އިންޑިއާގެ ނެޝަނަލް އިންޓަ ސްޓޭޓް ސީނިއާ އެތުލެޓިކްސް ޗެމްޕިއަންޝިޕުގައި ރާއްޖޭގެ ގައުމީ ޖާޒީ ލައިގެން އިންޑިއާގެ އަންހެން އެތުލީޓަކު ދުވެފިއެވެ.
މި މަހު 25 އިން 29 އަށް އިންޑިއާގައި ކުރިއަށްދިޔަ މި މުބާރާތުގައި ބައިވެރިވާން ރާއްޖޭން ހަތަރު އެތުލީޓަކު އިންޑިއާއަށް ދިޔައިރު، އޭގެ ތެރެއިން އެއް އެތުލީޓަކު ވަނީ ކޮވިޑް-19 އަށް ޕޮޒިޓިވްވެފައެވެ. އެއާއެކު މި މުބާރާތުގައި ރާއްޖެއިން ބައިވެރިވީ އިންޑިއާ އެތުލީޓަކު ޓީމުގައި ހިމަނައިގެންނެވެ. މައުލޫމާތު ލިބޭ ގޮތުން އިންޑިއާގެ އެތުލީޓު ބޭނުންކޮށްފައިވަނީ ރާއްޖޭގެ ގައުމީ ޕްރެކްޓިސް ޖާޒީއެވެ.
"ރާއްޖެ.އެމްވީ" އަށް ދެއްވި އިންޓަވިއުއެއްގައި އެތުލެޓިކްސް އެސޯސިއޭޝަން އޮފް މޯލްޑިވްސްގެ ރައީސް މުޙައްމަދު ތޮލާލް ވިދާޅުވީ މި މުބާރާތުގައި ބައިވެރިވާން ރާއްޖޭން ހަތަރު އެތުލީޓުން ދަތުރުކުރި ކަމަށާއި، އެކަމަކު އޭގެ ތެރެއިން އެއް އެތުލީޓަކު ކޮވިޑަށް ޕޮޒިޓިވްވުމުން އިންޑިއާގެ އެތުލީޓަކު ޓީމުގައި ހިމެނީ ކަމަށެވެ. އަދި ޓީމުގައި އިންޑިއާގެ އެތުލީޓަކު ހިމެނުމަށް ނިންމީ މުބާރާތް އިންތިޒާމުކުރާ ފަރާތްތަކާ ވާހަކަ ދެއްކުމަށްފަހު ކަމަށާއި، އެ ނިންމުން ނިންމީ ރާއްޖޭން މި މުބާރާތުގައި ބައިވެރިވާން ދިޔަ ދުވުންތެރިންނަށް ފުރުސަތު ގެއްލުނަ ނުދިނުމަށް ކަމަށްވެސް ވިދާޅުވިއެވެ.
ތޮލާލް ވިދާޅުވީ މި މުބާރާތުގައި ބައިވެރިވި ޓީމަށް ކީ ނަމަކީ "މޯލްޑިވްސް މިކްސް" ކަމަށާއި، މިއީ ފަރިތަކުރުމަށް ބައިވެރިވި މުބާރާތެއް ކަމަށެވެ. އެގޮތުން މިއީ އެތުލެޓީނުންގެ ޓައިމިން ޗެކް ކޮއްލުމުގެ ގޮތުން ބައިވެރިވި މުބާރާތެއް ކަމަށްވެސް ވިދާޅުވިއެވެ. ތޮލާލް އިތުރަށް ވިދާޅުވީ ރާއްޖޭގެ ޕްރެކްޓިސް ޖާޒީއެއް ލައިގެން އެހެން ގައުމެއްގެ ދުވުންތެރިއެއް ދުވިނަމަ އެ ވާހަކައެއް ނުދައްކާނެ ކަމަށާއި، މިއީ ސިޔާސީ ކޮށްލައިގެން ދައްކާ ވާހަކައެއް ކަމަށެވެ. އަދި ކޮވިޑާ ގުޅިގެން ރާއްޖޭގެ އެތުލީޓުންނަށް މުބާރާތްތަކުގައި ބައިވެރިވުމަށް ގޮންޖެހުންތަކެއް އެބަހުރި ކަމަށާއި، އެގޮތުން ދިވެހި އެތުލީޓުން މުބާރާތެއްގައި ބައިވެރިނުވާތާ ދެއަހަރު ވެފައިވާކަން ތޮލާލް ވަނީ ފާހަގަކުރައްވާފައެވެ.
އިންޑިއާގެ މުބާރާތުގައި ރާއްޖޭގެ ފިރިހެން ރިލޭ ޓީމުވެސް ވާދަކުރިއެވެ. މި އަހަރުގެ އިންޑިއަން ސްޓޭޓް ޗެމްޕިއަންޝިޕްގައި ރާއްޖޭން ވާދަކުރިއިރު، މި މުބާރާތުގައި 2014 އަދި 2019 ވަނަ އަހަރުވެސް ރާއްޖޭން ވަނީ ވާދަކޮށްފައެވެ. މިފަހަރު މުބާރާތުގައި ސްރީ ލަންކާ، ބަންގްލަދޭޝް، ބޫޓާން އަދި ކަޒަކިސްތާނުންވެސް ވަނީ ވާދަކޮށްފައެވެ.
