އޮމާނަށް ހަމަލާދިން ކަމަށް އިސްރާއީލުން ކުރާ ތުހުމަތު އީރާނުން ދޮގުކޮށްފި
2 އޯގަސްޓު 2021 | ހޯމަ 11:23މަސީރާގައި ދަތުރުކުރަމުންދިޔަ ލައިބީރިއާގެ ދިދަ ޖެހި، އިސްރާއީލުގެ ބިލިއަނަރ އެޔަލް އޮފާގެ މާސާރ ސްޓްރީޓްސްގެ ތެޔޮ ޓޭންކަރަކަށް ޑްރޯން ހަމަލާއެއް ވަނީ އަރާފައި
ޑްރޯން ރޮކެޓް ހަމަލާ އަރާފައިވަނީ އޮމާންގެ އިރު އުތުރުގެ ރަށެއްކަމަށްވާ މަސީރާގައި ދަތުރުކުރަމުންދިޔަ ތެޔޮ ޓޭންކަރަކަށް
އޮމާނަށް ހަމަލާ ދިންކަމަށް އިސްރާއީލުން ކުރާ ތުހުމަތު އީރާނުން ދޮގުކޮށްފިއެވެ.
އޮމާންގެ އިރު އުތުރުގެ ރަށެއްކަމަށްވާ މަސީރާގައި ދަތުރުކުރަމުންދިޔަ (ލައިބީރިއާގެ ދިދަ ޖެހި) އިސްރާއީލުގެ ބިލިއަނަރ, އެޔަލް އޮފާގެ މާސާރ ސްޓްރީޓްސްގެ ތެޔޮ ޓޭންކަރަކަށް ޑްރޯން ރޮކެޓް ހަމަލާއެއް ވަނީ އަރާފައެވެ. މި ހަމަލާގައި ރުމޭނިއާގެ ރައްޔިތަކާއި އިނގިރޭސިވިލާތައް ނިސްބަތްވާ ރައްޔިތެއް ވަނީ މަރުވެފައެވެ. މިކަމުގެ ޒިންމާ އިސްރާއީލުން އެންމެ ފުރަތަމަވެސް އެޅުވީ އެ ޤައުމުގެ އެންމެ ހަތުރުވެރި އީރާނުގެ ބޮލުގައެވެ. އިސްރާއީލަށްފަހު އެ ޤައުމަށް ވާގިވެރިވާ ހުޅަނގުގެ ބާރުތައްކަމަށްވާ އެމެރިކާއާއި، އިނގިރޭސިވިލާތުންވެސް ވަނީ މިކަމުގެ ޒިންމާ އީރާނުން ނަގަންޖެހޭނެކަމަށް ބުނެފައެވެ.
މި ހާދިސާ ހިނގާފައި މިވަނީ އޮމާން ކަނޑުގެ ސަރަހައްދުގައި ދަތުރުކުރަމުންދިޔަ އެ ޤައުމުގެ ކަނޑު ބޯޓަކަށް މި ދިޔަ ހަފުތާގެ ތެރޭގައި ހަމަލާއެއްދީ, ބޯޓުގެ 2 ފަޅުވެރިން މަރުވެފައިވާ ދަނޑިވަޅެއްގައެވެ. މި ދެ ހަމަލާ މިހާ ގަތްގާތުގައި ދިނުމުން އޮމާންގެ ރައްކާތެރިކަން ގެއްލި ބިރުވެރިކަން އުފެއްދުމަށް މަސައްކަތްކުރަމުންދާކަމަށް އިސްރާއީލާއި ހުޅަނގުގެ ބާރުތަކުން ވަނީ ބުނެފައެވެ. އިސްރާއީލުގެ ބިލިއަނަރ, އެޔަލް އޮފާގެ މާސާރ ސްޓްރީޓްސްގެ މި ތެޔޮ ޓޭންކަރަށް ޑްރޯން ހަމަލާ އެރިތާ މާ ގިނަ އިރުތަކެއް ނުވަނީސް އެމެރިކާގެ ކަނޑުމަތީ ސިފައިން ވަނީ އެ ޤައުމުގެ ބާރު ހިނގާ ސަރަހައްދަކަށް މި ޓޭންކަރާއި އޭގައި ތިބި މީހުން ގެންގޮސްފައެވެ.
މިކަމާގުޅިގެން އިސްރާއީލުގެ ބޮޑު ވަޒީރު ނަފްޓަލީ ބެނެޓް ވަނީ (އެއްވެސް ހެތްކެއް ނެތި) މިކަމުގެ ޒިންމާ އީރާނުގެ ބޮލުގައި އަޅުވައި، މިކަމުގެ އިންޓެލިޖެންސް މައުލޫމާތު ހުރިކަމަށް ވިދާޅުވެފައެވެ. އިސްރާއީލުގެ ބޮޑު ވަޒީރު ވަނީ, އީރާނުން ކުރިކަމަށް ތުހުމަތުކުރައްވާ މި އަމަލަކީ އެ ޤައުމުން ކުރި ބޮޑު ކުށެއްކަމަށް ބައިނަލްއަޤްވާމީ މުޖުތަމަޢުން ވަޒަންކޮށްދީ, ޖަވާބުދާރީ ކުރުވަންޖެހޭނެކަމަށް ވަރަށް ހަރުކަށިކަމާއެކު ވިދާޅުވިއެވެ.
މި މައްސަލައާއި ގުޅޭގޮތުން އެމެރިކާގެ ސްޓޭޓް ސެކެޓްރީ އެންތަނީ ބްލިންކަން, އަދި އިނގިރޭސިވިލާތުގެ ފޮރިން ސެކެޓްރީ ޑޮމިނިކް ރާބްވެސް ވަނީ މި ހަމަލާއަކީ އީރާނުން ދިން ހަމަލާއެއްކަމަށް ވިދާޅުވެފައެވެ.
އިރާން ސަރުކާރުގެ ތަރުޖަމާނު ސަޢީދު ކަތިބްޒަޑޭ ބޭއްވެވި ވަރޗުއަލް ނޫސްވެރިންގެ ބައްދަލުވުމެއްގައި ވާހަކަދައްކަވަމުން އޭނާވަނީ މި ޤައުމުތަކުގެ ތުހުމަތުތައް ދޮގުކޮށްފައެވެ. އަދި އިސްރާއީލުގެ ލާއިންސާނީ ބާރު ގަދަވެގެންދާ ކޮންމެ ތަނަކުވެސް ފެނިގެންދާނީ ހަނަފަސްކަމާއި، ބިރުވެރިކަން އަދި ހަމަނުޖެހުމުގެ އަމަލުތައްކަމަށް އޭނާ ވިދާޅުވިއެވެ.
މިކަން ފަލަސްތީނުން ފެނި, އަޅާނުލާ އެތައް ޤައުމެއް ތިބި އިރު، މިއަދު އޮމާންގައި އިސްރާއީލުގެ ބަސް ވިކެންފެށުމުން އެ ޤައުމަށްވެސް އަތްގަދަކޮށް ފަނާކުރަނިވި އަމަލުތައް ހިންގަމުންދާކަމުގެ ތުހުމަތު އީރާން ސަރުކާރުގެ ތަރުޖަމާނު ކުރެއްވިއެވެ. މިގޮތަށް ބަހުގެ ހަމަލާތައް އަމާޒުކޮށް ތުހުމަތުތައް ކުރުމަކީ އީރާނުގެ ތަޞައްވުރު ބައިނަލްއަޤުވާމީ މުޖުތަމަޢުގައި ކިލަނބުކުރުމަށް ކުރާ އަމަލެއްކަމަށް ސިފަކުރައްވައި, އޭނާ ވަނީ ޤައުމުގެ ސަލާމަތާއި ރައްކާތެރިކަމަށް ކުރަންޖެހުނު ކޮންމެ ކަމެއް ކުރުމުގައި ފަސްނުޖެހޭނެކަމަށް ވިދާޅުވެފައެވެ.
އީރާނާއި އިސްރާއީލަކީ މެދުއިރުމަތީގެ އެންމެ ނުފޫޒު ގަދަ ދެ ޤައުމުކަމުގައިވާއިރު، ދެ ޤައުމުގެ ދެމެދުގައި ވަނީ ގިނަ މައްސަލަތަކެއް އުފެދިފައެވެ. އެގޮތުން އީރާންގެ ނިއުކްލިއަރ ޑީލްގެ މައްސަލައާއި، ފަލަސްތީންގެ މުސްލިމުންނަށް އިސްރާއީލުން އަމަލުކުރަމުންދާ ލާއިންސާ ގޮތްތައް އެންމެ ބޮޑަށް ކުށްވެރިކުރާ ޤައުމަކީ އީރާނެވެ.
