ޔުވެންޓަސްގެ ކޯޗުގެ މަގާމާ އަލުން ހަވާލުވާން ނިންމީ ރެއާލް މެޑްރިޑަށް ނޫނެކޭ ބުނުމަށްފަހު ކަމަށް މަސިމިލިއާނޯ އެލެގްރީ ބުނެފިއެވެ.
ޔުވެންޓަސްއިން ވަނީ މިދިޔަ އަހަރުގެ އޮގަސްޓް މަހު އެ ޓީމުގެ ކޯޗުގެ މަގާމާ ހަވާލުވި އަންދްރެއާ ޕިރްލޯ ވަކިކޮށް، އަންނަ ސީޒަނަށް އެ ޓީމުގެ ކޯޗަކަށް އުމުރުން 53 އަހަރުގެ އެލެގްރީ އަލުން ހަމަޖައްސާފައެވެ. އެއް ސީޒަނަށް ފަހު ޔުވެންޓަސްގެ ކޯޗުގެ މަގާމުން ޕިރްލޯ ވަކިކުރީ މި ފަހަރު އެ ޓީމަށް ނުވަ އަހަރަށް ފަހު އިޓާލިއަން ލީގު ގެއްލުމުގެ އިތުރުން، އެ ޓީމުގެ ކުޅުން ވަރަށް ބޮޑަށް ދަށްވުމާ ގުޅިގެންނެވެ.
އެއާއެކު މިދިޔަ މެއި މަހުގެ ތެރޭގައި އެލެގްރީ އަލުން ޔުވެންޓަސްއާ ހަވާލުވިއިރު، ރިޕޯޓުތައް ބުނާ ގޮތުން އޭނާ ވަނީ ޔުވެންޓަސްއާއެކު 2025 ވަނަ އަހަރުގެ ނިޔަލަށް އެއްބަސްވުން ހަދާފައެވެ. މީގެ ކުރިން އެލެގްރީ ޔުވެންޓަސް ދޫކޮށްލީ އެ ޓީމަށް އިޓާލިއަން ލީގު ފަސް ފަހަރު ކާމިޔާބުކޮށްދިނުމަށްފަހު، 2018-2019 ވަނަ އަހަރުގެ ސީޒަން ނިމުމުންނެވެ. އޭގެ ފަހުން އެލެގްރީ ޓީމަކާ ހަވާލުވެފައި ނުވާއިރު، އޭނާ ހޯދަން ރެއާލުން ވަނީ މަސައްކަތް ކޮށްފައެވެ.
މި ސީޒަނަށްފަހު ރެއާލުގެ ކޯޗުގެ މަގާމުން ޒިނެދިން ޒިދާން ވަކިވުމުން، އެ ޓީމުގެ ކޯޗަކަށް ހަމަޖައްސާފައިވަނީ އިޓަލީގެ ތަޖުރިބާކާރު ކޯޗު ކާލޯ އަންޗެލޮޓީއެވެ. ދާދި ފަހުން ދިން އިންޓަވިއުއެއްގައި އެލެގްރީ ބުނީ މީގެ ކުރިން ރެއާލުން އޭނާ ހޯދުމަށް މަސައްކަތް ކުރި ކަމަށާއި، އެކަމަށް ރެއާލުގެ ރައީސަށް ޝުކުރުއަދާކުރާ ކަމަށެވެ. އެކަމަކު ރެއާލުގެ ބަދަލުގައި ޔުވެންޓަސް އިޚުތިޔާރުކުރީ އެ ކުލަބަށް އޮތް ލޯތްބެއްގެ ބޮޑުކަމުން ކަމަށްވެސް ވަނީ ބުނެފައެވެ.
އެލެގްރީ ބުނީ ޔުވެންޓަސްގައި މިހާރު އޮތީ ވަރަށް ވަރުގަދަ ސްކޮޑެއް ކަމަށާއި، މިއީ މާޒީ ހަނދާނުން ފުހެލުމަށްފަހު އިތުރު ކާމިޔާބީތަކެއް ހޯދުމަށް ފޯކަސް ކުރަންވީ ދަނޑިވަޅު ކަމަށެވެ. އަދި މިހާރު އޮތް ސްކޮޑާއެކު ބޭނުންވާ ކާމިޔާބީތައް ހޯދޭނެކަމުގެ ފުރިހަމަ ޔަގީންކަން އެބައޮތް ކަމަށްވެސް ބުންޏެވެ.
އެލެގްރީ އަލުން ޔުވެންޓަސްއާ ހަވާލުވިއިރު، މީގެ ކުރިން އޭސީ މިލާނަށް 2011 ވަނަ އަހަރު އިޓާލިއަން ލީގު ކާމިޔާބުކޮށްދީގެން ގިނަ ބަޔެއްގެ ސަމާލުކަން ހޯދި އެލެގްރީ ވަނީ މިލާނުގައި ހަތަރު ސީޒަން ހޭދަކޮށްފައެވެ. އަދި އޭގެ ފަހުން ޔުވެންޓަސްއަށް ބަދަލުވެ އެ ޓީމުގައި ފަސް ސީޒަން އެލެގްރީ ހޭދަކުރިއިރު، މި މުއްދަތުގައި އޭނާ ވަނީ އެ ޓީމަށް އިޓާލިއަން ލީގު ފަސް ސީޒަނުގައިވެސް ހޯދައިދީފައެވެ. އަދި އޭގެ އިތުރަށް އޭނާ ވަނީ ޔުވެންޓަސްއަށް އިޓާލިއަން ކަޕް ހަތަރު ފަހަރު އަދި އިޓާލިއަން ސުޕަ ކަޕް ދެ ފަހަރު ކާމިޔާބުކޮށްދީފައެވެ.
