އިންޑިއާގައި ކޮވިޑް-19 ޖެހިގެން 4 ލައްކައަށްވުރެ ގިނަ މީހުން މިހާތަނަށް މަރުވެއްޖެއެވެ.
ބޭރުގެ މީޑިއާތަކުން ރިޕޯޓު ކުރާ ގޮތުގައި މިހާތަނަށް އެ ގައުމުން ޖުމްލަ 401،243 މީހަކު މި ބަލީގައި ވަނީ މަރުވެފައެވެ. މީގެ ތެރެއިން ދެބައިކުޅަ އެއްބައި މީހުން މަރުވީ ފާއިތުވި ދެ މަސްތެރޭގައި ކަމަށް ވެސް ވަނީ ރިޕޯޓުކޮށްފައެވެ.
އިންޑިއާގައި ކޮވިޑުގެ ހާލަތު އިންތިހާއަށް ގޯސްވެފައިވާއިރު ވިރުލެންޓް ޑެލްޓާ ވޭރިއަންޓް ވަނީ ދުވާލެއްގެ މައްޗަށް އެތައް ހާސް މީހުންނަށް ޖެހިފައެވެ. އިންޑިއާގައި އެންމެ ފުރަތަމަ ކޮވިޑު ޖެހިގެން މީހަކު މަރުވީ މިދިޔަ އަހަރުގެ މާރޗް މަހުގެ 12 ވަނަ ދުވަހުއެވެ. އާބާދީގައި 1.4 ބިލިއަން މީހުން ހިމެނޭ އިންޑިއާގައި 30.4 މިލިއަން މީހުންނަށް ކޮވިޑު ޖެހިގެން މިހާތަނަށް ވަނީ ރިޕޯޓްކޮށްފައެވެ.
އިންޑިއާގައި ވެކްސިންގެ ދެ ޑޯޒް ޖަހާފައިވަނީ ވެކްސިން ޖަހާ އަބާދީގެ 5 އިންސައްތަށްވުރެ ދަށް މީހުންނެވެ. މިއަހަރުގެ ޖެނުއަރީ މަހުގެ މެދުތެރެއިން ފެށިގެން މިހާތަަނަށް 340 މިލިއަން ޑޯޒްގެ ވެކްސިން އިންޑިއާގައި ދީފައިވެއެވެ. ބުދަ ދުވަހު އެ ގައުމުގެ ހެލްތް މިނިސްޓަރ ހަރްޝް ވަރްދަން ވިދާޅުވީ ސަރުކާރުން ވެކްސިންގެ 75 އިންސައްތަ ހިލޭ ސްޓޭޓްތަަކަށް ފޯރުކޮށްދޭން ފެށުމާއެކު، ވެކްސިން ޖަހާ ސްޕީޑް އިތުރުވެފައިވާ ކަމަށެވެ.
އިންޑިއާގައި ޑެލްޓާ އަދި ޑެލްޓާ ޕްލަސް ވޭރިއަންޓް ހަލުވިކަމާއެކު ފެތުރެމުންދާއިރު އޭގެ އަސަރު ބޮޑަށް ކުރަނީ ވެކްސިން ނުޖަހާ ތިބި މީހުންނަށެވެ. އެގައުމުގެ އާބާދީގެ ދެބައިކުޅަ އެއްބައި މީހުން ތިބީ ވެކްސިން ނުޖަހައެވެ. އެގޮތުން އިންޑިއާގެ ބޮޑެތި މީހުންގެ އާބާދީގެ 6 އިންސައްތަވެސް އަދި ވެކްސިން ޖަހާފައެއް ނުވެއެވެ.
އިންޑިއާގައި މިހާރު ރިކޯޑް އަދަދަކަށް މީހުން ދަނީ ކޮވިޑަށް ޕޮޒިޓިވްވަމުންނެވެ. އޭގެ ތެރޭގައި ޒުވާނުންނާއި ކުޑަކުދިން ވެސް ގިނަ އަދަދަކަށް ހިމެނޭ ކަމަށް ރިޕޯޓުތައް ބުނެއެވެ. އިންޑިއާއިން ފެނިފައިވާ އައު ވޭރިއެންޓަކީ ހުރިހާ އުމުރަކަށް ވެސް ނުރައްކާ ވޭރިއެންޓެއް ކަމަށާއި މި ވޭރިއެންޓުގައި ޒުވާނުންނަށް ބަލި ޖެހި ފަރުވާ ހޯދަން ވެސް ޖެހިފައިވާ ކަމަށް ރިޕޯޓުތައް ބުނެއެވެ.
އިންޑިއާއިން ފެނިފައިވާ ކޮވިޑް-19 ގެ ވޭރިއެންޓް 17 ގައުމަކުން ފެނިފައިވާ ކަމަށް ދުނިޔޭގެ ސިއްހަތު ޖަމިއްޔާއިން މީގެ ކުރިން ވަނީ ބުނެފައެވެ. ޑެޓާބޭސްއިން ދައްކާގޮތުން އެންމެ ގިނައިން އެ ވޭރިއެންޓް ފެނިގެން ރިޕޯޓު ކޮށްފައިވަނީ އިންޑިއާ އާއި، އެމެރިކާ، އަދި އިނގިރޭސި ވިލާތުންނާއި ސިންގަޕޫރުންނެވެ.
