2 ލައްކަ މީހުން ވެކްސިން ފުރިހަމަ ކޮށްފި
އަންގާރަ ދުވަހު 6,461 މީހަކު ވެކްސިން ފުރިހަމަކޮށްފައިވޭ
ވެކްސިން ޖެހުމުގެ ގައުމީ ކެމްޕޭންގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދިނުމުގެ މަސައްކަތް ކުރިއަށް ދަނީ
ރާއްޖެއިން 2 ލައްކަ މީހުން ކޮވިޑް-19 ވެކްސިން ފުރިހަމަކޮށްފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އާންމުކޮށްފައިވާ މައުލޫމާތުތައް ދައްކާގޮތުން، އަންގާރަ ދުވަހު 6,461 މީހަކު ވެކްސިން ފުރިހަމަކޮށްފައިވާ އިރު، މާލެ ސަރަހައްދުން ދެވަނަ ޑޯޒް ޖެހީ 50،51 މީހެކެވެ. އަދި އަތޮޅު ތެރެއިން 1410 މީހަކު ވަނީ ވެކްސިންގެ ދެވަނަ ޑޯޒް ޖަހާފައެވެ. މިއާއެކު ރާއްޖޭގައި ވެކްސިން ފުރިހަމަ ކުރި މީހުންގެ އަދަދު ވަނީ 206،245ށް އަރާފައެވެ.
ހޯމަ ދުވަހު 213 މީހަކު ވަނީ ވެކްސިންގެ ފުރަތަމަ ޑޯޒް ޖަހާފައެވެ. އެއީ މާލެ ސަރަހައްދުން ވެކްސިން ޖެހި 99 މީހުންނާއި، އަތޮޅުތެރެއިން ވެކްސިން ޖެހި 114 މީހުންނެވެ. މިއާއެކު ފުރަތަމަ ޑޯޒް ޖެހި މީހުންގެ އަދަދު ވަނީ 317،762ށް އަރާފައެވެ.
އެޗްޕީއޭއިން ބުނީ ސިނޮފަރމްގެ ފުރަތަމަ ޑޯޒާއި ދެވަނަ ޑޯޒް ޖެހުމުގެ ކަންކަން ބުދަ ދުވަހު ވެސް ކުރިއަށްދާނެ ކަމަށެވެ. އެގޮތުން ސެނަހިޔާ އަދި ޓްރީޓޮޕް ހޮސްޕިޓަލުން ހެނދުނު 9:00ން 11:00ށް ވެކްސިން ޖެހުމުގެ ކަންކަން ކުރިއަށްދާނެ ކަމަށެވެ.
މީގެ އިތުރުން ކޮވިޝީލް ވެކްސިންގެ ދެވަނަ ޑޯޒް ޖެހުމަށް އެޕޮއިންޓްމެންޓަށް ވަނީ ހުޅުވާލާފައެވެ. އެގޮތުން ފެބްރުއަރީ މަހާއި މާޗް މަހު، މާލެ ސަރަހައްދުގައި ކޮވިޝީލްޑް ވެކްސިންގެ ފުރަތަމަ ޑޯޒް ޖަހާފައިވާ ފަރާތްތަކުން އެޕޮއިންޓްމަންޓަށް ހެދުމަށް ވަނީ އެދިފައެވެ.
