ބޭރުން އަންނަ ޓީޗަރުން ކަރަންޓީން ވާން އަންގައިފި
28 ޖުލައި 2021 | ބުދަ 14:14ޓީޗަރުން ސްކޫލަށް ނިކުތުމުގެ ކުރިން 5 ދުވަހަށް ކަރަންޓީންވާންޖެހޭ
ތިން މަހަށްވުރެ ގިނަ ދުވަހަށްފަހު ސްކޫލްތައް ހުޅުވާލުން
ރާއްޖެއިން ބޭރުން އަންނަ ޓީޗަރުން ސްކޫލަށް ނިކުތުމުގެ ކުރިން 5 ދުވަހުގެ ކަރަންޓީން މުއްދަތެއް ފުރިހަމަކުރުމަށް އެޑިއުކޭޝަން މިނިސްޓްރީން ސްކޫލްތަކަށް އަންގައިފިއެވެ.
ހެލްތް ޕްރޮޓެކްޝަން އެޖެންސީން އެކުލަވަލާފައިވާ "ރާއްޖެއިން ބޭރުން އަންނަ މީހުން ކަރަންޓީންވުމުގެ" އުސޫލަށް މިހާރު ވަނީ ވަރަށް ބޮޑު ބަދަލެއް ގެނެސްފައެވެ. އެގޮތުން ކޮވިޑް-19ގެ ވެކްސިން ފުރިހަމަކޮށްފައިވާ މީހުންނާއި، ކޮވިޑް-19 ޖެހި ބަލިން ރަނގަޅުވިތާ 60 ދުވަސް ނުވާ މީހުން ރާއްޖެއިން ބޭރުން އައިސް ކަރަންޓީން ވާކަށް ނުޖެހެއެވެ.
މިގޮތަށް އެޗްޕީއޭގެ އުސޫލު ބަދަލުކޮށްފައިވީނަމަވެސް އެޑިއުކޭޝަން މިނިސްޓްރީން ވަނީ ރާއްޖެއިން ބޭރުން އަންނަ ޓީޗަރުން ރާއްޖެ އައިސް، ސްކޫލަށް ނިކުތުމުގެ ކުރިން 5 ދުވަހުގެ ކަރަންޓީނުގެ މުއްދަތެއް ފުރިހަމަކުރަންޖެހޭނެކަމަށް ބުނެފައެވެ. މިފަދައިން ބުނެ އެޑިއުކޭޝަން މިނިސްޓްރީން ވަނީ ސްކޫލްތަކަށް ސިޓީއެއް ވެސް ފޮނުވާފައެވެ.
ޓީޗަރުން ރާއްޖެ އައިސް ކަރަންޓީނުގައި ތިބޭނީ އެމީހުން ދިރިއުޅޭ ތަންތަނުގައި ކަމަށާއި، ކަރަންޓީނުގައި ތިބޭތާ 5 ދުވަސް ފަހުން ކަރަންޓީން ރިލީޒް ސާމްޕަލެއް ނަގާނެ ކަމަށް އެޑިއުކޭޝަން މިނިސްޓްރީން ބުނެފައިވެއެވެ. އެމީހުންނަށް ބޭރަށް ނިކުމެވޭނީ ޕީސީއާރް ނެގެޓިވް ނަތީޖާއާއެކު ކަމަށް މިނިސްޓްރީން ވަނީ ބުނެފައެވެ.
އެޑިއުކޭޝަން މިނިސްޓްރީން މިފަދައިން ސްކޫލްތަކަށް އަންގާފައިވަނީ ކޮވިޑް-19ގެ ހާލަތުގައި ސްކޫލްތަކުގެ ކިޔެވުން އަނެއްކާވެސް ފަށާއިރު ދަރިވަރުންގެ ރައްކާތެރިކަން ކަށަވަރުކުރުމަށް ކަމަށް މިނިސްޓްރީން ބުނެފައިވެއެވެ.
ރާއްޖެއިން ބޭރުން އަންނަ ޓީޗަރުން ސްކޫލަށް ނިކުތުމުގެ ކުރިން 5 ދުވަހުގެ ކަރަންޓީން މުއްދަތެއް ފުރިހަމަކުރުމާ ގުޅޭގޮތުން އެޑިއުކޭޝަން މިނިސްޓްރީން ސްކޫލްތަކަށް ފޮނުވި ސިޓީގައި ވަނީ، މި ނިންމުން ނިންމާފައިވަނީ އެޗްޕީއޭއާ މަޝްވަރާކުރުމަށްފަހުގައި ކަމަށެވެ. އަދި މިގޮތަށް ރާއްޖެއިން ބޭރުން އަންނަ ޓީޗަރުންގެ ކަންކަން ގާތުން ބެލުމަށްވެސް މިނިސްޓްރީން ވަނީ ސްކޫލްތަކަށް އަންގާފައެވެ.
