާއިމީ ގޮތެއްގައި އަންހެނުންނަށް އާމްދަނީ ލިބޭނެ ގޮތަށް އަންހެނުން ބާރުވެރިކުރުމަށް އިތުރު ފުރުސަތުތައް ހޯއްދަވައިދެއްވުމަށް ރައީސުލްޖުމްހޫރިއްޔާގެ އަރިހުގައި ދެންނެވިއެވެ. އަދި، އޮމަދޫގައި މަތީ ސާނަވީ ތަޢުލީމު ހާސިލުކުރެވޭނެ މަގެއް ފަހިކޮށްދިނުމަށް ވެސް އެބޭފުޅުން ވަނީ ރައީސުލްޖުމްހޫރިއްޔާގެ އަރިހުގައި ދަންނަވާފައެވެ.

މި ބައްދަލުކުރެއްވުމުގައި، އޮމަދޫގައި ހުޅުވިގެންދިޔަ ބަދަރާއެކު ތަރައްގީގެ ކަންކަން ފުޅާކުރުމަށް ފުރުސަތު ފަހިވެއްޖެކަމަށާއި ރައްޔިތުންގެ އުންމީދުތައް އާވެއްޖެކަމުގައި އެ ރަށު ކައުންސިލުން ބުނެފައިވެއެވެ.

‎އޮމަދޫ ކައުންސިލުން ވަނީ އެރަށުގެ ރައްޔިތުންނަށް އެންމެ މުހިންމު ކަންކަމާ ގުޅޭގޮތުން މަޝްވަރާކުރައްވައި، އެ ރަށުގެ ރައްޔިތުންގެ ކަންބޮޑުވުންތައް ރައީސާ ހިއްސާކުރައްވާފައެވެ. ކައުންސިލުން ފާހަގަކުރެއްވި ކަންތައްތަކުގެ ތެރޭގައި ސްކޫލް އާބާތުރަ ފިލުވުމާއި، ބޭނުންވާ ބައެއް ވަސީލަތްތައް މަދުކަން ވަނީ ފާހަގަކުރައްވާފައެެވެ. މީގެ އިތުރުން ވެސް ކައުންސިލުން ވަނީ މަސްވެރިކަމާގުޅޭ މަސައްކަތްކުރުމަށާއި، ދަނޑުވެރިކަމަށް ދޫކުރާ ބިން ދޫކުރުމުގައި ހުރި ކަންބޮޑުވުންތަކާއި، ކުޅިވަރު އިންފްރާސްޓްރަކްޗަރ އަދި އިޖްތިމާޢީ ހަރަކާތްތައް ހިންގުމަށް ޒުވާނުންގެ މަރުކަޒެއްގެ މުހިންމުކަން ފާހަގަކުރައްވާފައެވެ. އަދި ކައުންސިލްގެ އިޚްތިޞާޞްގައި ހިމެނޭ ރަށަކާ ގުޅޭގޮތުން ވަނީ މަޝްވަރާކުރައްވާފައެވެ. ކައުންސިލުން ފާހަގަކުރެއްވި އިތުރު ކަންތައްތަކުގެ ތެރޭގައި، އެ ރަށު ޞިއްޙީ މަރުކަޒަށް ބޭނުންވާ ވަސީލަތްތަކާއި، ކަންކަން ކުރުމުގައި ދިމާވާ މާލީ ގޮންޖެހުންތައް ހިމެނެއެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ކައުންސިލުން ފާހަގަކުރެއްވި ކަންކަމުގައި ކަމާގުޅޭ ފަރާތްތަކާއި އެކު މަޝްވަރާކުރައްވައިގެން މައްސަލަތަކަށް ހައްލު ހޯދައިދެއްވުމަށް މަސައްކަތްކުރައްވާނެކަމަށް ވިދާޅުވެފައެވެ.

‎މި ބައްދަލުކުރެއްވުމުގެ ކުރިން ރައީސުލްޖުމްހޫރިއްްޔާ ވަނީ އޮމަދޫ ބަނދަރު ރަސްމީގޮތުން ހުޅުއްވައިދެއްވާފައެވެ. މި ބަނދަރަކީ 32،217،980.99 ރުފިޔާގެ އަގުހުރި މަޝްރޫޢެކެވެ.

‎ރައީސުލްޖުމްހޫރިއްޔާ އޮމަދޫޫއަށް ކުރައްވަމުން މިގެންދަވާ ދަތުރުފުޅަކީ ތ. އަތޮޅުގެ 7 ރަށަކަށް ކުރައްވާ ދަތުރުފުޅުގެ ތިންވަނަ މަންޒިލެވެ. ރައީސުލްޖުމްހޫރިއްޔާގެ އަރިހުގައި ބައެއް ވުޒާރާތަކުގެ ވަޒީރުންނާއި، ރައީސުލްޖުމްހޫރިއްޔާގެ އޮފީހާއި، ދައުލަތުގެ ބައެއް އިދާރާތަކުގެ އިސްވެރިންގެ ވަފުދެއް ބައިވެރިވެވަޑައިގަންނަވައެވެ.