އިސްލާމްދީނުގެ ސުލްޙަވެރިކަމާއި ތަޙައްމަލް ކުރުމުގެ ރިވެތި ސިފަތައް ކުރިއަރުވައި ހަރުކަށި ފިކުރުތައް ފެތުރުމުން ސަލާމަތްކުރުމުގެ މަސައްކަތުގައި، ދުނިޔޭގެ މަޝްހޫރު ސެންޓަރެއް ކަމުގައިވާ ޔޫ.އޭ.އީގެ ހިދާޔާ އިސްބޭފުޅުންގެ ވަފުދެއް 2021 ޖޫން 29 އިން ޖުލައި 3 އަށް ދިވެހިރާއްޖެއަށް ކުރެއްވި ޒިޔާރަތް ނިންމާލެއްވުމަށްފަހު ފުރާވަޑައިގެންފިއެވެ. މި ވަފުދުގައި އެ ސެންޓަރުގެ ޗެއަރމަންވެސް ބައިވެރިވެވަޑައިގެންނެވިއެވެ

މިއީ ހިދާޔާ އާއި އެން.ސީޓީސީ އާއި ދެމެދު 2019 ވަނަ އަހަރު ސޮއިކޮށްފައިވާ އެމް.އޯ..ޔޫގެ ދަށުން ވިލަރެސް ކުރެވިގެން ކޮށްފައިވާ ރަސްމީ ދަތުރެކެވެ.

މި ވަފުދުގައި ޗެއަރމަން ހިޒް އެކްސެލެންސީ ޑރ. ޢަލީ ރާޝިދު އައްނުޢައިމީގެ އިތުރުން، ހިދާޔާގެ އެގްޒެކެޓިވް ޑިރެކްޓަރ އަޙްމަދު އަލްޤާސިމީއާއި ޔޫ.އޭ.އީގެ މިނިސްޓަރ އޮފް ޕްރެޒިޑެންޝަލް އެފެއާރޒާއި، ޖެނެރަލް އޮތޯރިޓީ އޮފް އިސްލާމިކް އެފެއާރޒް އެންޑް އެންޑައުމަންޓްސްގެ އިސް ބޭފުޅުން ބައިވެރިވެވަޑައިގެންނެވިއެވެ.

ނެޝަނަލް ކައުންޓަރ ޓެރަރިޒަމް ސެންޓަރުން ބުނީ މި ދަތުރުފުޅުގައި މިނިސްޓަރ އޮފް ޑިފެންސް މާރިޔާ އަޙްމަދު ދީދީ އާއި، ޗީފް އޮފް ޑިފެންސް ފޯރސް މޭޖަރ ޖެނެރަލް ޢަބްދުﷲ ޝަމާލްގެ އަރިހަށް އިޙްތިރާމްގެ ޒިޔާރަތެއް ކުރެއްވި ކަމަށެވެ. އަދި ނެޝަނަލް ކައުންޓަރ ޓެރަރިޒަމް ސެންޓަރުގެ ޑިރެކްޓަރ ޖެނެރަލް ބްރިގޭޑިއަރ ޖެނެރަލް ޒަކަރިއްޔާ މަންޞޫރުއާވެސް ހިދާޔާ ސެންޓަރުގެ ވަފުދާ ވަނީ ބައްދަލުކުރައްވާފައިވާ ކަމަށެވެ.

މީގެ އިތުރުން، މިނިސްޓަރ އޮފް އެޑިއުކޭޝަނާއި، މިނިސްޓަރ އޮފް ހޯމް އެފެއާޒާއި، މިނިސްޓަރ އޮފް އިސްލާމިކް އެފެއާޒާއި، ރައްޔިތުންގެ މަޖިލީހާއި، އަދި ކޮމިޝަނަރ އޮފް ޕޮލިސްގެ އަރިހަށްވެސް ހިދާޔާގެ ވަފުދު ވަނީ އިޙްތިރާމްގެ ޒިޔާރަތް ކުރައްވާފައިވެއެވެ. މި ވަފުދުގެ ދަތުރުފުޅު ނިންމަވާލެއްވުމުގެ ކުރިން ރާއްޖޭގެ ގައުމީ ޔުނިވަރސިޓީއާއި، ރާއްޖޭގެ އިސްލާމިކް ޔުނިވަރސިޓީއާއި ބައްދަލުކުރެއްވިއެވެ. އަދި ކ. ހިންމަފުށީގައި ހުންނަ ނޭޝަނަލް ރީއިންޓެގްރޭޝަން ސެންޓަރަށް ޒިޔާރަތްކުރައްވާ އެމަރުކަޒު ބައްލަވާލެއްވި ކަމަށް ނޭޝަނަލް ކައުންޓަރ ޓެރަރިޒަމް ސެންޓަރުން ބުނެއެވެ.

ރާއްޖޭގައި ހަރުކަށި ފިކުރު ފެތުރުން ހުއްޓުވަން ސަރުކާރުން ކުރާ މަސައްކަތުގައި އެއްބާރުލުން ދިނުމާ ބެހޭ އެއްބަސްވުމެއްގައި 19 ފެބުރުއަރީ 2018ގައި ވަނީ ހިދާޔާ ސެންޓަރާއެކު ސޮއިކުރައްވާފައެވެ.

މިއެއްބަސްވުމުގެ ދަށުން، ހަރުކަށި ފިކުރާ ދެކޮޅަށް ހޭލުންތެރިކަން ފެތުރުމުގެ މަގުސަދުގައި، ދައުލަތުގެ އިދާރާތަކާއި، އަމިއްލަ ޖަމިއްޔާތަކާއި، މުދައްރިސުންނާއި، ދީނީ އިލްމުވެރިންނަށް އަމާޒުކޮށް، ކަމާބެހޭ މާހިރުން ރާއްޖެއަށް ފޮނުއްވައިގެން ވަނީ މަސައްކަތު ބައްދަލުވުމެއް އިންތިޒާމު ކޮށްދެއްވާފައެވެ. މި އަހަރުގެ ފަހުކޮޅުގައިވެސް، ހިދާޔާ ސެންޓަރާ ގުޅިގެން މިފަދަ އިތުރު ވަރކްޝޮޕެއް ބޭއްވުމަށް ދަނީ ރާވަމުންނެވެ.

ހަރުކަށި ފިކުރާއި ޓެރަރިޒަމަކީ ގައުމަށް ހުރި ބޮޑު ނުރައްކަލެއްކަން އިއުލާންކޮށް، މިކަމާ ދެކޮޅަށް ރައީސް އިބްރާހީމް މުޙައްމަދު ޞާލިޙުގެ ސަރުކާރުން އެކުލަވާލި "ޒީރޯ ޓޮލެރަންސް" ސިޔާސަތުގެ ދަށުން، މިފަދަ އަމަލުތައް ހުއްޓުވަން ކުރާ ގައުމީ މަސައްކަތުގައި، ދައުލަތުގެ އިދާރާތަކާއި ކަމާބެހޭ އެންމެހާ ފަރާތްތައް ޝާމިލްކޮށްގެން، އަދި ބޭރުގެ މާހިރުންނާއި ބައިނަލްއަގުވާމީ ޖަމިއްޔާތައް ބައިވެރިކޮށްގެން، ކާމިޔާބު ގިނަ ޕްރޮގްރާމްތަކެއްދަނީ ހިންގަމުންނެވެ.