މެއި 6 ގެ ހަމަލާއާއި ގުޅޭގޮތުން ފުލުހުން މިރޭ ނޫސްވެރިންގެ ބައްދަލުވުމެއް ބާއްވާނެކަން ހާމަކޮށްފިއެވެ.

މިކަން ހާމަކޮށް ފުލުހުން ބުނީ 2021 މެއި 06 ވަނަ ދުވަހުގެ ރޭ މާލެ، ނީލޯފަރު ހިނގުމުގައި އެއްޗެއް ގޮއްވާލައި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅޭ މައުލޫމާތު ދިނުމަށް ދިވެހި ފުލުހުންގެ ޚިދުމަތުން ނޫސްވެރިންގެ ބައްދަލުވުމެއް ބޭއްވުމަށް ނިންމާފައިވާކަމަށެވެ. ނޫސްވެރިންގެ ބައްދަލުވުން އޮންނާނީ އިސްކަންދަރު ބިލްޑިންގެ މަލްޓިޕާޕަސް ހޯލްގައި މިރޭ 21:00ގައި ކަމަށް ވަނީ ބުނެފައެވެ.

ނޫސްވެރިންގެ ބައްދަލުވުމުގައި މައުލޫމާތު ދެއްވާނީ ކޮމިޝަނަރ އޮފް ޕޮލިސް މުހައްމަދު ހަމީދާއި އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރިޔާޒާއި ޕްރޮސެކިއުޓަރ ޖެނެރަލް ހުސައިން ޝަމީމެވެ.

މެއި މަހުގެ ހަވަނަ ދުވަހު ރައީސް ނަޝީދަށް އަމާޒުކޮށް، ދިން ހަމަލާގެ ތުހުމަތު ކުރެވޭ 4 މީހުންގެ ތަހުގީގު ނިންމައި، ދައުވާ ކުރަން މިހާރު ވަނީ ފޮނުވާފައެވެ، ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވީ، ތަހުގީގު ރިޕޯޓުތައް ލިބިފައިވާ ކަމަށާއި، އިތުރު ހެކިތައް ހޯދުމުގެ މަސައްކަތް އަދިވެސް ކުރިއަށްދާނެ ކަމަށެވެ. އެމީހުންގެ މައްޗަށް ދައުވާ ކުރުމާމެދު ގޮތެއް ނިންމުމަށް 15 ދުވަހުގެ މުއްދަތެއް ލިބޭނެ ކަމަށްވެސް ޝަމީމް ވިދާޅުވިއެވެ. އިތުރު ތަފްސީލްތަކާއެކު މިމަހުގެ 24ވަނަ ދުވަހު ފުލުހުން ބާއްވާ ނޫސްވެރިންގެ ބައްދަލުވުމުގައި ބައިވެރިވެވަޑައިގަންނަވާނެ ކަމަށްވެސް ޝަމީމު އޭރު ވަނީ ވިދާޅުވެފައެވެ.

ދައުވާކުރަން ފޮނުވާފައިވަނީ ހަމަލާގައި އަމަލީ ގޮތުން ބައިވެރިވި ކަމުގެ ތުހުމަތުގައި ހައްޔަރުކޮށްފައިވާ އަހުމަދު އަދުހަމް 25އ އާއި، މުޖާޒް އަހުމަދު 21އ އާއި، ތަހުމީން އަހުމަދު 32އ އާއި، އަދި އަހުމަދު ފާތިހު 23އ ގެ މައްޗަށެވެ.

ޓެރަރިޒަމް ގާނޫނުގައިވާ ގޮތުން ހަމަލާއާ ގުޅިގެން ހައްޔަރުކުރި މީހުންގެ މައްޗަށް ދައުވާ އުފުލަން 75 ދުވަހުގެ މުއްދަތެއް ލިބޭނެއެވެ. މި މުއްދަތު ހަމަވާނީ އޮގަސްޓްމަހުގެ 5ވަނަ ދުވަހަށެވެ. އެންމެ ފަހުން ބޭއްވި މީޑިއާ ބްރީފިންގައި ޕީޖީ ޝަމީމް ވިދާޅުވެފައިވަނީ ތަހުގީގު ކުރިއަށްގެންދާ ގޮތް ކޮންމެ ދުވަހަކުވެސް އަދާހަމަ ކުރައްވާ ކަމަށާއި ކަނޑައެޅިފައިވާ މުއްދަތުގެ ތެރޭގައި ދައުވާ އުފުލޭނެ ކަމުގެ ޔަގީންކަން އެބައޮތް ކަމަށެވެ.

މި ހަމަލާއާ ގުޅިގެން ރައްޔިތުންގެ މަޖިލީހުންވަނީ ޚާއްސަ އިންކުއަރީއެއްވެސް ހަދާފައެވެ. އެ އިންކުއަރީގައިވެސް ގިނަ ކަންބޮޑުވުންތަކެއްވަނީ ފާހަގަކޮށްފައެވެ.

ރައީސް ނަޝީދަށް ދިން ހަމަލާއާ ސީދާ ގުޅުންހުރި 4 މީހުންނަކީ ވެސް ހަރުކަށި ފިކުރުގެ މީހުންކަން ޔަގީންކުރެވޭ ކަމަށް ފުލުހުންވަނީ ބުނެފައެވެ.