ރިސޯޓުތަކުގެ 80 އިންސައްތަ މުވައްޒަފުން ވެކްސިންގެ ދެ ޑޯޒް ޖަހައިފި
24 ޖުލައި 2021 | ހޮނިހިރު 02:34މިއީ ރާއްޖެއަކީ ފަތުރުވެރިންނަށް ރައްކާތެރި މަންޒިލަކަށް ހެދުމަށް ފެށި މަސައްކަތެއް
ފަތުރުވެރިކަމުގެ ސިނާއަތުގައި މަސައްކަތް ކުރާ ފަރާތްތަކަށް ކޮވިޑްގެ ވެކްސިން ދިނުން
ރިސޯޓުތަކުގެ 80 އިންސައްތަ މުވައްޒަފުން ކޮވިޑް-19 އިން ރައްކާތެރިވުމަށް ޖަހާ ވެކްސިންގެ ދެ ޑޯޒް ފުރިހަމަކޮށްފައިވާ ކަމަށް ޓުއަރިޒަމް މިނިސްޓްރީން ބުނެފިއެވެ.
ޓުއަރިޒަމް މިނިސްޓްރީން އެންމެ ފަހުން އާންމުކޮށްފައިވާ ތަފާސްހިސާބުތައް ދައްކާގޮތުން މި ހިނގާ ޖުލައި މަހުގެ 19ގެ ނިޔަލަށް 80 އިންސައްތަ ރިސޯޓު މުވައްޒަފުން ވަނީ ވެކްސިންގެ ދެ ޑޯޒް ފުރިހަމަކޮށްފައެވެ.
މުވައްޒަފުންގެ 97 އިންސައްތަ ވެކްސިންގެ ފުރަތަމަ ޑޯޒް ޖަހާފައިވާ ކަމަށް ވެސް ޓުއަރިޒަމް މިނިސްޓްރީން ވަނީ ބުނެފައެވެ.
ރާއްޖެއަކީ ފަތުރުވެރިން ޒިޔާރަތްކުރުމަށް ރައްކާތެރި ގައުމަކަށް ހެދުމަށް ފަތުރުވެރިކަމުގެ ސިނާއަތުގައި މަސައްކަތްކުރާ މުވައްޒަފުންނަށް ވެކްސިން ދިނުމުގެ މަސައްކަތް މިދިޔަ ފެބްރުއަރީ މަހު ވަނީ ފަށާފައެވެ. ވެކްސިން ޕްރޮގްރާމް ފެށުމުގެ ކުރިން ވެސް ރާއްޖެއަކީ ފަތުރުވެރިންނަށް ރައްކާތެރި ގައުމެއްކަން އަންގައިދޭ ސްޓޭމްޕް ރާއްޖެއަށް ލިބިފައިވެއެވެ.
މި ބަލި ކޮންޓްރޯލްކުރުމަށް ރާއްޖޭގައި ދިރިއުޅޭ އެންމެންނަށް ވެކްސިން ދެމުންދާއިރު، މިހާތަނަށް 320،887 މީހަކު ވަނީ ވެކްސިންގެ ފުރަތަމަ ޑޯޒް ޖަހާފައެވެ. އަދި 259،761 މީހަކު ވަނީ ވެކްސިންގެ ފުރަތަމަ ޑޯޒް ޖަހާފައެވެ.
ރާއްޖެއިން ފެންނަ ކޮވިޑްގެ ކޭސްތައް މަދުކުރުމަށް ފެށި މި ވެކްސިން ޕްރޮގްރާމާއި، ބަލި ކޮންޓްރޯލްކުރުމަށް އެޅި ހަރުކަށި ފިޔަވަޅުތަކުގެ ސަބަބުން ރާއްޖެއިން ފެންނަ ކޮވިޑްގެ ކޭސްތައް ވަނީ ވަރަށް ބޮޑަށް މަދުކުރެވިފައެވެ.
މީގެ ހެޔޮ އަސަރު ރާއްޖޭގެ ފަތުރުވެރިކަމަށް ވެސް ވަނީ ކުރަން ފަށާފައެވެ. ޓުއަރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިމަހުގެ މިހާތަނަށް 65،382 ފަތުރުވެރިން ވަނީ ރާއްޖެ ޒިޔާރަތްކޮށްފައެވެ. މިއީ ފާއިތުވި މެއި އަދި ޖޫން މަހާ އަޅާ ބަލާއިރު އިތުރު އަދަދެކެވެ.
