އިންޑިޔާގައި ކޮވިޑްގެ ހާލަތު އަނެއްކާވެސް ގޯސްވަނީ

އިންޑިޔާއަށް ކޮވިޑްގެ ދެވަނަ ރާޅަށް އަރައި، ކޭސްތައް މަދުވާން ފަށާފައިވަނިކޮށް އަނެއްކާވެސް ކޭސްތައް މައްޗަށްދާން ފަށާފައިވާތީ އެކަމުގެ ކަންބޮޑުވުން އިންޑިޔާގެ ކަމާބެހޭ ފަރާތްތަކުން ފާޅުކޮށްފިއެވެ.

މިހާރު ކޭސްތައް އިތުރުވަމުންދަނީ ހިންދީ ދީނުގެ މީހުން މިމަސްތެރޭގައި ކުރިޔަށްގެންދާ ދީނީ އަޅުކަމުގެ ހަރަކާތެއްގެ އިތުރުން، ފަތުރުވެރިންގެ ސަބަބުންކަމަށް އިންޑިޔާގެ ކަމާބެހޭ ފަރާތްތަކުން ބުނެއެވެ. ހިންދީ ދީނުގެ މީހުންގެ އަޅުކަމެއްގެ ގޮތުން އުތުރުގެ ސިޓީތަކަށް އެތައް މޭލަކަށް ހިނގާފައިދާނެއެވެ. އެތައް ބަޔަކު އެއްތާކަށް އެއްވެ ކުރިޔަށްގެންދާ މިދީނީ ހަރަކާތުގެ ސަބަބުން ކޮވިޑް އިތުރަށް ފެތުރި ތިން ވަނަ ރާޅެއް އަރާފާނެކަމުގެ އިންޒާރު ސިއްހީ ކަމާބެހޭ ފަރާތްތަކުން ވަނީ ދީފައެވެ.

އަނެއްކޮޅުން ސްޕްރީމް ކޯޓުން މިހަފްތާގައި ވަނީ މައިސަރުކާރުގެ އިތުރުން، އުއްތަރަ ޕްރަދޭޝްގެ ސަރުކާރުން ބޮޑެތި ދީނީ ހަރަކާތްތައް ބޭއްވުމުގެ ހުއްދަދީފައިވާތީ އެކަމާ ގުޅޭގޮތުން ސުވާލު އުފައްދާފައެވެ.

ހޯމް މިނިސްޓްރީން ވަނީ ބައެއް ސްޓޭޓްތަކުގައި ކޭސްތައް ފެންނަ މިންވަރު އިތުރުވަމުންދާތީ ސޯޝަލް ޑިސްޓޭންސް ގެންގުޅުމާއި ގިނަ އަދަދެއްގެ ފަތުރުވެރިން އެއްވާ ސަރަހައްދުތަކުގައި ބައިބޯވުން ކުޑަކުރުމަށް ފިޔަވަޅުތައް އެޅުމަށް ގޮވާލާފައެވެ.

އިންޑިޔާގައި މިހާރު ކޮވިޑް ފެތުރޭ މިންވަރު ހުރީ 0.86 ގައެވެ. މިމަސްތެރޭގައި އިންޑިޔާގައި ކޮވިޑް ޖެހޭ މިންވަރު ވަނީ 25 އިންސައްތަ މައްޗަށް ޖެހިފައެވެ. އަދި އާރް ވެލިޔު 1ށް އަރާފާނެކަމުގެ އިންޒާރުވެސް ވަނީ ދީފައެވެ.

އޭޕްރީލް 9 ގައި އެންމެ ޕީކުގައި ހުރިއިރު އާރް ވެލިޔު ހުރީ 1.47ގައެވެ.

އިންޑިޔާގައި ކޮވިޑް ޖެހިފައިވާ މީހުންގެ އަދަދު 30.99 މިލިއަނަށް އަރާއިރު މަރުވި މީހުންގެ އަދަދު 411،989ށް ވަނީ އަރާފައެވެ.

އިންޑިޔާގެ ބޮޑުވަޒީރު ނަރެންދްރަ މޯދީ ވަނީ އައު ވޭރިއަންޓްތައް ފެންނަމުންދާތީ އެކަމަށް ސަމާލުވެ، ވެކްސިން ދިނުމުގެ ޕްރޮގްރާމް ހަލުވިކުރުމަށް އެދިވަޑައިގެންފައެވެ.

އިންޑިޔާއިން މަސައްކަތްކުރަމުން އަންނަނީ 950 މިލިއަން މީހުންނަށް މިއަހަރު ނިމެންވާއިރު ވެކްސިން ދިނުމަށެވެ. ނަމަވެސް ވެކްސިން ލިބުމުގައި ދިމާވި ދަތިތަކާ ގުޅިގެން އެގައުމުގައި ވެކްސިންގެ ދެ ޑޯޒް ދެވިފައިވަނީ އަދި އެންމެ 8 އިންސައްތަ މީހުންނަށެވެ.