ރަން އަހަރަށް މަރުހަބާ ކިޔާ އިރު ފަތުރުވެރިކަން އާންމު ހާލަތަށް ރުޖޫއަވާނެ ކަމުގެ އުންމީދު ބޮޑު - މިނިސްޓަރ
ދާއިރާގެ ވަރަށް ގިނަ ކަންތައްތައް އައު އާންމު ހާލަތުން އަރައިގަނެ ފަތުރުވެރިކަން އާންމު ހާލަތަށް ދެވިފައި އޮންނާނެ
ޓޫރިޒަމް މިނިސްޓަރ ޑރ. އަބްދުﷲ މައުސޫމް
އަންނަ 2022 ވަނަ އަހަރާ ކުރިމަތިލާއިރު ރާއްޖޭގެ ފަތުރުވެރިކަން އޮންނާނީ އައު އާންމު ހާލަތުން އަރައިގަނެވިފައި ކަމަށް ވަރަށް ބޮޑަށް ލަފާކުރެވޭ ކަމަށް މިނިސްޓަރ އޮފް ޓޫރިޒަމް ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖޭގެ ފަތުރުވެރިކަން މިހާރު ހިންގަމުން މިދަނީ އައު އާންމު ހާލަތުގައިކަން ފާހަގަކުރައްވައި ރާއްޖެޓީވީގެ ފަލަސުރުހީ ޕްރޮގްރާމްގައި ފާއިތުވި ބުދަ ދުވަހުގެ ރޭ ވާހަކަދައްކަވަމުން މިނިސްޓަރު މައުސޫމް ވަނީ ރާއްޖޭގެ ފަތުރުވެރިކަމުގެ ރަންޔޫބީލަށް 2022 ވަނަ އަހަރު މަރުހަބާ ކިޔާ އިރު، ދާއިރާގެ ވަރަށް ގިނަ ކަންތައްތައް އައު އާންމު ހާލަތުން އަރައިގަނެ ފަތުރުވެރިކަން އާންމު ހާލަތައް ދެވިފައި އޮންނާނެ ކަމުގެ އުންމީދު ބޮޑުކަމަށް ވިދާޅުވެފައެވެ.
މިނިސްޓަރު މައުސޫމް ވަނީ ފަތުރުވެރިކަމުގެ ރަން އަހަރަށް ތައްޔާރުވުމުގެ ގޮތުން ވަރަށް ގިނަ ކަންތައްތައް ރާވައި ކުރިއަށްދާ ކަމަށް ފާހަގަކުރައްވާފައެވެ. އެގޮތުން ރަން އަހަރުގެ ލޯގޯ މިހާރު ލޯންޗު ކުރެވިފައިވާ ކަމަށާއި ވިޔަފާރިއަށް ނޫން ގޮތްގޮތަށް ލޯގޯ ބޭނުންކުރަން ބޭނުންވާ ފަރާތްތަކަށް މިހާރު އެ ފުރުސަތު ހުޅުވާލެވިފައިވާކަމަށް މިނިސްޓަރު ވިދާޅުވިއެވެ. އަދި މި ލޯގޯ ވިޔަފާރިއަށް ބޭނުންކުރަން ބޭނުންވާ ފަރާތްތަކަށް އެފުރުސަތު ވެސް ދޭން ނިންމާފައިވާކަމަށާއި މިނިސްޓްރީއަށް ލޯޔަލްޓީއެއްގެ ގޮތުގައި ދައްކަން ޖެހޭނީ ވިޔަފާރިއަށް އުފައްދާ ތަކެތީގެ ހޯލްސޭލް ޖުމްލަ އަގުގެ ތިން އިންސައްތަ ކަމަށް މިނިސްޓަރު ވަނީ ވިދާޅުވެފައެވެ.
މިނިސްޓަރު ވަނީ 2022 ވަނަ އަހަރުގެ އައު އަހަރުގެ ކައުންޓްޑައުނުން ފެށިގެން ގިނަ ހަރަކާތްތަކެއް ކުރިއަށް ގެންދިއުމަށް ރާވާފައިވާ ކަމަށް ވިދާޅުވެފައެވެ. މި ކައުންޓްޑައުނާއެކު ރަން އަހަރު ފެށިގެންދާނެ ކަމަށާއި އެރޭ ރަނގަޅު ފެންވަރެއްގެ ޝޯއެއް ބޭއްވުމަށް މަސައްކަތްކުރަމުންދާ ކަމަށް މިނިސްޓަރު ވަނީ ވިދާޅުވެފައެވެ. އެގޮތުން މާލެ ސަރަހައްދުގެ އިތުރުން އަތޮޅުތެރޭގައާއި ރިސޯޓް، ސަފާރީ އަދި ޔޮޓުތަކުގެ އިތުރުން ގެސްޓް ހައުސްތަކުގައި އައު އަހަރު ފެށުން ވަރަށް ކުލަ ގަދަކޮށް ފާހަގަކުރުމަށް މަސައްކަތްކުރަމުންދާ ކަމަށް މިނިސްޓަރު މައުސޫމް ވިދާޅުވިއެވެ.
އޭގެ ފަހުން ކޮންމެ ހަފުތާއަކު އަދި ކޮންމެ މަހަކު ފަތުރުވެރިކަމުގެ ރަންޔޫބީލް ފާހަގަކުރުމުގެ ހާއްސަ ހަރަކާތްތައް ކުރިއަށްދެވޭނެ ކަމަށާއި މިހަރަކާތްތަކުގައި ސިނާއަތުގެ ބައިވެރިންނާއި، ފަތުރުވެރިންގެ އިތުރުން ރާއްޖޭގެ ހުރިހާ ރައްޔިތުންނަށް ބައިވެރިވެވޭނެ ކަމަށް މިނިސްޓަރު ވިދާޅުވިއެވެ. އަދި ރަން އަހަރު ފާހަގަކުރުމަށް ކުރެވޭ މަސައްކަތްތަކުގެ ތެރޭގައި އަންނަ އަހަރުގެ ޖުލައި މަހުގެ ފުރަތަމަ ހަފުތާގައި ފަތުރުވެރިކަމުގެ ވަރަށް ހާއްސަ ސަމިޓެއް ބާއްވާނެ ކަމަށް ވިދާޅުވިއެވެ. މިނިސްޓަރު ވިދާޅުވީ މިސަމިޓުގައި ރާއްޖޭގެ އިތުރުން ބައިނަލްއަގުވާމީ ޖަމާއަތްތައް ބައިވެރިވާނެ ކަމަށެވެ. އަދި ވަރަށް ހާއްސަ ޖަލްސާއެއް ވެސް ބޭއްވިގެންދާނެ ކަމަށް މިނިސްޓަރު ވަނީ ވިދާޅުވެފައެވެ.
އޭގެ އިތުރުން އެންވަޔަރަމެންޓް މިނިސްޓްރީން އިސްނަގައިގެން ޓޫރިޒަމް މިނިސްޓްރީއާއެކު ފަތުރުވެރިކަމަށް ހާއްސަ ރެޑިޔުސް، ރީޔޫސް އަދި ރީސައިކަލްގެ ހާއްސަ މައުރަޒެއް ބޭއްވުމަށް ހަމަޖެހިފައިވާ ކަމަށާއި މައުރަޒާ ގުޅޭ އިތުރު ތަފްސީލުތައް ކުރިއަތް އޮތްތާގައި ހިއްސާކުރެވިގެންދާނެ ކަމަށް މިނިސްޓަރު ވިދާޅުވިއެވެ.
އަންނަ އަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ އަހަރު ކަމަށް ވާއިރު، ފަތުރުވެރިކަމުގެ ރަންޔޫބީލް ރަން އަހަރުގެ ގޮތުގައި ފާހަގަކުރުމަށް ޓޫރިޒަމް މިނިސްޓްރީ އާއި ސިނާއަތުގެ ހިއްސާދާރުން ދަނީ ގިނަ މަސައްކަތްތަކެއް ކުރަމުންނެވެ.
