ޓެރަރިސްޓްގެ ހަމަލައާ ގުޅިގެން ހައްޔަރުކުރި ތިން މީހަކު ދޫކޮށްލުން: މައްސަލަ އިސްތިއުނާފު ކުރަނީ!
7 ޖުލައި 2021 | ބުދަ 13:09ކްރިމިނަލް ކޯޓުގެ ގާޒީ ޙަސަން ސަޢީދު މިއަމުރު ނެރުއްވީ ބުދަ ދުވަހު
ޓެރަރިސްޓް ހަމަލާއާ ގުޅިގެން ފުލުހުން ކުރިއަށް ގެންދިޔަ ޚާއްސަ އޮޕަރޭޝަންގައި މީހަކު ހައްޔަރުކޮށްގެން ގެންދަނީ
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ޓެރަރިސްޓްގެ ހަމަލާއާ ގުޅިގެން ހައްޔަރުކޮށްފައިވާ ތިން މީހަކު ދޫކޮށްލާފައިވާތީ އެމައްސަލަ ދިވެހިރާއްޖޭގެ ހައިކޯޓުގައި އިސްތިއުނާފު ކުރުމަށް ނިންމައިފިއެވެ.
ކްރިމިނަލް ކޯޓުގެ ގާޒީ ޙަސަން ސަޢީދު ބުދަ ދުވަހު ނެރުއްވި އަމުރުގައި ވަނީ ހަރުކަށި ފިކުރާ ދެކޮޅަށް ފުލުހުން ހިންގި އޮޕަރޭޝަނުގައި ހައްޔަރުކުރި ތިން މީހެއް ދޫކޮށްލުމަށް އަންގާފައެވެ.
މިތިން މީހުން ދޫކޮށްލުމާ ގުޅިގެން ޕަބްލިކް ޕްރޮސިކިއުޓަރ އަޙުމަދު ޝަފީޢު ވިދާޅުވީ މޭ 6ގެ ހަމަލާއާ ގުޅިގެން ހައްޔަރުކުރި މީހުންގެ ތެރެއިން 03 މީހުން ބަންދުން ދޫކޮށްލުމަށް ކްރިމިނަލް ކޯޓުގެ ގާޒީ ޙަސަން ސަޢީދު ބުދަ ދުވަހު ނިންމި ނިންމުން ދިވެހިރާއްޖޭގެ ހައިކޯޓުގައި އިސްތިއުނާފު ކުރުމަށް ނިންމާފައިވާ ކަމަށެވެ.
ރައީސް ނަޝީދަށް އަމާޒުކޮށްދިން ހަމަލާއާ ގުޅިގެން މިހާތަނަށް 8 މީހަކު ހައްޔަރުކޮށްފައިވެއެވެ. ނަމަވެސް މި 8 މީހުންގެ ވަނަވަރު ފުލުހުން ހާމަކޮށްފައެއް ނުވެއެވެ. ރައީސް ނަޝީދަށް އަމާޒުކޮށްދިން ހަމަލާގައި ސީދާ ގޮތުން ބައިވެރިވި 5 މީހަކު ފުލުހުން ހައްޔަރުކޮށްފައިވާއިރު ކްރިމިނަލް ކޯޓުން ދޫކޮށްލާފައިވަނީ ކޮން ބައެއްކަން އަދިވަނީ ސާފުވާ ގޮތް ނުވެފައެވެ.
ފުލުހުން ވަނަވަރު ހާމަ ކޮށްފައިވާ މީހުންގެ ތެރޭގައި ހިމެނެނީ ވ. ތިނަދޫ ލަކީ 25 އަހަރުގެ އަދުހަމް އަޙްމަދާއި، މއ. ފޭރުގެ 21 އަހަރުގެ މުޖާޒް އަޙްމަދާއި، ގއ. ކޮނޑޭ ފޮޅޭމާ 32 އަހަރުގެ ތަހުމީން އަޙްމަދާއި، ލ. ގަން ދުންފިނިއުފާ 23 އަހަރުގެ އަޙްމަދު ފާތިޙު، އަދި ނ. މަނަދޫ ނޫރީގެ 27 އަހަރުގެ ޢަލީ ހައިޝަމްއެވެ.
ރައީސް ނަޝީދަށް ލިބިވަޑައިގެންނެވި އަނިޔާތަކަށް އޭޑީކޭ ހޮސްޕިޓަލްގައި ވަނީ 16 ގަޑިއިރުގެ ދިގު އޮޕަރޭޝަނެއް ކުރިޔަށް ގެންގޮސްފައެވެ. އައިއީޑީއެއް ގޮއްވާލުމުގެ ހާދިސާގައި އެމަނިކުފާނުގެ ހަށިކޮޅަށް 10 ރޭޒާފުއް ވަދެ މުހިއްމު ގުނަވަންތައް ފޫއަޅުވާލާފައިވެއެވެ. އިތުރު ފަރުވާ ހޯއްދެވުމަށް ޖަރުމަނުވިލާތަށް ވަޑައިގެންނެވީ މެއި މަހުގެ 13 ވަނަ ދުވަހުއެވެ. އޭގެފަހުން ޖަރުމަނުވިލާތުގައިވެސް ވަނީ އިތުރު އޮޕަރޭޝަންތަކެއް ކުރެވިފައެވެ. ފައިގެ އޮޕަރޭޝަނެއް ކުރެވިފައިވާކަމަށް ރައީސް ނަޝީދުގެ އާއިލާއިން ވަނީ ބުނެފައެވެ.
ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެފައިވަނީ ރައީސް ނަޝީދަށް އަމާޒުކޮށްދިން ޓެރަރިސްޓް ހަމަލާގެ ތަހުގީގު އަންނަ ޖުލައި މަހު ނިމޭނެކަމަށެވެ. ރައީސް ނަޝީދަށް އަމާޒުކޮށްދިން ޓެރަރިސްޓް ހަމަލާގައި އެމަނިކުފާނަށް އަރުވަމުން ގެންދިޔަ ސެކިޔުރިޓީ ފެއިލްވި ގޮތުގެ އިންކުއަރީއެއް ރައްޔިތުންގެ މަޖިލީހުގެ 241 ކޮމިޓީން ކުރިޔަށް އެބަގެންދެއެވެ.
