ރައީސްގެ އަންދާޒާ: ތެލާއި ފެން އެކެއް ނުވާނެ

މިވަގުތު ގައުމަށާއި ޕާޓީއަށް އެންމެ ރަނގަޅު ގޮތަކީ އެމްޑީޕީ - ޕީޕީއެމް އިއްތިހާދެއް ކަމަށް އެމްޑީޕީގެ ރައީސް، ރައީސް މުހައްމަދު ނަޝީދު ވިދާޅުވެފައިވީނަމަވެސް، އެއީ އެންމެ ރަނގަޅު ގޮތްކަމަށް ދެކިވަޑައިނުގަންނަވާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު ވިދާޅުވެއްޖެއެވެ.

ބުދަ ދުވަހު އޮތް ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް ވިދާޅުވީ، ސިޔާސީ ގޮތުން ރާއްޖޭގައި އޮންނަނީ މައިގަނޑު 2 ފިކުރެއް ކަމަށެވެ. އެއީ އެމްޑީޕީއާއި ޕީޕީއެމްކަން ފާހަގަ ކުރައްވައި ރައީސް ވިދާޅުވީ، މި ދެފިކުރު އެއްވެދާނެ ކަމަށް ގަބޫލު ނުކުރައްވާ ކަމަށެވެ. އަދި މަލްޓި ޕާޓީ ޑިމޮކްރަސީއެއް ރާއްޖޭގައި އޮންނައިރު، މި ދެ ފިކުރު އެއްވުމަކީ އެމަނިކުފާނު ތާއީދު ކުރައްވާ ކަމެއް ނޫންކަމަށްވެސް ރައީސް ވަނީ ހާމަކަން ބޮޑު ގޮތެއްގައި ވިދާޅުވެފައެވެ.

ރައީސް އިތުރަށް ވިދާޅުވީ، ރައީސް ނަޝީދު ބޭނުންފުޅުވާނަމަ ރައީސް ޔާމީނާއެކު މަސައްކަތް ކުރެއްވިދާނެ ކަމަށެވެ. ނަމަވެސް ރާއްޖޭގައި މިހާރު އޮތް ނިޒާމަށް ބަލާއިރު އެމްޑީޕީއާއި ޕީޕީއެމް އެއްވުމަކީ ބުއްދިވެރި ކަމެއް ނޫން ކަމަށް ރައީސް ވިދާޅުވިއެވެ.

ރައީސް ނަޝީދު ގެންދަވަނީ އެމްޑީޕީ އެހެން މިސްރާބަކަށް ގެންގޮސް ޕީޕީއެމާއެކު މަސައްކަތް ކުރައްވަން ބޭނުންވާކަން ފައުޅުކަންބޮޑު ގޮތެއްގައި ހާމަ ކުރައްވަމުންނެވެ. އެމަނިކުފާނުވަނީ މީގެ ކުރިން ވެސް މިފަދަ މޭރުމަކުން ވާހަކަދައްކަވާފައެވެ. އެގޮތުން ކުރިއަށް ދެވެން އޮތީ ޕީޕީއެމް ފަދަ މެދުމިނުގެ ފިކުރަށް ތާއީދުކުރާ ބަޔަކާއެކުގައި ކަމަ ށްވަނީ ވިދާޅުވެފައެވެ. އަދި މިއީ ހަރުކަށި ފިކުރާ ދެކޮޅަށް ކުރައްވާ މަސައްކަތެއްގެ ގޮތުގައި ވަނީ ސިފަ ކުރައްވާފައެވެ.

އިދިކޮޅުންވެސް ވަނީ މި މޭރުމުން އެކަމާ ގުޅޭގޮތުން ވާހަކަ ދައްކާފައެވެ. އެގޮތުން ރައީސް ޔާމީންގެ ސިޔާސަތުތަކަށް ތާއިދުކުރައްވާ ރައީސް ނަޝީދު ޔާމީންގެ އެހީއަށް އެދިވަޑައިގެންފިނަމަ ދެ ޕާޓީއެކުގައި މަސައްކަތް ކުރައްވާނެތޯ ރާއްޖެއެމްވީ އިން ސުވާލުކުރުމުން ޕީޕީއެމްގެ މެމްބަރުން ވަނީ އެ ސިޔާސަތެއް ބިނާކުރުމަށްޓަކައި ރައީސް ނަޝީދުގެ މުޅި ދިރިއުޅުން ހޭދަކުރެއްވި ސިޔާސަތެއް ނަޝީދު ދޫކުރައްވާނެ ކަމަށް ގަބޫލުފުޅު ނުކުރައްވާ ކަމަށް ވިދާޅުވެފައެވެ. އަދި ރަނގަޅު ނިޔަތެއްގައި ނަޝީދުގެ ސިޔާސަތުތައް ބަދަލު ނުކުރާނެ ކަމަށާއި ވަރަށް މަކަރުވެރި ގޮތްތައް ބައެއް ސިޔާސީ ބޭފުޅުން ގެންގުޅުއްވާ ކަަމަށްވެސް އިދިކޮޅުން ގަބޫލު ކުރެއެވެ.

އޭގެ އިތުރުން، ދެ ލީޑަރުން އެކައްޗެއް ކިޔައިފިނަމަ ރައްޔިތުން ސިޔާސީ ލީޑަރުންނަށް ކުރާނެ އިތުބާރު ނޯންނާނެ ކަމަށާއި، ރައްޔިތުން އިޚުތިޔާރު ކުރަނީ ސިޔާސަތުތަކާއި ފިކުރުތައް ކަމަށް އިދިކޮޅުންވެސް ވަނީ ބުނެފައެވެ. އެގޮތުން ރައީސް ނަޝީދާއި ރައީސް ޔާމީންގެ ސިޔާސަތުތަކަކީ މުޅިން ތަފާތު ދެ ސިޔާސަތުތައް ކަމަށް ޕީޕީއެމްއިން ވަނީ ތަކުރާރުކޮށް ބުނެފައެވެ.