އެމެރިކާގެ ކުރީގެ ރައީސް ބަރަކް އޮބާމާއަށް 60 އަހަރުފުޅު ފުރިއްޖެއެވެ.

ބީބީސީގައި ރިޕޯޓު ކޮށްފައިވާ ގޮތުން ބުދަ ދުވަހު އޮބާމާއަށް 60 އަހަރުފުޅު ފުރިފައިވާއިރު, ހަފްތާ ބަންދުގައި އުފަންދުވަހުގެ ޚާއްސަ ހަފްލާއެއް ބޭއްވެވުމަށް ކުރިން އޮތީ ރާއްވަވާފައެވެ. އެހެންނަމަވެސް، ކޮވިޑުގެ ޙާލަތު ގޯސްވުމާއި، ޑެލްޓާ ވޭރިއަންޓު ކޮންޓްރޯލެއް ނެތި ފެތުރެމުން ދިއުމުގެ ސަބަބުން އޮބާމާ ވަނީ މި ޙަފްލާއަށް ބަދަލުތަކެއް ގެންނަވާފައެވެ. އެގޮތުން މާރތަރަސް ވިނެޔަރޑްގައި ބޮޑު ޙަފްލާއެއް ބޭއްވުމަށް ކުރިން ރޭއްވެވިނަމަވެސް، މިހާރު ވަނީ ހަމައެކަނި އޮބާމާގެ އާއިލާ ބޭފުޅުންނާއި، އެންމެ އަރިސް މީހުންނަށް އެކަނި ބައިވެރިކުރެއްވުމަށް ނިންމަވާފައެވެ.

ރިޕޯޓުތައް ބުނާގޮތުން ކުރިން މި ޙަފްލާއަށް 100ށް ވުރެ ގިނަ މީހުންނަށް ދައުވަތު ދެއްވިއެވެ. އޭގެ ތެރޭގައި އެކްޓަރ ޖޯޖް ކްލޫނީ، ހޯސްޓް އޯޕްރާ ވިންފްރީ ހިމެނެއެވެ.

ޙަފްލާއަށް ބަދަލުތައް ގެންނެވުމަށް ނިންމެވި މި ނިންމެވުމަކީ އޮބާމާއާއި އަނބިކަނބަލުން މިޝޭލް މަޝްވަރާ ކުރެއްވުމަށްފަހު ނިންމެވި ނިންމެވުމެއްކަމަށް އޮބާމާގެ ތަރުޖަމާނާ ޙަވާލާދީ ބީބީސީގައި ރިޕޯޓު ކޮށްފައިވެއެވެ.

އެމެރިކާގެ ކަޅު ނަސްލުގެ ފުރަތަމަ ރައީސްގެ ގޮތުގައި 2008ވަނަ އަހަރު މަގާމާ ހަވާލު ވަޑައިގެންނެވި، އޮބާމާއަކީ އެމެރިކާގެ 44 ވަނަ ރައީސެވެ.