"ބޮޑުވަޒީރުކަމަށް ވެސް އެދޭނަން، ނިޒާމު ބަދަލުކުރުމުގައި ރައީސް ޔާމީން އެހީވެދޭނެ"

ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ބޭނުންފުޅުވަނީ ބޮޑުވަޒީރުކަން ކަމާއި އެމަގަށް ރާއްޖޭގެ ވެރިކަމުގެ ނިޒާމު ބައްޓަން ކުރެއްވުމުގެ މަސައްކަތް ކުރައްވާނެކަމީ މިހާރު އޮޅިފައި އޮންނަ ކަމެއް ނޫނެވެ. އަބަދުވެސް ބަރުލަމާނީ ނިޒާމަކަށް ތާއީދު ކުރައްވަމުން ގެންދަވާ ރައީސް ނަޝީދު ވަނީ ބަރުލަމާނީ ނިޒާމެއް ގެނެސް ބޮޑުވަޒީރުކަމަށް ވަޑައިގަތުމުގެ ޝައުގުވެރިކަން ފާޅުކުރައްވާ އެކަން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ އަރިހުގައިވެސް ދަންނަވާފައެވެ. އެކަމަށް ރައީސް ސާލިހު މިހާތަނަށް ދެއްވި ޖަވާބަކީ ވެރިކަމުގެ ނިޒާމު ބަދަލުކުރާނީ ރައްޔިތުން ކަމަށެވެ. އެއީ 2008 ވަނަ އަހަރު އެކުލަވާލެވުނު މިހާރު އަމަލުކުރަމުން އަންނަ ގާނޫނު އަސާސީގައި ވެރިކަމުގެ ނިޒާމު ހިމެނުމަށް އަމަލުކުރި ފަދައިންނެވެ.

ރައްޔިތުންގެ މަޖިލީހުގައި މިހާރު ހިނގަމުންދާ މިއަހަރުގެ ދެވަނަ ދައުރު މިހަފުތާގައި ނިމޭއިރު މަޖިލީހުގެ ރައީސަށް މިވަނީ "އާސްކް ސްޕީކާރ" ޕްރޮގްރާމްގައި ބަރުލަމާނީ ނިޒާމާއި 2023 ގައި އޮންނަ އިންތިޚާބެއްގައި އެމަނިކުފާނު ކަންތައް ކުރައްވާނެ ގޮތަކާއި ގުޅޭގޮތުން އާންމުންގެ ގިނަ ސުވާލުތަކެއް އަމާޒުކޮށްފައެވެ. އެންމެ ގިނަ ސުވާލު އަމާޒުވެގެންދިޔަ މައުޟޫއަކަށް މިމައުޟޫވާއިރު ރައީސް ނަޝީދު ވަނީ ތަކުރާރުކޮށް ބަރުލަމާނީ ނިޒާމު ގެނައުމުގެ ވާހަކަ ދައްކަވާފައެވެ.

ވެރިކަމުގެ ނިޒާމު ބަދަލުކުރުމަށް ރައްޔިތުންގެ ފެންނަ ނުފެންނަ ވޯޓަކަށް ދިޔުމަށް ރައީސް ނަޝީދު ދެކޮޅެއް ނުހައްދަވައެވެ. އެމަނިކުފާނު ދެކެވަޑައިގަންނަވާ ގޮތުގައި ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރަން ޖެހެނީ މިހާރު ރާއްޖޭގައި ހައްލުނުވެ ހުރި މައްސަލަތަކަށް ހައްލު ގެނައުމަށް އޮތް ގޮތަކީ ބަރުލަމާނީ ނިޒާމު ކަމަށްވުމެވެ. ރައީސް ނަޝީދު ވިދާޅުވީ ރިޔާސީ އިންތިޚާބެއް ރާއްޖޭގައި ބޭއްވުން އެއީ ބުއްދިވެރި ކަމެއް ނޫންކަމަށެވެ.

ރައީސް ނަޝީދު ވިދާޅުވީ ރައްޔިތުން އުންމީދުކުރި ފަދައިން ކަންކަން ނުވުމުގައި ނިޒާމުގެ މައްސަލަ އުޅޭކަމަށެވެ. އެހެންކަމުން ވެރިކަމުގެ ނިޒާމަށް ބަދަލުތަކެއް އަންނަންޖެހޭ ކަމަށް ދެކެވަޑައިގަންނަވާ ކަމަށް ވިދާޅުވިއެވެ.

ރައީސް ނަޝީދު ދެކެވަޑައިގަންނަވާ ގޮތުގައި ބަރުލަމާނީ ނިޒާމަށް ވެރިކަމުގެ ނިޒާމު ފުރޮޅާލުމަށް މާބޮޑު ހުރަސްތަކެއް ނެތެވެ. ބަރުލަމާނީ ނިޒާމަށް ތާއީދު ކުރައްވާކަމަށް ސީދާ ގޮތަކަށް މިހާތަނަށް އައިއިރު އެމަނިކުފާނުގެ އެންމެ ގާތް އެކުވެރިޔާ އަދި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެފައެއްނުވެއެވެ. ތާއީދު ކުރައްވާކަމަށް ވިދާޅުވެފައި ނުވާއިރު އެނިޒާމަށް ތާއީދު ނުކުރައްވާކަމަށްވެސް އަދި ވިދާޅުވެފައެއް ނުވެއެވެ. ރައީސް ނަޝީދު ދެކެވަޑައިގަންނަވާ ގޮތުގައި އެމަނިކުފާނު ކުރައްވާ އެއްވެސް ކަމެއްގައި ރައީސް ސާލިހު ފާޅުގައި ދެކޮޅެއް ނުވެސް ހައްދަވާނެއެވެ.

މީގެއިތުރުން ބަރުލަމާނީ ނިޒާމަށް ވެރިކަން ބަދަލުކުރުމުގައި ރައީސް ސާލިހަކީ އެއްގޮތަކަށްވެސް ހުރަހެއް ނޫންކަމަށް ވިދާޅުވިއެވެ. އަދި ރައީސް ސާލިހު ވެރިކަމަށް ގެނައުމުގައި އެންމެ ބޮޑަށް އެކަމަށް ތާއީދުކުރެއްވީ ޚުދު އެމަނިކުފާނުކަމަށް ވިދާޅުވިއެވެ.

މީގެއިތުރުން ވެރިކަމުގެ ނިޒާމާ ގުޅޭގޮތުން ރައީސް ސާލިހާއި އެމަނިކުފާނާ ދެމެދު ޚިޔާލުތަފާތުވުން އުފެދިފައިވީނަމަވެސް އެކަމުގައި އެދެބޭފުޅުންނަށް އެއްގަލަކަށް އެރުއްވޭނެ ކަމަށް ރައީސް ނަޝީދު ދެކެވަޑައިގަންނަވައެވެ. އެއީ ވެރިކަމުގެ ނިޒާމާއި ގުޅޭގޮތުން އެމްޑީޕީގައި މިހާރު އުފެދިފައިވާ ޚިޔާލު ތަފާތުވުންތަކާއެކު އެމްޑީޕީ ބައިބައިވެގެންދާނެ ކަމަށް ގަބޫލުފުޅު ނުކުރައްވާތީއެވެ. އެމްޑީޕީއަކީ އެޕާޓީގެ ޑިމޮކްރަޓިކް އުސޫލާއި އެއްގޮތަށް ކަންކަން ނިންމާ ޕާޓީއެއް ކަމަށް ވިދާޅުވިއެވެ.

ވެރިކަމުގެ ނިޒާމު ބަރުލަމާނީ ނިޒާމަށް ބަދަލުކުރުމުގައި މާބޮޑު ހުރަހެއް އޮތްކަމަށް ނަޝީދު ގަބޫލު ނުކުރައްވާ އަނެއް ސަބަބަކީ މިކަމުގައި އެމަނިކުފާނުގެ އެންމެ ބޮޑު ވާދަވެރިޔާ ކުރީގެ ރައީސް އަބްދުﷲ ޔާމީން އެކުގައި މަސައްކަތް ކުރައްވާނެތީއެވެ. ވެރިކަމުގެ ނިޒާމު ބަދަލުކުރުމަށް ގާނޫނު އަސާސީއަށް ބަދަލު ގެނައުމުގެ މަސައްކަތް ކުރަންޖެހޭއިރު އެމަސައްކަތް ކުރައްވާނެ ކަމަށް ވިދާޅުވިއެވެ. އަދި އެބަދަލު ގެނެވޭނެކަން ފާހަގަކުރައްވާ ވިދާޅުވީ އެބަދަލު ގެނައުމަށް ޕީޕީއެމްވެސް ތާއީދު ކުރާނެކަމަށެވެ.

ރައީސް ނަޝީދު ވިދާޅުވީ ރާއްޖޭގެ ރައްޔިތުންނަށް ދިމާވެފައިވާ މައްސަލަތަކަށް ހައްލުހޯދުމަށް ނިޒާމު ބަދަލުކުރުމަށް ޕީޕީއެމްއާ އެކުގައި މަސައްކަތްކޮށްގެން އެކަން ކުރެއްވޭނެކަމަށެވެ. ނިޒާމު ބަދަލުކުރުމާއެކު ބޮޑުވަޒީރުކަމަށް މީހަކު ގެނައުމުގެ މަސައްކަތް މަޖިލީހުގެ ތެރެއިން ކުރެވިގެންދާނެއެވެ. އެއާއެކު ބޮޑުވަޒީރުކަމަށް ވަޑައިގަތުމަށް ހުށަހަޅުއްވާނެކަމަށް ނަޝީދު ވިދާޅުވިއެވެ.

ދެން އޮތީ ކުރިޔަށް އޮތް ދެ އަހަރު ދުވަހުގެ ތެރޭގައި ނަޝީދު ދެކެވަޑައިގަންނަވަމުން އަންނަ ބޮޑުވަޒީރުކަމުގެ ހުވަފެންފުޅާ އެއްގޮތަށް ކަންކަން ނުވުމުން ދެން ކަންކުރައްވާނެ ގޮތެވެ. އެއީ ވެރިކަމުގެ ނިޒާމު ބަދަލުނުވުމެވެ. އެހެންވެއްޖެކަމަށްވާނަމަ 2023 ވަނަ އަހަރު އޮންނާނީ ރިޔާސީ އިންތިޚާބެކެވެ.

ނަޝީދު ވިދާޅުވީ 2023 ވަނަ އަހަރު ރިޔާސީ އިންތިޚާބު އޮންނަނަމަ އެމްޑީޕީގެ ރިޔާސީ ޕްރައިމަރީއެއް އޮންނާނެ ކަމަށެވެ. އަދި އެ ޕްރައިމަރީގައި އެމަނިކުފާނު ބައިވެރިވެވަޑައިގަންނަވާނެ ކަަމަށް ވިދާޅުވިއެވެ.

މީގެއިތުރުން ނަޝީދު ވިދާޅުވީ ކުރިޔަށް އޮތް ރިޔާސީ އިންތިޚާބުގައި ވާދަކުރައްވާނެ ކަމަށް ރައީސް ސާލިހު އެމަނިކުފާނު އަރިހުގައި ވިދާޅުވެފައިނުވާ ކަމަށެވެ. ނަމަވެސް ރައީސް ނަޝީދު އެއިންތިޚާބުގައި ވާދަކުރަން ބޭނުންފުޅުވާކަން ތަކުރާރުކޮށް ވިދާޅުވަމުން ގެންދަވާކަމަށް ވިދާޅުވިއެވެ.

ރައީސް ނަޝީދު ވިދާޅުވީ 2023 ގައި ރިޔާސީ އިންތިޚާބެއް އޮންނަނަމަ އެމްޑީޕީގެ ކެންޑިޑޭޓަކަށް ވާނީ އެމަނިކުފާނުކަމަށެވެ. އަދި ރައީސް ނަޝީދަށް ރިޔާސީ އިންތިޚާބުގައި ވާދަނުކުރެއްވޭނަމަ ރައީސް ސާލިހަށް އިންތިޚާބުގައި ތާއީދުކުރައްވާނަންތޯ ކުރެވުނު ސުވާލަށް ޖަވާބު ދެއްވަމުން ވިދާޅުވެފައިވަނީ " އަޅުގަނޑު ދެކޭ ގޮތުގައި އެމްޑީޕީގެ ކެންޑިޑޭޓަކަށް އަޅުގަނޑު ތާއީދުނުކުރާނެ ދުވަހެއް ނާންނާނެ." އެވެ.