ކެލިފޯނިއާގެ ހުރިހާ ޓީޗަރުން ވެކްސިން ޖެހުން މަޖުބޫރު

އެމެރިކާގެ ކެލިފޯނިއާގެ ތައުލީމީ ދާއިރާގައި މަސައްކަތް ކުރާ ހުރިހާ އެންމެން ވެކްސިން ޖެހުން މަޖުބޫރު އުސޫލެއް އެކުލަވާލައިފިއެވެ.

ސަރުކާރާއި އަމިއްލަ ފަރާތްތަކުން ހިންގާ ތައުލީމު ފޯރުކޮށްދޭ ތަންތަނުގައި މަސައްކަތްކުރާ ހުރިހާ އެންމެން ވެސް މި އުސޫލަށް އަމަލުކުރަން ޖެހެއެވެ. ވެކްސިން ނުޖަހާ މީހުން ކޮންމެ ހަފުތާއަކު އެއްފަހަރު ޓެސްޓްކޮށް ނަތީޖާ ހުށަހަޅަން ޖެހެއެވެ. މިއީ ދަރިވަރުންގެ ސަލާމަތާއި ރައްކާތެރިކަން ކަށަވަރުކުރުމަށް ނިންމި ނިންމުމެއް ކަމަށް ކެލިފޯނިއާގެ ގަވަރުނަރ ގާވިން ނިއުސަމް ވިދާޅުވިއެވެ. އާނާ ވިދާޅުވީ، މި އުސޫލް ޕްރީ ސްކޫލުން ފެށިގެން ގޮސް ގްރޭޑް 12 އާ ހަމައަށް ކިޔަވައިދޭ ސްކޫލްތަކުގެ ޓީޗަރުންނާއި، ސްޓާފުން ވެސް އަމަލުކުރުން މަޖުބޫރު ކަމަށެވެ.

މި އުސޫލަށް އަމަލު ކުރަން ބުރާސްފަތި ދުވަހު ވަނީ ފަށާފައެވެ.

ޑެލްޓާ ވޭރިއަންޓާއެކު އެމެރިކާގައި ކޮވިޑް ކޭސްތަކުގެ އަދަދު އިތުރުވާން ފެށުމުން، މިފަދަ އުސޫލުތަކެއް ކެލިފޯނިއާގެ އިތުރުން އެހެން ސްޓޭޓްތަކުގައި ވެސް ވަނީ އެކުލަވާލާފައެވެ. ފާއިތުވި ހަފުތާގައި ހަވާއީގައި ވެސް ވަނީ އޮފީސްތަކާއި، ތައުލީމީ ދާއިރާގައި މަސައްކަތްކުރާ މީހުން ވެކްސިން ޖެހުމަށް މަޖުބޫރުކަން ހާމަކޮށްފައެވެ. މިއާ ޚިލާފަށް ކެލިފޯނިއާގައި އާއްމުކުރި އުސޫލުގައި އަމިއްލަ ސްކޫލްތަކުގެ ޓީޗަރުންނާއި މުވައްޒަފުން ވެސް ހިމެނެއެވެ.

ކެލިފޯނިއާގައި އޮގަސްޓް 11 ގައި ޕޮޒިޓިވްވިކަމަށް ރިޕޯޓު ކޮށްފައިވަނީ، 9،925 މީހުންނެވެ. މިހާތަނަށް 3،969،722 މީހުންނަށް އެ ސްޓޭޓްގައި ބަލި ޖެހިފައިވެއެވެ. ބަލީގައި 63،976 މީހުންވަނީ މަރުވެފައެވެ.