ކޮވިޑް-19ގެ ސަބަބުން ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ހުޅުވާލިފަހުން އެއް އަހަރު ފުރިއްޖެއެވެ.

ބޯޑަރު އަލުން ހުޅުވާލިފަހުން އެއް އަހަރު ފުރުން ފާހަގަކުރުމުގެ ގޮތުން ވެލާނާ އިންޓަނޭޝަނަލް އެއަރޕޯޓް އާއި ޓޫރިޒަމް މިނިސްޓްރީ އަދި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން ގުޅިގެން ވަނީ މިއަދު ރާއްޖެ އައި އެންމެ ފުރަތަމަ ފަތުރުވެރިޔާއަށް ހޫނު މަރުހަބާއެއް ކިޔާފައެވެ.

އެގޮތުން އެންމެ ފުރަތަމަ ރާއްޖެ އައިސްފައި ވަނީ ސްވިޒަލޭންޑްގެ ފަތުރުވެރިއެކެވެ. އޭނޭއަށް ވީއައިއޭ އިން ބޮޑުބެރުގެ ހަރަކާތްތަކާއެކު ހޫނު މަރުހަބާއެއް ކިޔާފައިވާއިރު، ޓޫރިޒަމް މިނިސްޓްރީ، ވީއައިއޭ، އެމްއެމްޕީއާރުސީ އަދި މޯލްޑިވްސް އިމިގްރޭޝަންގެ ފަރާތުން ވަނީ ހާއްސަ ހަދިޔާ ދީފައެވެ.

ބޯޑަރު ހުޅުވާލިތާ އެއް އަހަރު ފުރުމާ ގުޅިގެން މީޑިއާ އާ ވާހަކަދައްކަވަމުން ޓޫރިޒަމް މިނިސްޓްރީގެ ޑެޕިއުޓީ މިނިސްޓަރ އައްސަދު ރިޒާ ވަނީ މިހާރު ރާއްޖެ އަންނަ ފަތުރުވެރިންގެ އަދަދު އިތުރުވާން ފަށާފައިވާ ކަމަށާއި ހައި ސީޒަންގައި މަހަކު ލައްކައެއްހާ ފަތުރުވެރިން އަންނާނެ ކަމަށް މިހާރު ލަފާކުރެވޭ ކަމަށް ވިދާޅުވެފައެވެ.

އޭގެ އިތުރުން ވީއައިއޭ ހިންގުމާ ހަވާލުވެފައިވާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ޖެނެރަލް މެނޭޖަރ ކޯޕަރޭޓް ކޮމިއުނިކޭޝަންސް ހަސަން އަރީފް ވަނީ ރާއްޖެ އަންނަ ފްލައިޓްތައް އިތުރުވާން ފަށައިފިކަމަށާއި މިހާރު ދަތުރުކުރާ އެއަރލައިންތަކުގެ ތެރެއިން ގިނަ އަދަދެއްގެ އެއަރލައިންތަކުން ރާއްޖެއަށް ކުރާ ދަތުރުތައް އިތުރުކުރަން ފަށާފައިވާ ކަމަށް ވިދާޅުވެފައެވެ.

ފާއިތުވި އަހަރުގެ ޖުލައި 15 ވަނަ ދުވަހު ބޯޑަރު އަލުން ހުޅުވާލިފަހުން މިހާތަނަށް ހަތް ލައްކަ އަށް ވުރެ ގިނަ ފަތުރުވެރިން ވަނީ ރާއްޖެ އައިސްފައެވެ. މިހާރު ރާއްޖެ އަންނަ ފަތުރުވެރިންގެ އަދަދު އިތުރުވާން ފަށާފައިވާއިރު، މިއަދު އެކަނިވެސް 24 އިންޓަނޭޝަނަލް ފްލައިޓް ރާއްޖެއަށް ދަތުރުކުރާނެ ކަމަށް ވީއައިއޭ އިން ބުނެއެވެ.