މި އަހަރުގެ ޖެނުއަރީ 1ން ފެށިގެން ޖޫން 30 ގެ ނިޔަަލަށް 532 މައްސަލައެއްގެ ގާނޫނީ ލަފާ އެޓާނީ ޖެނެރަލްގެ އޮފީހުން ދީފިއެވެ.

އެ އޮފީހުން އާންމުކުރި ތަފާސް ހިސާބުތަކަށް ބަލާއިރު ދައުލަތުގެ މުއައްސަސާތަކުން ލަފާ ހޯދުމަށްޓަކައި ޖުމްލަ 520 މައްސަލައެއް ހުށަހަޅާފައިވާއިރު 532 ކަމަކާ ގުޅޭ ގޮތުން ލަފާ ދީފައިވެއެވެ.

އޭގެތެރެއިން ބިލް ތަސްދީގު ކުރުމާ ގުޅޭ ގޮތުން 12 ލަފާދީފައިވާއިރު އެއްބަސްވުންތަކުގައި ސޮއި ކުރުމާ ގުޅޭ ގޮތުން 154 ލަފާ ވަނީ ދީފައެވެ. ޤަވާއިދުތަކާ ގުޅޭ ގޮތުން 107 ލަފާ ދީފައިވާއިރު އުސޫލުތަކާ ގުޅޭ ގޮތުން 18 ލަފާ ވަނީ ދީފައެވެ. އަދި މުއާހަދާތަކާ ގުޅޭ ގޮތުން 2 ލަފާ ދީފައިވާއިރު އެހެނިހެން ކަންކަމާ ގުޅޭ ގޮތުން 239 ލަފާ ވަނީ ދީފައެވެ.

މިދިޔަ އަހަރު އޭޖީ އޮފީހުން ގިނަ މަސައްކަތްތަކެއް ވަނީ ކޮށްފައެވެ. އެގޮތުން ދައުލަތުގެ މުއައްސަސާތަކުން ލަފާ ހޯދުމަށްޓަކައި ޖުމްލަ 842 މައްސަލައެއް ހުށަހަޅާފައިވާއިރު 841 ކަމަކާ ގުޅޭ ގޮތުން މިދިޔަ އަހަރު ވަނީ ލަފާ ދީފައެވެ. އޭޖީ އޮފީހުގެ މަސައްކަތްތަކާ ބެހޭގޮތުން މިދިޔަ އަހަރު އެޓާނީ ޖެނެރަލް އިބްރާހީމް ރިފްއަތު ވިދާޅުވެފައިވަނީ އެ އަހަރަކީ ހުރިހާ ގޮތަކުން ވެސް ދަތި އުނދަގޫވި ދުވަސްވަރެއް ކަމަށެވެ. އެގޮތުން މަސައްކަތްތައް އައު ގޮތްތަކަކަށް ބައްޓަން ކުރަން ޖެހުނު ކަމަށާއި ޤާނޫނީ ލަފާ ދިނުމާއި މައްސަލަތަކާ ގުޅިގެން މުވައްޒަފުން ކުރި މަސައްކަތަށް ވެސް ތަޢުރީފު ޙައްޤު ކަމަށް ވިދާޅުވިއެވެ.

އޭޖީ އޮފީހުން ގިނަ މައްސަލަތަކަށް ލަފާ ދީފައިވާއިރު މިދިޔަ އަހަރު ވަނީ މޯލްޑިވްސް އިންޓަރނޭޝަނަލް އާބިޓްރޭޝަން ސެންޓަރު (އެމްއައިއޭސީ) ޤާއިމުކޮށް ޚިދުމަތް ދޭން ފަށާފައެވެ.

އާބިޓްރޭޝަން ސެންޓަރަކީ ރާއްޖޭގައި އާބިޓްރޭޝަން ކުރިއަރުވައި، އެކަމަށް މަގުފަހިކޮށްދިނުމާއި އެކަމާބެހޭ އުސޫލުތައް ކަނޑައަޅާ ސެންޓަރެވެ.