ކޮވިޑް-19ން ދިފާއުވުމަށް ވެކްސިންގެ ދެވަނަ ޑޯޒް ފުރިހަމަކުރި މީހުންގެ ޖުމްލަ 294،364ށް އަރައިފިއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ ހުކުރު ދުވަހު ވެކްސިންގެ ދެވަނަ ޑޯޒް ޖަހާފައިވަނީ 255 މީހުން ކަމަށެވެ. އެއީ އަތޮޅުތެރެއިން ވެކްސިންގެ ދެވަނަ ޑޯޒް ފުރިހަމަކުރި މީހުން ކަމަށް އެޗްޕީއޭއިން ބުނެފައިވެއެވެ. މިއާއެކު ވެކްސިންގެ ދެވަނަ ޑޯޒް ޖެހި މީހުންގެ ޖުމްލަ 294،364ށް އަރާފައިވާކަމަށް އެޗްޕީއޭއިން ބުނެފައިވެއެވެ.

ހުކުރު ދުވަހު 282 މީހަކު ވެކްސިންގެ ފުރަތަމަ ޑޯޒް ފުރިހަމަކޮށްފައިވާކަމަށް އެޗްޕީއޭއިން ބުނެފައިވެއެވެ. މިއީ އަތޮޅުތެރެއިން ވެކްސިންގެ ފުރަތަމަ ޑޯޒް ފުރިހަމަކުރި މީހުން ކަމަށް އެޗްޕީއޭއިން ބުނެފައިވެއެވެ. މިއާއެކު ވެކްސިންގެ ފުރަތަމަ ޑޯޒް ފުރިހަމަކުރި މީހުންގެ ޖުމްލަ 342،793 އަށް ވަނީ އަރާފައެވެ.

ހުކުރު ދުވަހު މާލެ ސަރަހައްދުގައި ވެކްސިނެއް ނުޖަހާނެއެވެ.

އެޗްޕީއޭއިން ބުނީ މާލެ ސަރަހައްދުގައި ވެކްސިން ޖަހާ 6 ސެންޓަރާއި، 3 މޮބައިލް ޓީމެއް މިވަގުތު ހަރަކާތްތެރިވަމުންދާ ކަމަށެވެ. އަދި އަތޮޅުތެރޭގައި 176 ވެކްސިން ސެންޓަރު ގާއިމްކުރެވިފައިވާކަމަށް އެޗްޕީއޭއިން ވަނީ ބުނެފައެވެ.

މި ހިނގާ އޮގަސްޓު މަސް ނިމުމުގެ ކުރިން ރާއްޖޭގެ އާބާދީގެ 90 އިންސައްތަ މީހުންނަށް ވެކްސިންގެ ދެޑޯޒް ދިނުމަށް މިހާރު ވަނީ ވެކްސިން ކެމްޕެއިނެއް ފަށާއެވެ. މި ކެމްޕެއިންގެ އިތުރުން އުމުރުން 12 އަހަރާއި 18 އަހަރާ ދެމެދުގެ ކުދިންނަށް ފައިޒަރ ވެކްސިން ދިނުމުގެ ކެމްޕެއިނެއް އާދިއްތަ ދުވަހު ފަށާނެކަން އެޗްޕީއޭއިން ވަނީ އިއުލާނުކޮށްފައެވެ.

މި ޕްރޮގްރާމުގެ ތެރެއިން އެންމެ ފުރަތަމަ އިސްކަމެއް ދޭނީ ސްކޫލް ކުދިންނަށް ވެކްސިން ދިނުމަށް ކަމަށް އެޗްޕީއޭއިން ބުނެފައިވެއެވެ. އަދި އެ އުމުރުފުރާގެ ކުދިންގެ ތެރެއިން ސްކޫލުގައި ނޫޅޭ ކުދިންނާއި، މާބަނޑު މީހުންނާއި، އަދިވެސް ފައިޒަރ ވެކްސިން ޖަހަން ޝަރުތު ހަމަވާ މީހުން ވެކްސިން ޖެހުމަށް އެޕޮއިންޓްމެންޓް ހެއްދުމަށް މިހާރު ވަނީ ހުޅުވާލާފައެވެ.