އިތުރު 249 މީހުން ވެކްސިންގެ ދެ ޑޯޒް ފުރިހަމަކޮށްފިއެވެ.

އެޗްޕީއޭ އިން އާންމުކޮށްފައިވާ މައުލޫމާތުތައް ދައްކާގޮތުން ޖުލައި 26 ވަނަ ދުވަހު 249 މީހުން ވަނީ ވެކްސިންގެ ދެ ޑޯޒް ޖަހާފައެވެ. އެއީ މާލެ ސަރަހައްދުން ވެކްސިން ޖެހި 12 މީހުންނާއި އަތޮޅުތެރެއިން ވެކްސިން ޖެހި 237 މީހުންނެވެ. މިއާއެކު ވެކްސިންގެ ދެ ޑޯޒް ފުރިހަމަކުރި މީހުންގެ އަދަދުވަނީ 261،605ށް އަރާފައެވެ. މާލެ ސަރަހައްދުން ވެކްސިން ޖެހި މީހުންގެ އަދަދު ދަށްވެފައި ވަނީ އީދު ބަންދާއި ޖުލައި 26 ބަންދާ ދިމާކޮށް މާލެ ސަރަހައްދުގައި ވެކްސިން ޖެހުން މެދުކަނޑާލުމާ ގުޅިގެންނެވެ. މިދުވަސްކޮޅު މާލެ ސަރަހައްދުގައި ވެކްސިން ޖަހަނީ ހަމައެކަނީ އިމަރޖެންސީ ހާލަތްތަކުގައެވެ.

އެޗްޕީއޭއިން އާންމުކޮށްފައިވާ މައުލޫމާތުތައް ދައްކާގޮތުން ޖުލައި 26 ވަނަ ދުވަހު ވެކްސިންގެ ފުރަތަމަ ޑޯޒް ޖަހާފައި ވަނީ 58 މީހުންނެވެ. އެއީ މާލެ ސަރަހައްދުން ވެކްސިން ޖެހި 2 މީހުންނާއި އަތޮޅުތެރެއިން ވެކްސިން ޖެހި 56 މީހުންނެވެ. މިއާއެކު ވެކްސިންގެ ފުރަތަމަ ޑޯޒް ޖެހި މީހުންގެ ޖުމުލަ އަދަދު ވަނީ 321،429ށް އަރާފައެވެ.

އަންނަ ބުދަ ދުވަހުން ފެށިގެން، ޗައިނާގެ ސިނޮފަރމް ވެކްސިންގެ ދެވަނަ ޑޯޒު ޖަހަން ފަށާނެކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ)ން ވަނީ ހާމަކޮށްފައެވެ. ބޮޑު އީދު ބަންދާ ގުޅިގެން ވެކްސިން ޖެހުން މެދުކަނޑާލުމަށްފަހު، އަލުން ވެކްސިން ޖެހުމަށް ނިންމާފައިވާއިރު، މިކަމާ ގުޅިގެން އެޗްޕީއޭއިން ބުނީ ސިނޮފަރމް ވެކްސިންގެ ދެވަނަ ޑޯޒް ޖެހުމުގެ ފުރުސަތު ހުޅުވައިލާނީ ވެކްސިންގެ ފުރަތަމަ ޑޯޒު ޖެހިތާ ތިން ހަފުތާ ވެފައިވާ މީހުންނަށް ކަމަށެވެ.

ބުދަ ދުވަހުގެ ހެނދުނު 9:00ން 11:00ށް ވެކްސިން ޖެހުމުގެ ކަންތައްތައް ކުރިއަށް ގެންދާނީ ސެނެހިޔާ ހޮސްޕިޓަލުން ކަމަށް ވެސް އެޗްޕީއޭއިން ވަނީ ބުނެފައެވެ. އެޗްޕީއޭގެ ޑެޕިއުޓީ ޑިރެކްޓަރ ޖެނެރަލް ތަސްލީމާ ޢުޘްމާން ރާއްޖެއެމްވީއަށް ވިދާޅުވީ، އީދު ބަންދާއެކު ވެކްސިން ޖެހުން މެދުކަނޑާލާއިރު ސަރުކާރުން ދީފައިވާ ބޮޑު ޗުއްޓީއާ އެކީގައި ވެކްސިން މެދުކަނޑާލުމަށް ފަހު، ދެން ވެކްސިން ޖެހުން ރަސްމީކޮށް ހުޅުވާލާނީ ޖުލައި 26ގެ ބަންދަށް ފަހު މި މަހުގެ 30 ވަނަ ދުވަހު ކަމަށެވެ.

ރާއްޖެއަށް މިވަގުތު އެކަށީގެންވާ މިންވަރަށް ވެކްސިން ލިބިފައިވާކަމަށާއި އެހެންކަމުން އެއްވެސް ދަތިކަމެއްނެތި ވެކްސިން ޖެހުމުގެ ކަންކަން ކުރިޔަށް ދާނެކަމަށް ސަރުކާރުން ވަނީ ބުނެފައެވެ. އެގޮތުން ސަރުކާރުގެ އެންމެ ފުރަތަމަ އަމާޒަކީ، ރާއްޖޭގައި އުޅޭ އެންމެންގެ ތެރެއިން، ވެކްސިން ޖަހާ އުމުރުގެ 90 އިންސައްތަ މީހުންނަށް، މިފެށޭ އޮގަސްޓް މަހުގެ ނިޔަލަށް، ވެކްސިން ޖަހައި ނިންމުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްވެސް ވަނީ ވިދާޅުވެފައެވެ.