ކޯލިޝަނެއްގެ އަޅުވެތިކަމުގައި "ފިތިފައި" ހުންނެވިނަމަ....

ވެރިކަން ކުރާ މައިޕާޓީ އެމްޑީޕީގެ އެތެރޭގެ ކޯޅުންގަނޑުގެ ވާހަކައަކީ މިހާރު އެންމެ ދަންނަ ބޮޑު ސިއްރެކެވެ. ބައެއް ފަހަރު މި ކޯޅުންގަނޑު ގޮސް ނިމެނީ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ނިރުބަވެރި ހަމަލާގެ ތަހުގީގު ހިންގުމުގައި ސަރުކާރުން ފެއިލްވެފައިވާކަމަށް ބުނެ ދެކެވޭ ވާހަކައަށެވެ. ބައެއް ފަހަރު ސިޔާސީ ގޮތުން ފިކުރު ތަފާތުކަމުގެ ވާހަކައަށެވެ. ބައެއް ފަހަރު ހަރުކަށި ފިކުރު އެމްޑީޕީގެ އެތެރޭގައި މޫލައި، ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވެސް "ތާށިވެފައިވާ" ކަމުގެ ވާހަކައަށެވެ. މިހާރު އަނެއްކާވެސް މި ކޯޅުން ގޮސް ގުޅެން ފަށާފައިވަނީ ކޯލިޝަނެއްގެ ނުފޫޒާއި އަޅުވެތިކަމުގެ ދަށުގައި ސަރުކާރު ފިތިފައިވާ ވާހަކައާއެވެ.

މި ވާހަކަ ފެންމަތިވެގެން ދިޔައީ ކޯލިޝަން ސަރުކާރާއެކު އެމްޑީޕީގެ އެޖެންޑާ ހިންގުމަށް ހުރަސްތަކެއް ކުރިމަތިވާ ކަމަށް ދޭހަވާ ބީދައިން ރައީސް ނަޝީދާއި، އެމްޑީޕީގެ ބައެއް މެމްބަރުން ވާހަކަ ދެއްކެވި ހިސާބުންނެވެ. ބައެއް މެމްބަރުން ވަނީ ކޯލިޝަނެއްގެ ނުފޫޒާއި އަޅުވެތިކަމުގެ ދަށުގައި ރައީސް ޞާލިޙު ހުންނެވި ކަމަށް ވިދާޅުވެފައެވެ. އެފަދަ ޝުއޫރުތަކެއް ސޯޝަލް މީޑިއާއާއި އެކި ޕްލެޓްފޯމުތަކުގައި ވެސް ގެންދަނީ ހިއްސާ ކުރަމުންނެވެ. ރައީސް ޞާލިޙާއެކު ސިޔާސީ މަސައްކަތްތައް ނުކުރެއްވޭނެ ކަމަށާއި، އިދިކޮޅު ޕީޕީއެމް/ޕީއެންސީއާ އިއްތިޙާދު ހައްދަވަން ބޭނުންފުޅުވެވަޑައިގަންނަވާ ކަމަށް ދާދި ފަހުން ރައީސް ނަޝީދު ވެސް ވަނީ ވިދާޅުވެފައެވެ.  

އެހެންނަމަވެސް، ރައީސް ޞާލިޙު ކޯލިޝަނެއްގެ އަޅުވެތިކަމުގައި ހުންނެވިނަމަ ނުކުރައްވާނެ ފަދަ އެތައް ކަމެއް ކުރައްވާފައިވާ މަންޒަރު ފެންނަން އޮތްކަން އެއީ ދެބަސްވެވެން ނެތް ހަޤީޤަތެކެވެ. ރައީސް ޞާލިޙުގެ ސަރުކާރުގައި ކޯލިޝަން އެކުލަވާލުމަށް އެއްބަސްވުމެއް ހަދައި، އެއްބަސްވުމާ އެއްގޮތަށް ކެބިނެޓަށް ވަޒީރުން އައްޔަން ކުރުމަށް އަދާލަތު ޕާޓީ، މޯލްޑިވްސް ރިފޯމް މޫވްމަންޓް (އެމްއާރްއެމް) އަދި ޖުމްހޫރީ ޕާޓީއަށް ވަކި ވަރަކަށް ސްލޮޓްތައް ދިނެވެ. އަދި އެ ސްލޮޓުތަކަށް ބަލައި، ވަޒީރުންގެ އިތުރުން ސިޔާސީ އެކިއެކި މަގާމުތަކަށް މީހުން އައްޔަން ކުރެވިގެން ދިޔައެވެ. ނަމަވެސް ސަރުކާރު ހިންގުމަށްޓަކައި ގެންނަންޖެހޭ ކޮންމެ ބަދަލެއް ގެނައުމުގައި ވެސް ރައީސް ޞާލިޙު ގެންދެވީ ޖެހިލުންވުމެއް ނެތި، ނިންމުންތައް ނިންމަވަމުންނެވެ. ޚުދު މަޖިލީހުން އެކަމުގައި ނިންމެވި ކޮންމެ ނިންމުމަކަށް ރައީސް ޞާލިޙު ވެސް ވަނީ ތާއީދު ކުރައްވާފައެވެ.

ކޮމިއުނިކޭޝަން މިނިސްޓަރު ކަމުގައި ހުންނެވި މުޙައްމަދު މަލީހު ޖަމާލުގެ އިތުބާރު ނެތް ކަމަށް ފާސްކުރިއިރު، އެއާ ގުޅިގެން ކެބިނެޓަށް ގެންނަން ޖެހޭ މުހިއްމު ބަދަލުތައް ރައީސް ޞާލިޙު ގެންނެވިއެވެ. ކޮރަޕްޝަނުގެ ބޮޑެތި ތުހުމަތުތަކާއެކު ސިއްހަތާ ބެހޭ ވަޒީރު އަބްދު ﷲ އަމީން އިސްތިއުފާ ދެއްވީ ވެސް މި ސަރުކާރުން އެ ތުހުމަތުތައް ތަހުގީގު ކުރަމުން ދަނިކޮށެވެ. ޖޭޕީގެ ސްލޮޓެއްގައި ހުންނެވި ވަޒީރަކު އިސްތިއުފާ ދެއްވުމުން އެ ސްލޮޓު ދެން ދެއްވިތަން ފެނިގެން ދިޔައީ އެމްޑީޕީއަށް ނިސްބަތްވާ ބޭފުޅަކަށެވެ. ހެލްތް މިނިސްޓަރު ކަމުގެ މަޤާމަށް އަހުމަދު ނަސީމް އައްޔަނު ކުރެއްވުމާއެކު، ޖޭޕީން އެކަމާ ދެކޮޅަށް ނުކުމެ ސަރުކާރަށް ކުރުދޮށިން ދިން މަންޒަރެއް ނުފެނެއެވެ. އަދާލަތު ޕާޓީގެ ސްލޮޓެއްގައި ހުރި ޖެންޑަރ މިނިސްޓަރު ޝިދާތާ ޝަރީފު މަގާމުން ވަކިކުރުމުގެ މަސައްކަތް ވެސް ފެށިއެވެ. އެ ހިސާބުން އަމިއްލައަށް އޭނާ ވެސް އިސްތިއުފާ ދެއްވިއެވެ.

މިނިސްޓަރ އޮފް ހައުސިންގ އެންޑް އަރބަން ޑިވެލޮޕްމަންޓްގެ މަގާމުގައި ހުންނެވި އާމިނަތު ޢާޠިފާ, އެ މަގާމުން އިސްތިޢުފާ ދެއްވުމާއެކު، އެ ސްލޮޓު ދެއްވީ އެމްއާރްއެމްގެ ވަޒީރަކަށް ނޫނެވެ. އެހިސާބުން މިނިސްޓްރީ އުވާލައި, މިނިސްޓްރީގެ މަސައްކަތްތައް ޕްލޭނިންގް މިނިސްޓްރީގެ ދަށަށް ބަދަލު ކުރެއްވީއެވެ.

ފަތުރުވެރިކަމާ ބެހޭ ވަޒީރު އަލީ ވަހީދު މަގާމުން ވަކިކުރެއްވީ ރައީސް ސާލިޙު އަމިއްލަފުޅަށެވެ. އެ ނިންމުން ނިންމެވި ސަބަބާއި، އެމަނިކުފާނު ކަމެއް ނިންމަވާނީ ޤައުމަށް އެންމެ ލާބަހުރި ގޮތަށްކަން ފާހަގަ ކުރައްވައި ރައީސް ޞާލިޙު ވަނީ ޖޭޕީގެ ލީޑަރު ޤާސިމް އިބްރާޙިމަށް ވެސް އެކަން އެނގިވަޑައިގަންނަވާނެ ކަމަށް ވިދާޅުވެފައެވެ. ފެނިގެން ދިޔައީ ރައީސްގެ މި ނިންމެވުންތަކަށް ކޯލިޝަންގެ ލީޑަރުން ވެސް އިހުތިރާމު ކުރެއްވި މަންޒަރެވެ. އެއްވެސް ވަޒީރަކު ރައީސްގެ ނިންމެވުމަކާ ގުޅިގެން ސަރުކާރާ ދެކޮޅުވެ، ސަރުކާރަށް އެއްޗެހި ގޮވާ މަންޒަރު ފެނިފައެއް ނުވެއެވެ. އެންމެ ފަހުން ވެސް ކޯލިޝަންގެ ބައެއް ލީޑަރުން ވަނީ ކުރިއަށް ވަޑައިގަންނަވާނީ ކޯލިޝަން ސަރުކާރާއެކުކަން ފާހަގަކުރައްވާފައެވެ.

ކޮންމެއަކަސް، ރައީސް ޞާލިޙުގެ ވެރިކަމުގައި ނިންމަވާފައިވާ ނިންމެވުންތަކަށް ބަލާއިރު، އެމަނިކުފާނުގެ މައްޗަށް ކޯލިޝަންގެ ނުފޫޒެއް އޮތޭ ދެންނެވޭކަށް ނެތެވެ. ސަބަބަކީ ކޯލިޝަން "ރުއްސުމަށްޓަކައި" އެމަނިކުފާނު ވެރިކަމަށް ވަޑައިގެންނެވިއިރު ވެފައިވާ ވައުދުތަކާއި، ގެންގުޅުއްވި ސިޔާސަތުތައް މުގުރާލައްވާ މަންޒަރު ނުފެންނާތީއެވެ. ވީމާ އެމްޑީޕީގެ އެތެރޭގައި އަޅާފައި މިވާ ރެނދަކީ ކޯލިޝަނެއްގެ ނުފޫޒުގައި ރައީސް ޞާލިޙު ހުންނަވައިގެން އަޅާފައިވާ ރެނދެއް ކަމަށް ބުނުމަކީ ތަންކޮޅެއް ޤަބޫލުކުރަން އުނދަގޫ ވާހަކައެވެ. މި ރެނދުގެ ފަހަތުގައިވާ ހަޤީޤީ ސިއްރަކީ ކޮބައިބާއެވެ!