ޕީއެސްޖީ ބަލިކޮށް ފްރެންޗް ސުޕަ ކަޕް ލިލްއަށް

ވަރުގަދަ ޕީއެސްޖީ ބަލިކޮށް ލިލްއިން ފްރެންޗް ސުޕަ ކަޕް ކާމިޔާބުކޮށްފިއެވެ.

މިދިޔަ ސީޒަނުގެ ފްރެންޗް ލީގު ޗެމްޕިއަނުން ކަމަށްވާ ލިލްއިން ފްރެންޗް ސުޕަ ކަޕް ކާމިޔާބުކުރީ އާދީއްތަ ދުވަހުގެރޭ ކުޅުނު މެޗުގައި ފްރެންޗް ކަޕުގެ އެންމެ ފަހުގެ ޗެމްޕިއަނުން ކަމަށްވާ ޕީއެސްޖީ އަތުން 1-0 ގެ ނަތީޖާއަކުންނެވެ. މިއީ މިދިޔަ އަށް އަހަރު ތެރޭ ޕީއެސްޖީއަށް ފްރެންޗް ސުޕަ ކަޕް ގެއްލުނު ފުރަތަމަ ފަހަރެވެ.

އިސްރާއީލުގެ ސިޓީއެއް ކަމަށްވާ ތެލް އަވީވުގައި ހުންނަ ބްލޫމްފީލްޑް ސްޓޭޑިއަމުގައި މި މެޗު ކުޅުނުއިރު، މި މެޗުގައި ޕީއެސްޖީން އެ ޓީމަށް ކުޅެމުން އަންނަ މަޝްހޫރު ގިނަ ކުޅުންތެރިން ބެނުންކޮށްފައެއް ނުވެއެވެ. އެގޮތުން ޕީއެސްޖީގެ ސްކޮޑުގައި ބްރެޒިލުގެ ތަރި ނޭމާ އާއި، ފްރާންސްގެ ޒުވާން ފޯވާޑް ކީލިއަން އެމްބާޕޭ އަދި މި ޓްރާންސްފާ ބާޒާރުގައި ޕީއެސްޖީއާ އަލަށް ގުޅުނު ސްޕެއިނުގެ ތަޖުރިބާކާރު ޑިފެންޑަރު ސާޖިއޯ ރާމޯސް ހިމަނާފައެއް ނުވެއެވެ. އެކަމަކު މި މެޗުގައި ޕީއެސްޖީން ވަނީ އެ ޓީމާ އަލަށް ގުޅުނު ނެދަލެންޑްސްގެ މިޑްފީލްޑަރު ޖިއޮޖީނިއޯ ވައިނަލްޑަމް އާއި މޮރޮކޯގެ ޑިފެންޑަރު އަޝްރަފް ހަކީމީ ކުޅެން އަރުވާފައެވެ.

ފޯރިގަދަ ކުޅުމެއް ފެނިގެންދިޔަ މި މެޗުގައި ފެނިގެންދިޔަ ހަމައެކަނި ލަނޑު ލިލްއިން ކާމިޔާބުކޮށްފައިވަނީ ފުރަތަމަ ހާފުގެ ފަހު މިނެޓުގައެވެ. ބުރަކް ޔިލްމާޒްގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ ޕޯޗުގަލުގެ މިޑްފީލްޑަރު ޒެކާއެވެ.

މި މެޗުން މޮޅުވެ ލިލްއިން އެ ޓީމުގެ ތާރިޚުގައި ފުރަތަމަ ފަހަރަށް ފްރެންޗް ސުޕަ ކަޕް ކާމިޔާބުކުރިއިރު، އެ ޓީމުން ވަނީ 10 އަހަރަށްފަހު މިދިޔަ ސީޒަނުގެ ފްރެންޗް ލީގުވެސް ކާމިޔާބުކޮށްފައެވެ. ލިލްއިން ފްރެންޗް ސުޕަ ކަޕް ކާމިޔާބުކުރިއިރު، މިދިޔަ ސީޒަނުގެ ލީގުގެ ޗެމްޕިއަންކަން ލިލްއަށް ހޯދައިދިންތާ ދެ ދުވަސް ފަހުން އެ ޓީމުގެ ކޯޗުކަން ކްރިސްޓޮފް ގަލްޓިއޭ ވަނީ ދޫކޮށްލާފައެވެ. އެއާއެކު މިދިޔަ ޖުލައި މަހު ލިލްއިން ވަނީ އެ ޓީމުގެ ކޯޗަކަށް ޖޮސޮލެން ގޯނޮވެކް ހަމަޖައްސާފައެވެ. އެހެންކަމުން މިއީ ލިލްއާއެކު ގޯނޮވެކުގެ ފުރަތަމަ ކާމިޔާބީއެވެ.