މަސް މާރުކޭޓުގައި ގަވައިދާ ޚިލާފަށް ހިންގާ ތަންތަން ޖުލައި 28ގެ ކުރިން ހުސްކުރަން އަންގައިފި
މާރުކޭޓުގައި ހުރި ތަންތަން ބޭނުންކުރަމުން ގެންދާ ފަރާތްތައް ދެނެގަތުމަށް ކުރި އިއުލާނާ ގުޅިގެން ރަސްމީ ލިޔުމެއް ހުށަހަޅާފައިވަނީ އެންމެ ފަރާތަކުން
މާލެ މަސް މާރުކޭޓުތެރެ
މާލޭ ރޯމަސް މާރުކޭޓުގެ މަތީބުރި ތަކުގައި ގަވައިދާ ޚިލާފަށް ހިންގާ ތަންތަން ހުސްކުރަން މާލެ ސިޓީ ކައުންސިލުން އަންގައިފިއެވެ.
މާލެ ސިޓީ ކައުންސިލުން ބުނީ ރޯމަސް މާރުކޭޓުގެ މަތީބުރި ތަކުގައި (ފަސްޓްފްލޯރއާއި ސެކަންޑްފްލޯރގައި) ހުރި، މީހުން ނިންދަވާތަންތަނާއި ފިހާރަ، ގުދަން ފަދަ ތަންތަން މިހާރު ބޭނުންކުރަމުން ގެންދާ ފަރާތްތައް ދެނެގަތުމަށް ކައުންސިލުން ކުރި އިއުލާނާ ގުޅިގެން ރަސްމީ ލިޔުމެއް ހުށަހަޅާފައިވަނީ އެންމެ ފަރާތަކުން ކަމަށެވެ.
ނަމަވެސް އެތަނުގައި ހުރި މީހުން ނިންދަވާތަންތަނާއި، ފިހާރަ، ގުދަން ފަދަ ހުރިހާ ތަނެއްގައިވެސް މުދަލާއި ތަކެތި ހުރިކަން ފާހަގަކޮށް ކައުންސިލުން ވަނީ "ލިސްޓޯ" ފިހާރަ ފިޔަވައި އެހެން ހުރިހާ ހުރިހާ ތަނަކަށް މުދަލާއި ތަކެތި ވައްދާފައިވާ ފަރާތްތަކުން، އެފަރާތަކުން އެތަނަކަށް ވައްދާފައިވާ މުދަލާއި ތަކެތި ހުސްކުރުމަށް އަންގާފައެވެ.
މާލެ ސިޓީ ކައުންސިލުން ބުނީ ގަވައިދާ ޚިލާފަށް ހިންގާ ތަންތަން ޖުލައި 28ގެ ކުރިން ހުސްކުރަން ޖެހޭނެ ކަމަށެވެ.
ކައުންސިލުން ވަނީ އެމުއްދަތުގައި ނުގެންގޮސް ހުންނަ ތަކެއްޗާއި މެދު އެ އިދާރާއިން ނިންމާގޮތެއްގެ މަތިން އަމަލުކުރެވޭނެ ކަމަށާއި، އެކަމުގެ ސަބަބުން ލިބޭ ގެއްލުމަކަށް ކައުންސިލުން ޒިންމާ ނުވާނެ ކަމަށް ބުނެފައެވެ.
