ރައީސް ތ. އަތޮޅު ދަތުރުފުޅު: އޮމަދޫއަށް ވަޑައިގެން ބަނދަރުގެ ނިމުން އިފްތިތާހުކޮށްދެއްވައިފި
18 އޯގަސްޓު 2021 | ބުދަ 09:53އޮމަދޫ ކައުންސިލް މެންބަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުންނާއި ރައީސް ބައްދަލުކުރައްވާނެ
ރައީސް ސޯލިހު އޮމަދޫ ބަނދަރު ނިމުމުން ޝަރަފްވެރިކޮށްދެއްވައިފި
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކޮޅުމަޑުލުގެ ބައެއް ރަށްރަށަށް ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅު އޮމަދޫއަށް ވަޑައިގެންފިއެވެ.
ރައީސް ސޯލިހް އޮމަދޫއަށް ވަޑައިގެންނެވީ ބުދަ ދުވަހުގެ މެންދުރުފަހުގެ ވަގުތެއްގައެވެ. ރައީސް އޮމަދޫއަށް ވަޑައިގެންނެވުމުން އެމަނިކުފާނަށް ވަނީ ރަށުގެ ރައްޔިތުންގެ ފަރާތުން ހޫނު މަރުހަބާއެއް ދަންނަވާފައެވެ. ރައީސް އޮމަދޫއަށް ވަޑައިގެން ސަރުކާރުން އޮމަދޫގައި ތަރައްގީކޮށްފައިވާ ބަނދަރުގެ ނިމުން ވަނީ ރަސްމީކޮށް އިފްތިތާހުކޮށްދެއްވާފައެވެ. އޮމަދޫއަށް ރައީސް ވަޑައިގެން އެރަށުގެ މުއައްސަސާތަކަށް ޒިރާޔަތް ކުރައްވާނެއެވެ.
ރައީސްގެ މި ދަތުރުފުޅުގައި އޮމަދޫ ކައުންސިލް މެންބަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުންނާއި ބައްދަލުކުރައްވާ މެންބަރުން ފާހަގުރައްވާ ކަންތައްތަކާއި ގުޅޭ ގޮތުން މަޝްވަރާ ކުރައްވާނެއެވެ. އަދި ކައުންސިލާއި ރައްޔިތުންނަށް ދިމާވެފައިވާ ދަތި ކަންތައްތަކާ ގުޅޭ ގޮތުން މަޝްވަރާ ކުރެއްވުމަށް ވަނީ ހަމަޖެހިފައެވެ.
ރައީސް އޮމަދޫއަށް ވަޑައިގެން އެންމެ ހާއްސަކަމެއްގެ ގޮތުގައި އެރަށުގައި މި ސަރުކާރުން ތަރައްގީކުރި ބަނދަރު ހުޅުއްވައިދެއްވާ އެކަމަށްޓަކައި ބާއްވާ ހާއްސަ ރަސްމިއްޔާތު ޝަރަފްވެރިކޮށްދެއްވާނެއެވެ.
އޮމަދޫގައި މިހާރުވެސް ތަރައްގީގެ ބައެއް މަޝްރޫއުތައް ހިނގަމުންދާއިރު، ގިނަ މަސައްކަތްތައް ވަނީ ނިމިފައެވެ. އޮމަދޫގައި ފެނާއި ނަރުދަމާ ނިޒާމް ގާއިމުކުރުމުގެ މަސައްކަތް މިހާރު ވަނީ ކޮންޓްރެކްޓް ކުރެވިފައެވެ. އަދި ބޯފެން ރައްކާކުރުމުގެ ނިޒާމް ގާއިމްކޮށް ނިމިފައިވާ އިރު، ސޯލާޕީވީގެ ނިޒާމް ވަނީ ޓެންޑަރ ކުރެވިފައެވެ.
އަދި ކުނިމެނޭޖް ކުރާ މަރުކަޒު ގާއިމުކުރުމުގެ މަސައްކަތް ޓެންޑަރ ކުރެވިފައިވާ އިރު، ފުޓްސަލް ދަނޑު ތަރައްގީކުރުމުގެ މަސައްކަތް ދަނީ ކުރެވެމުންނެވެ. އޮމަދޫގެ އިންޖީނުގެ ބަދަލުކުރުމުގެ މަސައްކަތާއި، އަލަށް އާބާދުވާ ސަރަހައްދަށް ކަރަންޓް ފޯރުކޮށްދިނުން އަދި ޑިސްޓްރިބިއުޝަން ނެޓްވޯކް އަޕްގްޑޭޓްކޮށް އަލަށް އާބާދުވާ ސަރަހައްދުތަކަށާއި، ބަނދަރަށް ވަނީ ކަރަންޓް ފޯރުކޮށްދީ ނިމިފައެވެ.
އޮމަދޫއަށްފަހު ދެން ރައީސް ވަޑައިގަންނަވާނީ ވޭމަންޑޫއަށެވެ.
