ގައިޑްލައިންއާ އެއްގޮތަށް ސިނަމާތައް ހުޅުވާލުމުގެ ހުއްދަ ދީފިއެވެ.
ކޮވިޑް-19އާ ގުޅިގެން އަޅާފައިވާ ހަރުކަށި ފިޔަވަޅުތަކަށް މި މަހުގެ 8 ވަނަ ދުވަހުން ފެށިގެން ބޮޑެތި ލުއިތަކެއް ދިނުމަށް ވަނީ ނިންމާފައެވެ. އަދި މި ލުއިތަކާއެކު މިހާރު ސިނަމާތައް ހުޅުވާލުމުގެ ހުއްދަ ވެސް ވަނީ ދީފައެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ އުސޫލުގައިވަނީ ގައިޑްލައިންއާ އެއްގޮތްވާ ގޮތުގެ މަތިން ޚިދުމަތް ދޭ ގޮތަށް ސިނަމާތައް ހުޅުވާލުމުގެ ހުއްދަ ދީފައިވާ ކަމަށެވެ. މީގެ އިތުރުން ފިޒިކަލް އިވެންޓްސްތަކާއި އާއްމުން އެއްވެ އުޅުމުގައި ވެސް 30 މީހުންނަށް ވުރެ މަދު މީހުން ހިމެނޭ ގޮތަށް އިވެންޓްތަކާއި އެއްވުންތައް ކުރިއަށް ގެންދިއުމަށް ހުއްދަ ދެވިފައިވާ ކަމަށެވެ. މިފަދަ އެއްވުންތައް ބޭއްވުމުގައި ވެސް ގައިޑްލައިންތަކާއި އެއްގޮތަށް އަމަލުކުރުމަށް އެޗްޕީއޭއިން އެދިފައިވެއެވެ.
ގައިޑްލައިންއާ އެއްގޮތަށް ސިނަމާތައް ހުޅުވާލުމުގެ ހުއްދަ ދީނުމަށް ނިންމާފައިވާއިރު، މާލެ ސަރަހައްދުގައި ހިންގާ ޖިމްތައް ޚާއްސަ އުސޫލެއްގެ ދަށުން ހުޅުވުމުގެ ހުއްދަ ޖޫން މަހުގެ 22 ވަނަ ދުވަހު ދީފައިވެއެވެ.
ކޮވިޑް-19ގެ ފެތުރުން ވަރަށް ބޮޑަށް ކޮންޓްރޯލް ކުރެވިފައިވާ މިދަނޑިވަޅުގައި ބަލިން ރައްކާތެރިވުމަށް އަޅާފައިވާ ފިޔަވަޅުތަކާ އެއްގޮތަށް އަމަލުކުރުމަށް އިލްތިމާސްކޮށްފައިވެއެވެ. އަދި ސިނަމާތަކާއި، ޖިމްތަކާއި، ސެލޫންތަކުން ވެސް އުސޫލު ތަންފީޒުކުރުމަށް އެދިފައިވެއެވެ.
