ހުޅުމާލޭގައި ދިވެހި ޓެކްސީ ޑްރައިވަރަކު މަރާލަން ބިދޭސީއަކު މަސައްކަތްކޮށްފި
ހާދިސާ ހިނގީ ނިރޮޅުމަގުގެ 19ވަނަ ގޯޅީގައި
ޑްރައިވަރު މަރާލަން މަސައްކަތްކުރި މީހާ
ހުޅުމާލޭގައި ދިވެހި ޓެކްސީ ޑްރައިވަރަކަށް ހަމަލާދީ މަރާލަން ބިދޭސީއަކު މަސައްކަތް ކޮށްފިއެވެ.
ހުޅުމާލެ ނިރޮޅުމަގުގެ 19ވަނަ ގޯޅީގައި ހިނގި މި ހާދިސާގައި، ޓެކްސީ ޑްރައިވަރު މަރާލަން މަސައްކަތް ކުރީ، އިންޑިއާ މީހެއް ކަމަށް ރާއްޖެއެމްވީއަށް ވަނީ އެނގިފައެވެ. ޑްރައިވަރަށް ހަމަލާދިނީ، އެމީހާ ލައިގެން ހުރި ގަމީސް ބޭލުމަށްފަހު ޑްރައިވަރުގެ ކަރުގައި އޮޅައިގެންނެވެ. މަންޒަރު ދުށް މީހަކު ރާއްޖެއެމްވީއަށް މައުލޫމާތު ދެމުން ބުނީ، ކަރުގައި ގަމީސް އޮޅައި ޑްރައިވަރު މަރާލަން އުޅުމުން ޓެކްސީ ކޮންޓްރޯލްނުވެ ގޮސް އެ މަގުގައި ޕާކް ކޮށްފައިވާ ސައިކަލަކާއި ވޭނެއްގައި ޖެހި ކާރު ހުއްޓުނު ކަމަށެވެ.
ޑްރައިވަރު މަރާލަން ބޭރުމީހާ މަސައްކަތްކުރީ، ދަތުރު ފައިސާ ދޭށޭ ޑްރައިވަރު އެންގުމުން އޭނާގެ އަތުގައި ފައިސާ ނެތް ކަމަށް ބުނެފައެވެ. ދަތުރު ނެގީ ހުޅުލޭ އައިލެންޑް ހޮޓެލުން ކަމަށްވެސް ރާއްޖެއެމްވީއަށް ވަނީ މައުލޫމާތު ލިބިފައެވެ. މަންޒަރު ދުށް މީހަކު މައުލޫމާތު ދިންގޮތުގައި އެޗްއައިއެޗުން ބޭރުމީހާ ނިކުތްއިރުވެސް ހުރީ ވަރަށް ބޮޑަށް މަސްތުގެ ހާލަތުގައެވެ.
އެ ސަރަހައްދުގައި ފުލުހުން ގެންދަނީ ހަރަކާތްތެރި ވަމުންނެވެ. މިކަމާ ގުޅިގެން ފުލުހުންގެ ބަހެއް އަދި ނުލިބެއެވެ.
