އިހަވަންދޫ ބަނދަރު ތަރައްގީކުރުން: މަޝްރޫއުގެ 57 އިންސައްތަ މަސައްކަތް ނިމިއްޖެ
4 އޯގަސްޓު 2021 | ބުދަ 01:53ކުރީގެ ބަނދަރުގެ ޕޭވްމަންޓްގެ ކާސްޓިންގް މަސައްކަތްތައް މިހާރު ވަނީ ފަށާފައި
އިހަވަންދޫ ބަނދަރު ތަރައްގީކުރުމުގެ މަސައްކަތުގެ ތެރެއިން
ހއ. އިހަވަންދޫ ބަނދަރު ތަރައްގީކުރުމުގެ މަޝްރޫއުގެ މަސައްކަތުގެ 57 އިންސައްތަ މަސައްކަތް ނިންމާލައިފިއެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ން ބުނީ އިހަވަންދޫ ބަނދަރު ތަރައްގީކުރުމުގެ މަޝްރޫއުގެ މަސައްކަތް ބާރު ސްޕީޑްފގައި ކުރިއަށްދާ ކަމަށެވެ. އަދި މަޝްރޫއުގެ 57 އިންސައްތަ މަސައްކަތް ނިމިފައިވާ ކަމަށް އެމްޓީސީސީން ބުނެއެވެ.
އެމްޓީސީސީން ބުނީ މި މަޝްރޫއުގެ ދަށުން، ކުރީގެ ބަނދަރުގެ ޕޭވްމަންޓްގެ ކާސްޓިންގް މަސައްކަތްތައް 2 އޯގަސްޓު ވީ ހޯމަ ދުވަހު ފެށިފައިވާ ކަމަށެވެ.
އިހަވަންދޫ ބަނދަރާ ބެހޭ ގޮތުން މީގެ ކުރިން އެމްޓީސީސީގެ ސީއީއޯ އާދަމް އާޒިމް ވިދާޅުވީ ބަނދަރު ބޮޑުކުރުމުގެ މަސައްކަތް ކުރިއަށް އޮތް ދެ މަސް ތެރޭގައި ނިމޭނެ ކަމަށެވެ. އަދި ވިދާޅުވީ، ބަނދަރުގެ މަސައްކަތް ކުރިއަށްދަނީ ރަށުގެ ކައުންސިލާއި ރައްޔިތުންނާ މަޝްވަރާ ކުރެއްވުމަށްފަހު ރައްޔިތުން ބޭނުންވާ ބަދަލުތައް ވެސް ހިމަނައިގެން ކަމަށެވެ.
މި މަޝްރޫއުގެ ދަށުން ކުރާ މަސައްކަތްތަކުގެ ތެރޭގައި 284 މީޓަރު ބޭރުތޮށި ހެދުމާއި، 178 މީޓަރު ރިވެޓްމަންޓް ޖެހުމާއި، 120 މީޓަރު ގްރޯއިން ޖެހުމާއި، 95 މީޓަރު އެއްގަމު ތޮށި ހެދުމާއި، ޕޭވްމަންޓް ހެދުމާއި، 2 ނެރު ބައްތި ޖެހުމާއި، ބަނދަރުގައި 27 ބައްތި ޖެހުމާއި، ރޭމްޕެއް ހެދުމާއި 2 މޫރިންގ ބްލޮކްސް ބެހެއްޓުމުގެ އިތުރުން އެއްގަމު ތޮށިން ބޭރުތޮއްޓަށް އެރުމަށް ވޯކްވޭއެއް ހެދުން ހިމެނެއެވެ.
51.7 މިލިއަން ރުފިޔާ ޚަރަދުކޮށްގެން ކުރިއަށްގެންދާ މި މަޝްރޫއަކީ 400 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫއެކެވެ.
މީގެ އިތުރުން އިހަވަންދޫގެ ބިން ހިއްކުމުގެ މަސައްކަތް ފެށުމަށް ވެސް މިހާރު އަންނަނީ ތައްޔާރުވަމުންނެވެ.
އިހަވަންދޫގައި މައިގަނޑު ގޮތެއްގައި ކުރަމުން އަންނަނީ މަަސްވެރިކަމެވެ. އިހަވަންދޫ އަކީ ތިންހާހަށްވުރެ ގިނަ މީހުންގެ އާބާދީއެއް އޮންނަ ރަށެކެވެ.
