މެއި މަހުގެ 6 ވަނަ ދުވަހުގެ ރޭ ރައީސް މުހައްމަދު ނަޝީދު އަވަހާރަކޮށްލުމަށް ދިން ހަމަލާގައި ލިބިވަޑައިގެންނެވި ޖިސްމާނީ އަނިޔާތަކުގެ ތެރެއިން ފަސޭހަފުޅުނުވަނީ ފައިންޕުޅަށް ލިބިވަޑައިގެންނެވި ދެ އަނިޔާއެއް އެކަނި ކަމަށް އެމަނިކުފާނު ވިދާޅުވެއްޖެއެވެ.
އެމެރިކާގެ މަޝްހޫރު ޓީވީ ޗެނަލް، ސީއެންއެންއަށް ދެއްވި ބަސްތީގަތުމެއްގައި ރައީސް ނަޝީދު ވަނީ އެމަނިކުފާނުގެ ޙާލުކޮޅުގެ އެންމެ ފަހުގެ ތަފުސީލު ހިއްސާކުރައްވާފައެވެ. ކުރީގެ ރައީސް ނަޝީދު ވިދާޅުވީ، އެމަނިކުފާނަށް އަމާޒުކޮށްދިން ހަމަލާއިން މާތް ﷲގެ ހެޔޮ ރަހުމަތްފުޅުން ސަލާމަތްވެވަޑައިގެންނެވީތީ ޝުކުރުކުރައްވާ ކަމަށެވެ. މި ހަމަލާއިން އެމަނިކުފާނަށް ލިބިވަޑައިގެންނެވި އެތެރެ ހަށީގެ ހުރިހާ އަނިޔާއަކަށް ޝިފާ ލިބިވަޑައިގެންފައިވާކަމަށް ވިދާޅުވިއެވެ. އަދި އެ ހަމަލާގައި ލިބިވަޑައިގެންނެވި ޖިސްމާނީ އަނިޔާތަކުގެ ތެރެއިން ފަސޭހަފުޅުނުވަނީ ފައިންޕުޅަށް ލިބިވަޑައިގެންނެވި ދެ އަނިޔާއެއް އެކަނި ކަމަށް އެމަނިކުފާނު ވިދާޅުވިއެވެ.
މެއި މަހުގެ 6 ވަނަ ދުވަހުގެ ރޭ ރައީސް މުހައްމަދު ނަޝީދު އަވަހާރަކޮށްލުމަށް ދިން ހަމަލާގައި ލިބިވަޑައިގެންނެވި އަނިޔާތަކަށް ޖަރުމަނުވިލާތުގައި ފަރުވާ ހޯއްދަވަމުން ގެންދަވާއިރު ހާލުކޮޅު ޖުމްލަ ގޮތެއްގައި ރަނގަޅު ކަމަށާއި ނަމަވެސް ހަށިކޮޅުގެ ވާތް ފަރާތުގެ ވަރަށް ގިނަ ތަންތަން އަދިވެސް ހުންނަނީ އައްސިވެފައިކަމަށް ޖުލައި މަހުގެ 27 ވަނަ ދުވަހު އެމަނިކުފާނު ވަނީ ހާމަކުރައްވާފައެވެ. ހަމަލާއަށްފަހު ލިބިވަޑައިގެންނެވި އަނިޔާތަކާ ގުޅޭގޮތުން ފުރަތަމަ ފަހަރަށް ވާހަކަދައްކަވާފައިވަނީ، އެމްޑީޕީގެ 16 ވަނަ އަހަރީ ދުވަހާ ގުޅިގެން އެމްޑީޕީގެ ކްލަބް ހައުސް ހަރުގެ ލޯންޗްކުރުމަށް ބޭއްވި ރަސްމިއްޔާތުގައެވެ. ޖުމްލަ ގޮތެއްގައި ހާލު ރަނގަޅު ކަމަށް ވިދާޅުވިއިރު، އިނގިއްޔާއި ކަންފަތާއި ފައިގައި މައްސަލަ އުޅޭކަމަށް ނަޝީދު އޭރު ވިދާޅުވިއެވެ. އަދި ކަނާތުގެ ތިން އިނގިއްޔެއް އައްސިވެފައި ހުންނަކަމަށް ނަޝީދު ވިދާޅުވިއެވެ. މީގެއިތުރުން ވާތު ކަންފަތުގައި އަޑުއިވުމުގައި ދަތިތަކެއް އެބަހުރިކަމަށް ނަޝީދު ވިދާޅުވިއެވެ. ވާތު ކަންފަތުގެ ތޫލިއަށް ލިބިފައި ހުރި ގެއްލުމާ ގުޅިގެން އިތުރު އޮޕަރޭޝަނެއް ނޮވެމްބަރ މަހު ކުރައްވަން ޖެހިވަޑައިގަންނަވާކަމަށް ނަޝީދު އޭރު ވިދާޅުވިއެވެ.
ރައީސް ނަޝީދަށް ލިބިވަޑައިގެންނެވި އަނިޔާތަކަށް އޭޑީކޭ ހޮސްޕިޓަލްގައި 16 ގަޑިއިރުގެ އޮޕަރޭޝަނެއް ކޮށްފައިވެއެވެ. އައިއީޑީއެއް ގޮއްވާލުމުގެ ހާދިސާގައި އެމަނިކުފާނުގެ ހަށިކޮޅަށް 10 ރޭޒާ ފުއް ވަދެ ހަށިގަނޑުގެ މުހިއްމު ގުނަވަންތައް ފޫއަޅުވާލާފައިވެއެވެ. އިތުރު ފަރުވާ ހޯއްދެވުމަށް ޖަރުމަނުވިލާތަށް ވަޑައިގެންނެވީ މެއި މަހުގެ 13 ވަނަ ދުވަހުއެވެ. އޭގެފަހުން ޖަރުމަނުވިލާތުގައި ވެސް އިތުރު އޮޕަރޭޝަންތަކެއް ކުރައްވާފައިވެއެވެ. އެގޮތުން ފައިގެ އޮޕަރޭޝަނެއް ވެސް ކުރައްވާފައިވާކަމަށް ރައީސް ނަޝީދުގެ އާއިލާއިން ވަނީ ބުނެފައެވެ. ޖަރުމަނުވިލާތުން ފަރުވާ ހޯއްދެވުމަށްފަހު މިހާރު ހުންނެވީ އިނގިރޭސިވިލާތުގައެވެ.
