ކޮވިޑް-19 އިން ދިފާއުވުމަށް އިތުރު 1204 މީހުން ވެކްސިންގެ ދެވަނަ ޑޯޒް ޖަހައިފިއެވެ.

ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ، އިތުރު 1204 މީހުން ވެކްސިންގެ ދެވަނަ ޑޯޒް ޖަހާފައިވާއިރު، އޭގެ ތެރޭގައި ހިމެނެނީ މާލެ ސަރަޙައްދުން ވެކްސިން ޖެހި 641 މީހުންނާއި، އަތޮޅު ތެރެއިން ވެކްސިން ޖެހި 563 މީހުން ކަމުގައެވެ. އެއާއެކު މިހާތަނަށް ވެކްސިންގެ ދެޑޯޒް ޖެހި މީހުންގެ އަދަދު ވަނީ 294،109ށް އަރާފައެވެ.

އިތުރު 1502 މީހުން ފުރަތަމަ ޑޯޒް ޖަހާފައިވާއިރު، އޭގެ ތެރޭގައި ހިމެނެނީ މާލެ ސަރަޙައްދުން ވެކްސިން ޖެހި 630 މީހުންނާއި، އަތޮޅު ތެރެއިން ވެކްސިން ޖެހި 563 މީހެކެވެ. އެއާއެކު ރާއްޖެއިން މިހާތަނަށް ވެކްސިންގެ ފުރަތަަމަ ޑޯޒް ޖެހި މީހުންގެ އަދަދު ވަނީ 342،511ށް އަރާފައެވެ.

ރާއްޖޭގެ ކޮވިޑުގެ ހާލަތަށް ބަލާއިރު މިހާރު މާލެ ސަރަހައްދުން ފެންނަ ކޭހުގެ އަދަދު މަދުވި ނަމަވެސް ރަށްރަށުން ފެންނަ ކޭހުގެ އަދަދު ވަނީ އިތުރުވެފައެވެ. އެގޮތުން ފާއިތުވި ފަސް ދުވަހަށް ބަލާއިރު ރަށްރަށުން ކޮވިޑަށް ޕޮޒިޓިވްވި މީހުންގެ އަދަދު ވަނީ 60ށް ވުރެ މައްޗަށް އަރާފައެވެ. އެއާއެކު ވެކްސިންގެ ޑޯޒްތައް ފުރިހަމަ ކުރުމަށް އެޗްއީއޯސީންވެސް ވަނީ އިލްތިމާސްކޮށްފައެވެ.

ވެކްސިން ފުރިހަމަ ނުކުރާ މީހުން ޚިދުމަތް ހޯދުމުގައި ދަތިތަކެއް ދިމާވާ ގޮތަށް ބައެއް ބަދަލު ގެނައުމަށް ސަރުކާރުން ވަނީ ނިންމާފައެވެ. އެގޮތުން ކެފޭ ރެސްޓޯރެންޓްތަކުން ޚިދުމަތް ހޯދުމުގައާއި އެތެރޭގެ އުދުހުންތަކުގައި ވެސް ދަތުރުފަތުރު ކުރުމުގައި ހުރަސްތައް ދިމާވާނެއެވެ.