އެމްއެމްޕީއާރްސީގެ ޚިޔާނާތުގެ މައްސަލައާ އަކްރަމް ކަމާލުއްދީނާ ގުޅުމެއް ނެތް ކަމަށް އޭސީސީން ނިންމި ނަމަވެސް، އެމްޑީޕީގެ އެތެރޭގެ އިންތިޚާބުގައި ވާދަކުރެއްވުމުގެ ފުރުސަތު ނުދޭން ޕާޓީން ނިންމައިފިއެވެ.

އާދީއްތަ ދުވަހު އެމްޑީޕީން އަކްރަމަށް ފޮނުވި ސިޓީގައި ބުނެފައިވަނީ މި އަހަރުގެ އެޕްރީލް 24ގައި ހުޅުވާލި ދާއިރާތަކުގެ އިންތިޚާބަށް ކުރިމަތިލެއްވި ކެންޑިޑޭޓުންގެ ތެރެއިން ގައުމީ ހިންގާ ކޮމިޓީގެ ނިންމުމާއި އެއްގޮތަށް ޝަރުތު ހަމަވާ ބޭފުޅުން ބެލުމަށް، ކަމާއި ގުޅުންހުރި އިދާރާތަކަށް ފޮނުވުމުން އޭގެ ތެރެއިން އަކްރަމްގެ މައްސަލައެއް ބަލަމުން އަންނަ ކަމަށް އޭސީސީން ބުނެފައިވާ ކަމަށެވެ. އެހެންކަމުން ޝަރުތު ހަމަނުވާ ކަމަށް ބަލައި އިންތިޚާބުގައި ވާދަކުރެއްވުމުގެ ފުރުސަތު ނުދޭން ނިންމާފައިވާ ކަމަށެވެ.

އަކްރަމަށް އިންތިޚާބުގައި ވާދަކުރެއްވުމުގެ ފުރުސަތު ނުދޭން ނިންމިއިރު، އޭސީސީން އަކްރަމްގެ މައްސަލައެއް ބަލަމުން ނުދާކަމަށް އެ ކޮމިޝަނުން އަކްރަމަށް ވަނީ އަންގާފައެވެ.

އެހެންނަމަވެސް ހިންގާ ކޮމިޓީން ނިންމާފައިވަ ގޮތާއި، އިންތިޚާބުގައި ވާދަ ނުކުރެވޭނެ ކަމަށް ނިންމި ނިންމުމާ ދިމާނުވެއެވެ. ގައުމީ ހިންގާ ކޮމިޓީން ނިންމާފައިވާ ނިންމުމުގައި ބަޔާން ކޮށްފައިވާ އެއްވެސް އިދާރާއަކަށް ފިޔަވަޅު އަޅަން ފޮނުވާފައިވާކަންވެސް ސިޓީގައި ބަޔާން ކޮށްފައި ނުވެއެވެ.

އެމްޑީޕީގެ ގައުމީ ހިންގާ ކޮމިޓީން ނިންމާފައިވަނީ ދާއިރާ ތަކުގެ އިންތިޚާބުގައި ވާދަކުރެވޭނީ ޖިނާއީ ބޮޑެތި ކުށްތަކުގެ ތެރެއިން މީހަކު މެރުމާއި ރޭޕް ކުރުމާއި ކުޑަކުދިންނަށް ޖިންސީ ގޯނާ ކުރުން ފަދަ ކުށްތަކުން ބަރީއަވެގެންވާ މީހުންނަށް ކަމަށެވެ.

އެސެޓް ރިކަވަރީ ކޮމިޝަނާއި މަރު ކޮމިޝަނުން ނެރެފައިވާ ރިޕޯޓެއްގައި ކުށެއް ކުރުމުގައި ބައިވެރިވެފައިވާ ކަމަށް ބަޔާންކުރާ މީހުންނަށް އިންތިޚާބުގައި ބައިވެރި ނުވެވޭނެ ކަމަށްވެސް ނިންމާފައިވެއެވެ. އަދި އެމްއެމްޕީއާރްސީ ޚިޔާނާތާއި ގުޅިގެން އޭސީސީން ތައްޔާރުކޮށްފައިވާ ރިޕޯޓެއްގައި ފިޔަވަޅު އަޅައިދިނުމަށް އެދި އެކިއެކި މުއައްސަސާތަކަށް ނަން ފޮނުވާފައިވާ ފަރާތްތަކަށް ވާދަ ނުކުރެވޭނެ ކަމަށް ހިންގާ ކޮމިޓީން މިއަހަރުގެ އެޕްރީލް 24ވަނަ ދުވަހު ނިންމާފައިވެއެވެ.