ހަރުކަށި ފިކުރާ ދެކޮޅަށް ޑރ. ޝަހީމް ދެއްކެވި ވާހަކަ ރައީސް ނަޝީދު ހިއްސާ ކުރައްވައިފި
28 ޖުލައި 2021 | ބުދަ 08:39ޝަހީމް ވިދާޅުވީ ހަރުކަށި ފިކުރު ނައްތާލެވޭނީ ހަރުކަށި ފިކުރަކީ ކޮަބައިކަން ބުނެދީގެން ކަމަށް
ޑރ. މުހައްމަދު ޝަހީމް އަލީ ސައީދު ވިދާޅުވެ ލިޔުއްވި ކޮލަމް ކުރީގެ ރައީސް، ރައީސް މުހައްމަދު ނަޝީދު ވަނީ ޓްވިޓަރގައި ހިއްސާ ކުރައްވާފައި
ހަރުކަށި ފިކުރުން ގައުމު ސަލާމަތްކުރުމަށްޓަކައި އިސްތިރާތީޖީ ގޮތުން މަސައްކަތް ކުރަން ޖެހޭ ކަމަށާއި މި ފަދަ މަސައްކަތެއްގައި ގައުމުގެ އެއްވެސް މުއައްސަސާއަކުން އެހީތެރިކަމެއް ބޭނުންވާ ނަމަ އެހީތެރިކަން ދެއްވާނެ ކަމަށް ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެ ލިޔުއްވި ކޮލަމް ކުރީގެ ރައީސް، ރައީސް މުހައްމަދު ނަޝީދު ޓްވިޓަރގައި ހިއްސާ ކުރައްވައިފިއެވެ.
ޑރ. ޝަހީމް ވަނީ ހަރުކަށި ފިކުރުން ގައުމު ސަލާމަތްކުރުމަށް އިސްތިރާތީޖީ ގޮތުން މަސައްކަތްކުރުމާ ގުޅޭ ގޮތުން އޭނާގެ ވެބްސައިޓުގައި ލިޔުއްވުމެއް ޝާއިއުކުރައްވާފައެވެ. މި ލިޔުއްވުމުގައި ޝަހީމް ވިދާޅުވީ ހަރުކަށި ފިކުރު ނައްތާލެވޭނީ ހަރުކަށި ފިކުރަކީ ކޮަބައިކަން ބުނެދީ، އިސްލާމީ ފިގުހީ އުސޫލުތަކާއި ޝަރުއީ އިސްތިލާހުތަކާމެދު އެފިކުރުގެ އަހުލުވެރިން ގެންގުޅޭ ނުބައި މަފްހޫމްތަކުގެ ހަގީގަތް ރަނގަޅަށް ކިޔާދީ ޒުވާނުންނާއި މުޅި މުޖުތަމައު ހޭލުންތެރި ކޮށްގެންކަމަށެވެ.
އަދި ހަރުކަށި ފިކުރުން ގައުމު ސަލާމަތްކުރުމަށްޓަކައި މިހާރުގެ ހާލަތު ދެނެގަނެ އިސްލާމީ ފަލްސަފާގެ އަލީގައި ހަރުދަނާ އިސްތިރާތީޖީ ޕްލޭނެއް އެކުލަވާލައިގެން މުސްތަގުބަލަށްޓަކައި މަސައްކަތްކުރުމަކީ ވަރަށް މުހިންމު ކަމެއް ކަމުގައި ޑރ. ޝަހީމް ވިދާޅުވިއެވެ.
މީގެ އިތުރުން ދިގުދެމިގެންވާ ހައްލެއް ބޭނުން ނަމަ އެކަމަށް ސީދާ އަމާޒުކޮށްގެން އިލްމީ ގޮތުންނާއި ފިކުރީ ގޮތުން ގިނަ މަސައްކަތްތަކެއް ކުރަންޖެހޭ ކަމަށާއި، ގައުމީ މި ފަދަ މަސައްކަތެއްގައި ގައުމުގެ އެއްވެސް މުއައްސަސާއަކުން އެހީތެރިކަމެއް ބޭނުންވާ ނަމަ އިލްމީ ގޮތުން ދެވެން އޮތް އެންމެހައި އެހީތެރިކަމެއް ވެދިނުމަކީ ލިބޭނެ އުފަލެއް ކަމަށް ވިދާޅުވެފައިވެއެވެ.
އިދިކޮޅު ޕްރޮގްރެސިވް ކޯލިޝަންގެ އެޑްވައިޒަރުގެ މަގާމުގައި ހުންނެވި ޑރ. ޝަހީމްގެ މި ލިޔުއްވުން ރައީސް ނަޝީދު ހިއްސާ ކުރައްވާފައިވާއިރު މިވަގުތު ގައުމަށާއި ޕާޓީއަށް އެންމެ ރަނގަޅު ގޮތަކީ އެމްޑީޕީ ޕީޕީއެމް އިއްތިހާދެއް ކަމަށް އެމަނިކުފާނު ވަނީ ވިދާޅުވެފައެވެ. އެގޮތުން ކުރިއަށް ދެވެން އޮތީ ޕީޕީއެމް ފަދަ މެދުމިނުގެ ފިކުރަށް ތާއީދުކުރާ ބަޔަކާއެކުގައި ކަމަށްވަނީ ވިދާޅުވެފައެވެ. އަދި މިއީ ހަރުކަށި ފިކުރާ ދެކޮޅަށް ކުރައްވާ މަސައްކަތެއްގެ ގޮތުގައިވަނީ ސިފަ ކުރައްވާފައެވެ.
އެމަނިކުފާނުގެ ވިސްނުންފުޅު ހުރީ ރާއްޖޭގެ ވެރިކަމުގެ ނިޒާމު ބަދަލުކޮށް ބޮޑު ވަޒީރުކަން ކުރައްވަން ކަމަށް ގެންދަވަނީ ވިދާޅުވަމުންނެވެ. އަދި ނިޒާމު ބަދަލުކުރުމުގައި އިދިކޮޅު ކޯލިޝަނުން ބައިއަތު ހިފާނެކަމަށް ވެސް ތަކުރާރުކޮށް ގެންދަވަނީ ވިދާޅުވަމުންނެވެ.
މިކަމާ ގުޅިގެން އެ ކޯލިޝަންގެ މެންބަރު އަދި ނައިފަރު ދާއިރާގެ ޕީޕީއެމް މެމްބަރ އަހުމަދު ޝިޔާމް ވިދާޅުވީ ކުރީގެ ރައީސް އަބްދުﷲ ޔާމީނާއި ކުރީގެ ރައީސް ނަޝީދުގެ ސިޔާސަތުތައް އުޑާއި ބިމާހާ ތަފާތު ކަމަށެވެ. އަދި ރައީސް ޔާމީން މިނިވަން ކުރުމުގެ ޑީލެއް ދުވަހަކުވެސް އެމްޑީޕީ ނުވަތަ ރައީސް ނަޝީދާއެކު ނުހައްދަވާނެ ކަމަށާއި ރައީސް ޔާމީން މިނިވަންކުރަން ޑީލެއް ހައްދަވަން ނުޖެހޭ ކަމަށް ވެސް ޝިޔާމް ވިދާޅުވިއެވެ.
ދެ ލީޑަރުން އެކައްޗެއް ކިޔައިފިނަމަ ރައްޔިތުން ސިޔާސީ ލީޑަރުންނަށް ކުރާނެ އިތުބާރު ނޯންނާނެ ކަމަށާއި ރައްޔިތުން އިހްތިޔާރު ކުރަނީ ސިޔާސަތުތަކާއި ފިކުރުތައް ކަމަށް ވެސް ޝިޔާމް ވިދާޅުވިއެވެ. ރައީސް ނަޝީދާއި ރައީސް ޔާމީންގެ ސިޔާސަތުތަކަކީ މުޅިން ތަފާތު ދެ ސިޔާސަތުތައް ކަމަށް ވިދާޅުވި ވާހަކަ ޝިޔާމް ވަނީ ތަކުރާރު ކުރައްވާފައެވެ.
