ކޮވިޑާ ގުޅިގެން ހަދާފައިވާ އުސޫލުތަކަށް އަމަލުކުރުމަށް ޓުއަރ އޮޕަރޭޓަރުންނަށް ރައީސް ގޮވާލައްވައިފި

ގިނަ ފަތުރުވެރިން ރާއްޖެ އައުމަކީ އިޤްތިޞާދު ރަނގަޅުވާނެ ކަމެއް ކަމަށާއި، ނަމަވެސް ފަތުރުވެރިން ގެނައުމުގައި ވެސް ސަރުކާރުން ކަނޑައަޅާފައިވާ އުސޫލުތަކާ އެއްގޮތަށް އަމަލުކުރުމަށް, ރައީސް އިބްރާހީމް މުޙައްމަދު ޞާލިޙު ޓުއަރ އޮޕަރޭޓަރުންނަށް ގޮވާލައްވައިފިއެވެ.

އޮމަދޫ ބަނދަރު ހުޅުވުމުގެ ރަސްމިއްޔާތު ޝަރަފްވެރިކޮށްދެއްވައި ވާހަކަ ދައްކަވަމުން ރައީސް ވަނީ, ދާދި ފަހުން އިންޑިއާއިން ގިނަ އަދަދެއްގެ ފަތުރުވެރިން މަގުމަތިވި މައްސަަލައަށް އަލިއަޅުއްވާލައްވައި ވާހަކަ ދައްކަވަލާފައެވެ. ރައީސް ވިދާޅުވީ ރާއްޖޭގައި ކޮވިޑްގެ ހާލަތު ރަނގަޅުވެ އިޤްތިޞާދު އަލުން އާރާސްތުވަމުން އަންނަ އިރު، ގިނަ ފަތުރުވެރިން އައުމަކީ ފައިދާ ބޮޑު ކަމެއްކަމަށެވެ. ނަމަވެސް އޮންނަ އުސޫލާ ޚިލާފަށް ފަތުރުވެރިން ގެންނަކަން ރައީސް ފާހަގަ ކުރެއްވިއެވެ.

ރައީސް ވިދާޅުވީ އަވަށްޓެރި ގައުމުތަކުގެ ރައްޔިތުން އެހެން ގައުމުތަކަށް ދިއުމުގެ ކުރިން ޓްރާންސިޓް ކުރާ ގައުމެއްގެ ގޮތުގައި އެހެން ގައުމުތަކުގެ މީހުން ރާއްޖެ ބޭނުންކުރަމުންދާ ކަަމަށެވެ. އެކަން އެހެން ކުރަނީ ގެސްޓް ހައުސްތަކުގައި އެމީހުން ކަރަންޓީނު ވުމަށްފަހު އެހެން ގައުމުތަކަށް ދާން ފަސޭހަވުމުން ކަމަށާއި، ގެސްޓް ހައުސްތަކަށް އެކަން ކޮށްގެން ބޮޑު އާމްދަނީއެއް ލިބޭކަމަށެވެ. ނަމަވެސް އާމްދަނީ ހޯދަން ވާނީ އެކުލަވާލައިފައިވާ އުސޫލުތަކާ އެއްގޮތަށް ކަމަށާއި, ފޭކް ބުކިންގ ހަދައިގެން ޓޫރިސްޓުން ގެނެސް އަމިއްލަ ގޭގޭގައި ބައިތިއްބައިގެން ޚިދުމަތް ނުދެވޭނެ ކަމެވެ.

ރައީސް ވިދާޅުވީ ގެސްޓްހައުސް ހިންގާ މީހުންނާއި ޓުއަރ އޮޕަރޭޓަރުން ރާއްޖެއަށް ޓޫރިސްޓުން ގެންނަނީ އެކަން ކުރަން އޮންނަ އުސޫލުގެ ތެރެއިންތޯ ބެލުމަށް އެތަންތަން މިހާރު އިންސްޕެކްޓް ކުރަން ފަށާފައިވާ ކަމަށެވެ. ޓޫރިސްޓުން ގެންނަނީ ރަނގަޅަށް ބުކިން ހައްދައިގެންތޯއާއި ކަމާގުޅުންހުރި ފަރާތްތަކުން ހަދާފައިވާ އެންމެހާ އުސޫލުތަކަށް އަމަލުކުރޭތޯ ބަލާނެ ކަމަށެވެ.

މީގެ އިތުރުން ރައީސް ވަނީ އެމަނިކުފާނުގެ ސަރުކާރަށް ވެރިކަން ލިބިވަޑައިގަތުމާއެކު ނިންމެވި ނިންމެވުމަކީ ކިތަންމެ ކުޑަ އާބާދީއެއް ދިރިއުޅެމުން އަންނަ ރަށެއްކަމުގައި ވީނަމަވެސް އެންމެ އަސާސީ ކަންކަން ފުރިހަމަކޮށްދެއްވުން ކަމަށެވެ. އެގޮތުން ފެނާއި ނަރުދަމާ، ލަފާ ފުރުން، ކަރަންޓު, ތަޢުލީމު އަދި ސިއްހީ ނިޒާމް ރަނގަޅުކުރެއްވުން ހިމެނިވަޑައިގަންނަވާ ކަމަށް ރައީސް ވިދާޅުވިއެވެ. އަދި އެ ޕްލޭނާ އެއްގޮތަށް ކުރިއަށް ވަޑައިގަންނަވާކަމަށް ރައީސް ވިދާޅުވިއެވެ.

ކޮވިޑްގެ ހާލަތާ ގުޅިގެން ތަރައްގީގެ ގިނަ މަޝްރޫޢުތަކެއް މަޑުޖައްސާލަން ޖެހުނުކަން ފާހަގަކުރައްވައި ރައީސް ވިދާޅުވީ, ފަށާފައި ހުރި ގިނަ ޕްރޮޖެކްޓްތަކާއި ބައެއް ޕްރޮޖެކްޓްތައް ހުއްޓަވާލައްވަން ޖެހިވަޑައިގެންނެވި ކަމަށެވެ. އަދި ކޮންމެހެން ކުރަންޖެހޭ ކަންކަން ފިޔަވައި އެހެން ކަންކަން މަޑު ޖައްސާލަން ޖެހިވަޑައިގެންނެވި ކަމަށެވެ. މީގެ ތެރެއިން ކޮންމެހެން ކުރަން ޖެހޭ ކަމެއްގެ ގޮތުގައި އޮމަދޫ ބަނދަރު ތަރައްޤީ ކުރެވިގެން ދިޔަކަމަށް ރައީސް ވިދާޅުވިއެވެ.

ރައީސް ވަނީ ތ. އަތޮޅުގެ އެހެން ރަށްރަށުގެ މަސައްކަތް ވެސް ކުރިއަށްދާނެ ކަމަށް ވިދާޅުވެ އެކަމުގެ ޔަގީންކަން ދެއްވާފައެވެ. އެގޮތުން ތ. ބުރުނީގެ ފެނާއި ނަރުދަމާއާއި, 6 ކްލާސްރޫމް ގެ މަސައްކަތް މިމަހު ފެށޭނެ ކަމަށް ރައީސް ވިދާޅުވިއެވެ. މީގެ އިތުރުން ބުރުނީ ޒުވާނުންނަށް ފުޓްސަލްދަނޑެއް ތަރައްގީ ކުރުމުގެ މަސައްކަތާއި، މަޑިފުށީގެ ބަނދަރުގެ ބޭރުތޮށި ލުމާއި، ސޯލާ ޕީވީސީ ހަރުކުރުމާއި، ކުނި މެނޭޖް ކުރުމާއި. ފުޓްބޯޅަ ދަނޑު ތަރައްގީ ކުރެވިގެންދާނެ ކަމށް ރައީސް ވިދާޅުވިއެވެ. މީގެ އިތުރުން ވިލުފުށީގައި އެޅުމަށް ހަމަޖެހިފައިވާ 100 ހައުސިންގ ޔުނިޓްގެ އެގްރީމެންޓުގައި ސޮއިކުރެވިގެންދާނެކަން ރައީސް ފާހަގަކުރެއްވިއެވެ.

ތ. ހިރިލަންދޫއާއި ކިނބިދޫގެ ބިން ހިއްކުމަށް ނިންމާފައިވާކަން ފާހަގަ ކުރައްވާ ރައީސް ވިދާޅުވީ އަންނަ އަހަރުގެ ތެރޭގައި އެ ދެރަށް ހިއްކަން ފެށިގެންދާނެކަމަށެވެ. އެގޮތުން ދިއްގަރު ބިން ހިއްކުމުގެ މަސައްކަތަށްފަހު ދެން ފެށިގެން ދާނީ ތ. އަތޮޅުގެ ރަށްރަށުގެ ބިން ހިއްކުމުގެ މަސައްކަތް ކަމަށް ރައީސް ވިދާޅުވިއެވެ.