ގައިދުރުކަމާއެކު ޖަމާއަތުގައި ނަމާދު ކުރެވޭގޮތަށް، ޖުލައި 1ވާ ބުރާސްފަތި ދުވަހުގެ ރޭ ފަތިސްނަމާދުން ފެށިގެން ގްރޭޓަރ މާލެ ސަރަހައްދުގައި ހިމެނޭ ހުރިހާ މިސްކިތްތަކެއް ހުޅުވާލައިފިއެވެ.

އިސްލާމިކް މިނިސްޓްރީން ބުނީ، ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ހަލުވިކަމާއެކު ފެތުރެމުންދާތީ ޖަމާއަތުގައި ނަމާދުކުރުން މެދުކަނޑާލާފައި އޮތުމަށްފަހު، 01 ޖުލައި 2021ވާ ބުރާސްފަތި ދުވަހުގެރޭ ފަތިސް ނަމާދުން ފެށިގެން ގްރޭޓަރ މާލެ ސަރަހައްދުގައި ހިމެނޭ ހުރިހާ މިސްކިތްތަކެއްގައި ގައިދުރުކަމާއެކު ޖަމާއަތުގައި ނަމާދު ކުރެވޭގޮތަށް ހުޅުވާލާފައިވާ ކަމަށެވެ.

މިހާލަތުގައި މިސްކިތްތަކުގައި ޖަމާއަތުގައި ނަމާދުކުރަން ފެށިކަމުގައިވިއަސް ރައްކާތެރިކަމުގެ ފިޔަވަޅުތަކެއްގެ ގޮތުން މިނިސްޓްރީންނާއި ދައުލަތުން ކަނޑައަޅާ ކަންތައްތަކަށް ޚާއްސަ ސަމާލުކަމެއް ދިނުމަށް އިލްތިމާސްކޮށްފައިވެއެވެ. އެގޮތުން މިސްކިތަށް ދާއިރު މާސްކު އެޅުމަށާއި، މުސައްލަ ގެންދިއުމަށާއި، ތިމާއާއި އެހެން މީހުންގެ ރައްކާތެރިކަމަށްޓަކައި ގައިދުރު ކަމާއެކު ނަމާދުގެ ޖަމާއަތްތައް ހެދުމަށް އެދިފައިވެއެވެ.

ހުރިހާ ހާލަތެއްގައިވެސް ކަމާގުޅޭ ފަރާތްތަކުންދޭ އިރުޝާދުތަކާ އެއްގޮތަށް އަމަލުކުރުމުގެ އިތުރުން، މިހާލަތުން ސަލާމަތްކޮށް ކޮށްދެއްވުން އެދި ﷲގެ ޙަޟްރަތުގައި ދުއާކޮށް، ސަބަބުތަކުގައި ހިފައި، ފުރިހަމައަށް ﷲ އަށް ވަކީލުކޮށް އުޅުމަށް މިނިސްޓްރީން ވަނީ ނަސޭހަތް ދީފައެވެ.

ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ވައިރަސް ރާއްޖޭގައި ވެސް ހަލުވިކަމާއެކު ފެތުރެމުންދާތީ، ހާލަތަށް ރިއާޔަތްކޮށް، އިތުރަށް މިވައިރަސް ރާއްޖޭގައި ފެތުރުން ހުއްޓުވުމަށްޓަކައި އަޅާ ރައްކާތެރިކަމުގެ މުހިންމު ފިޔަވަޅެއްގެ ގޮތުން، އިސްލާމީ ފަތުވާދޭ އެންމެ މަތީ މަޖިލީހާއި ދީނީ އިލްމުވެރިންގެ ލަފާގެ މަތިން، މިސްކިތްތަކުގައި ޖަމާއަތުގައި ނަމާދުކުރުން މެދުކަނޑާލީ މެއި މަހުގެ 19 ވަނަ ދުވަހެވެ.

ބައެއް މީހުން މިސްކިތްތަކުގައި ގައިދުރުކަމެއް ނެތި، ޖަމާއަތް ހަދައިގެން ނަމާދުކުރަމުންދާތީ، އާންމު މަސްލަހަތަށް ރިއާޔަތްކޮށް، ރައްކާތެރިކަމުގެ ފިޔަވަޅެއްގެ ގޮތުން މިސްކިތްތައް ބަންދު ކުރުމަށް ނިންމީ މެއި މަހުގެ 26 ވަނަ ދުވަހުއެވެ. ނަމަވެސް މިސްކިތްތައް ބަންދުކުރަން ނިންމިކަމުގައި ވިއަސް ޚާއްސަ ހާލަތްތަކުގައި ބައެއް މީހުން މިސްކިތްތައް ބޭނުން ކުރަމުންދާތީ، މާލެ ސަރަހައްދުގައި ހިމެނޭ 40 މިސްކިތުގެ ތެރެއިން 37 މިސްކިތުގައި ނަމާދު ކުރުމާއި، ފާޚާނާކުރުމާއި، ވުޟޫ ކުރެވޭނެ އިންތިޒާމު ޖޫން މަހުގެ 1ވަނަ ދުވަހުން ފެށިގެން ހަމަޖެއްސިއެވެ.