މާލޭގެ ހުޅަނގުފަރާތުގައި އޮންނަ އިންޑަސްޓްރިއަލް ވިލެޖުގެ ބިމަކީ ސިޓީ ކައުންސިލްގެ ބިމެއް ނޫންކަމަށް ޕްލޭނިން މިނިސްޓްރީން ބުނެފިއެވެ.

އިންޑަސްޓްރިއަލް ވިލެޖުން، ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)އަށް ދޫކޮށްފައިވާ ބިމެއް މާލެ ސިޓީ ކައުންސިލުން ހުސްކުރި މައްސަލަ ހޫނުވެފައިވާ ވަގުތެއްގައި ޕްލޭނިން މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ސޮއިކުރައްވައި، މާލެ ސިޓީ ކައުންސިލްގެ މޭޔަރ ޑރ. މުހައްމަދު މުއިއްޒުއަށް ފޮނުވި ސިޓީއެއްގައި ބުނެފައިވަނީ ސްޓެލްކޯގެ ފަރާތުން މާލޭގައި ގާއިމުކުރާ ސަބްސްޓޭޝަންގެ ކޮންސްޓްރަކްޝަން މަސައްކަތަށް ބޭނުންވާ އާލާތްތައް ބެހެއްޓުމަށް، އެ މިނިސްޓްރީން އިންޑަސްޓްރިއަލް ވިލެޖުން ސްޓެލްކޯއަށް ބިން ދޫކޮށްފައިވާކަމަށެވެ. މި ބިމުގައި ޖަހާފައިވާ ފެންސާއި އެތަނުގައި ބަހައްޓާފައިވާ ތަކެތި ސިޓީ ކައުންސިލުން ނަގާފައިވާކަމަށް އެ މިނިސްޓްރީއަށް މައުލޫމާތު ލިބިފައިވާކަމަށް ބުނެފައިވެއެވެ.

މީގެ އިތުރުން ބަހުގެ ޚިދުމަތް ދިނުމަށް ބަސްޑެޕޯގެ ގޮތުގައި ބޭނުންކުރުމަށް އިންޑަސްޓްރިއަލް ވިލެޖުގެ 3 ނަމްބަރު ކޮށިން ވަގުތީގޮތުން ދޫކޮށްފައިވާ ބިން ވެސް މާލެ ސިޓީ ކައުންސިލުން ބަންދުކޮށްފައިވާކަން އެ މިނިސްޓްރީގެ ސަމާލުކަމަށް އައިސްފައިވާކަމަށް ބުނެފައިވެއެވެ.

ޕްލޭނިން މިނިސްޓްރީން ބުނީ އިންޑަސްޓްރިއަލް ވިލެޖުގެ ބިމަކީ މާލޭ ސިޓީ ކައުންސިލާ ހަވާލުކުރެވިފައިވާ ބިމެއް ނޫން ކަމަށެވެ. އަދި ސްޓްލްކޯއަށް ދޫކޮށްފައިވާ ބިމުން ސިޓީ ކައުންސިލަށް ނަގާފައިވާ އެއްވެސް އެއްޗެއް ވާނަމަ އެ އެއްޗެއް ސްޓެލްކޯއާ ހަވާލުކުރުމަށް ވެސް މިނިސްޓްރީން ވަނީ އެދިފައެވެ.

3 ނަންބަރު ކޮށި ބަންދުކޮށްފައިވާނަމަ އެތަން އަލުން ހުޅުވުމަށް ވެސް މިނިސްޓްރީން ވަނީ މާލޭ ސިޓީ ކައުންސިލަށް އަންގާފައެވެ.

މިމައްސަލައާ ގުޅިގެން ސްޓެލްކޯގެ އޮފިޝަލަކު ވިދާޅުވީ އިންޑަސްޓްރިއަލް ވިލެޖުން މޭރީބްރައުން ކުރިމަތިން އެކުންފުންޏަށް ދޫކޮށްފައިވާ 21000 އަކަފޫޓުގެ ބިމަކީ ބެކަޕް ޕަވަރ ޕްލާންޓް އެޅުމަށް ދޫކޮށްފައިވާ ބިމެއް ކަމަށެވެ. މިބިމުގައި ގިނަ ޕްލޭންތަކެއް ކުރެވިފައިވާކަން ފާހަގަކުރައްވައި އޮފިޝަލް ވިދާޅުވީ, ތިލަފުށީގައި 150 މެގަވޮޓުގެ ޕަވަރ ޕްލާންޓެއް ގާއިމްކުރެވިގެންދާއިރު، އެއިން އުފައްދާ ކަރަންޓު މާލެއާ ހަމައަށް ގެނައުމަށް މިބިމުގައި 132 ކޭބީ ސަބްސޭޝަނެއް ހުންނަން ޖެހޭ ކަމަށެވެ.

އެސަބްސޭޓަޝަނާއެކު ތިލަފުށީ ބްރިޖުގެ ކޭބަލް އަޅާގޮތަށް ޑިޒައިން ކުރެވިފައިވާ ކަމަށެވެ. އެގޮތުން ޖޮއިންޓް ވޭވްތަކާއި ހުރިހާ ތަކެތި ޑިޒައިން ކުރެވިފައިވާ ކަމަށެވެ. އޭގެ އިތުރުން މި ބިމުގައި މާލޭގެ މާފަންނު ސަރަހައްދުގެ ގްރިޑް މެއިންޓެއިން ކުރުމަށް ރިނިއުބަލް އެނަރޖީ ބޭނުންކޮށްގެން އުފައްދާ ކަރަންޓު ނުވަތަ ބެޓެރީ ބެކަޕް ސިސްޓަމެއް ގާއިމްކުރުމަށް ޕްލޭން ކުރެވިފައިވާ ކަމަށް އޮފިޝަލް ވިދާޅުވިއެވެ.

އެހެންކަމުން މިތަނަކީ ސްޓެލްކޯއަށާއި މާލޭގެ ގްރިޑް ސްޓެބިލިޓީއަށް ވަރަށް މުހިންމު ބިމެއްގެ ގޮތުގައި އޭނާ ފާހަގަކުރެއްވިއެވެ. އަދި އިންޓަރކަނެކްޝަން ގާއިމްވެގެން އަންނައިރު އެބިމުގައި ސަބްސްޓޭޝަނެއް ބެހެއްޓެން ނެތްކަމަށްވާނަމަ ބޮޑެތި ދަތިތަކާ ކުރިމަތިވާނެ ކަަމަށެވެ.