އުސޫލުތަކާ ޚިލާފަށް ރަށްރަށުގައި ތިބޭ ފަތުރުވެރިން ހޯދުމުގެ އިންސްޕެކްޝަނެއް
އުސޫލާ ޚިލާފުވާ ފަރާތްތަކާމެދު އަޅަންޖެހޭ ފިޔަވަޅުތައް އަޅާނެ
އޮގަސްޓް 18 ވަނަ ދުވަހުން ފެށިގެން އިންސްޕެކްޝަންތައް ކުރިއަށްދާނެ
އުސޫލުތަކާއި ޚިލާފަށް ރަށްރަށުގައި ތިބޭ ފަތުރުވެރިން ހޯދުމުގެ އިންސްޕެކްޝަނެއް ފެށުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ނިންމައިފިއެވެ.
އެޗްޕީއޭއިން ބުނީ ރާއްޖެއަށް އަންނަ ފަތުރުވެރިން ޖުލައި 26ން ފެށިގެން, މާލެއާއި މީހުން ދިރިއުޅޭ އެހެން ރަށްރަށުގައި ޗުއްޓީ ހޭދަކުރުމަށް ތިބެވޭނީ ދުނިޔޭގެ ސިއްހަތު ޖަމިއްޔާއިން އިމަރޖެންސީ ޔޫސްއަށް ލިސްޓްކޮށްފައިވާ, ނުވަތަ މޯލްޑިވްސް ފުޑް އެންޑް ޑްރަގް އޮތޯރިޓީން ރާއްޖޭގައި ބޭނުންކުރުމަށް ހުއްދަ ދީފައިވާ ކޮވިޑް-19 ވެކްސިނެއްގެ ޑޯޒްތައް ފުރިހަމަކޮށް، ރާއްޖެއަށް ދަތުރުކުރާ ތާރީޚަށް 14 ދުވަސް ވެފައިވާ ފަރާތްތަކަށާއި ވެކްސިންގެ ޑޯޒްތައް ހަމަނުވާ ފަތުރުވެރިންނަށް މީހުން ދިރިއުޅޭ ރަށްރަށުގެ ހޮޓާތަކާ، ގެސްޓް ހައުސްތަކުގައި ތިބެވޭނީ އެ ރަށެއްގެ މުޅި އާބާދީގެ 60 އިންސައްތަ މަތިވެފައިވާނަމަ ކަމަށް އެ އެޖެންސީން އިއުލާން ކޮށްފައިވާ ކަަމަށެވެ.
އެހެންނަމަވެސް އެ އުސޫލުތަކާ ޚިލާފަށް ގިނަ އަދަދެއްގެ ފަތުރުވެރިން ރާއްޖޭގައި ޗުއްޓީ ހޭދަކުރަމުންދާ ކަމުގެ މައުލޫމާތު ލިބެމުންދާތީ, އުސޫލުތައް ޤާއިމުކޮށްފައިވާ މަގުސަދު ހާސިލުކުރުމަށްޓަކައި އިތުރަށް ބަލަންޖެހޭ ކަންކަން ބަލައި، އުސޫލާ ޚިލާފުވާ ފަރާތްތަކާމެދު އަޅަންޖެހޭ ފިޔަވަޅުތައް އެޅުމަށްޓަކައި އޮގަސްޓް 18 ވަނަ ދުވަހުން ފެށިގެން އިންސްޕެކްޝަނެއް ފެށުމަށް ހަމަޖެހިފައިވާ ކަަމަށް އެޗްޕީއޭ އިން ބުނެފައިވެއެވެ. އެގޮތުން މި އިންސްޕެކްޝަން ކުރިއަށް ގެންދނީ ފުލުހުންނާއި ޓޫރިޒަމް މިނިސްޓްރީއާ އިކޮނޮމިކް މިނިސްޓްރީގެ އިތުރުން ލޯކަލް ގަވަރމަންޓް އޮތޯރިޓީއާ ގުޅިގެން ކަމަށް އެޗްޕީއޭއިން ބުނެފައި ވެއެވެ.
އިންސްޕެކްޝަންތަކާ ގުޅިގެން އިތުރު މައުލޫމާތު ހޯދުމަށް ބޭނުންވާނަމަ 7264575 ނަންބަރަށް (ހުކުރު ދުވަސް ފިޔަވާ ކޮންމެ ދުވަހެއްގެ ހެނދުނު 9:00ން ހަވީރު 6:00ށް) ގުޅުމުން އެ މައުލޫމާތު ފޯރުކޮށްދޭނެ ކަމަށް އެޗްޕީއޭ އިން ބުނެއެވެ. އަދި އިންސްޕެކްޝަނާއި ގުޅިގެން ޝަކުވާއެއް ހުށައަޅަން ބޭނުންވާނަމަ inspection.heoc@heal;th.gov.mv އަށް މެއިލް ކުރުމަށް ވެސް ވަނީ އެދިފައެވެ.
އެޗްޕީއޭ އިން މިފަދަ އިންސްޕެކްޝަނެއް ކުރިއަށް ގެންދިޔުމަށް ނިންމާފައިވާއިރު, ހަތަރު ކޮޓަރިއަކަށް ބުކިން ހައްދައިގެން ރާއްޖެއަށް އައި އިންޑިޔާގެ 183 މީހަކު ވެސް ވަނީ އަނބުރާ ފޮނުވާލާފައެވެ.
