މާލެ ސަރަހައްދުގެ މިސްކިތްތަކުގައި ގައިދުރުކަމާއެކު ޖަމާއަތުގައި ނަމާދު ކުރުމުގެ ހުއްދަ ދީފިއެވެ.

ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ރައީސް ސާލިހު ވިދާޅުވީ ކޮވިޑް-19 ކޮންޓްރޯލް ކުރުމަށް އަޅާފައިވާ ފިޔަވަޅުތަކަށް ބޮޑެތި ލުއިތަކެއް ދިނުމަށް ނިންމާފައިވާ ކަމަށެވެ. އެގޮތުން މިސްކިތްތަކުގައި ގައިދުރުކޮށް ޖަމާއަތުގައި ނަމާދުކުރުމުގެ ހުއްދަ ޖުލައި އެކަކުން ފެށިގެން ދީފައިވާ ކަމަށް އެމަނިކުފާނު ވިދާޅުވިއެވެ.

ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ވައިރަސް ރާއްޖޭގައި ވެސް ހަލުވިކަމާއެކު ފެތުރެމުންދާތީ، ހާލަތަށް ރިއާޔަތްކޮށް، އިތުރަށް މިވައިރަސް ރާއްޖޭގައި ފެތުރުން ހުއްޓުވުމަށްޓަކައި އަޅާ ރައްކާތެރިކަމުގެ މުހިންމު ފިޔަވަޅެއްގެ ގޮތުން، އިސްލާމީ ފަތުވާދޭ އެންމެ މަތީ މަޖިލީހާއި ދީނީ އިލްމުވެރިންގެ ލަފާގެ މަތިން، 19 މެއިން ފެށިގެން މިސްކިތްތަކުގައި ޖަމާއަތުގައި ނަމާދުކުރުން މެދުކަނޑާލިއެވެ.

ބައެއް މީހުން މިސްކިތްތަކުގައި ގައިދުރުކަމެއް ނެތި، ޖަމާއަތް ހަދައިގެން ނަމާދުކުރަމުންދާތީ، އާންމު މަސްލަހަތަށް ރިއާޔަތްކޮށް، ރައްކާތެރިކަމުގެ ފިޔަވަޅެއްގެ ގޮތުން މިސްކިތްތައް ބަންދު ކުރުމަށް ނިންމީ މެއި މަހުގެ 26 ވަނަ ދުވަހުއެވެ. ނަމަވެސް މިސްކިތްތައް ބަންދުކުރަން ނިންމިކަމުގައި ވިއަސް ޚާއްސަ ހާލަތްތަކުގައި ބައެއް މީހުން މިސްކިތްތައް ބޭނުން ކުރަމުންދާތީ، މާލެ ސަރަހައްދުގައި ހިމެނޭ 40 މިސްކިތުގެ ތެރެއިން 37 މިސްކިތުގައި ނަމާދު ކުރުމާއި، ފާޚާނާކުރުމާއި، ވުޟޫ ކުރެވޭނެ އިންތިޒާމު ޖޫން މަހުގެ އެއްވަނަ ދުވަހުން ފެށިގެން ހަމަޖެއްސިއެވެ.

މާލެ ސަރަހައްދުގެ މިސްކިތްތަކުގައި ގައިދުރުކަމާއެކު ޖަމާއަތުގައި ނަމާދު ކުރުމަށް އަލުން ހުޅުވާލާފައިވާއިރު ކޮވިޑް-19 ކޮންޓްރޯލް ކުރުމަށް އަޅާފައިވާ ފިޔަވަޅުތަކާ އެއްގޮތަށް އަމަލުކުރުމަށް އިސްލާމިކް މިނިސްޓްރީން އިލްތިމާސްކޮށްފައިވެއެވެ. މިސްކިތަށްދާ ބައެއް މީހުން އުސޫލާއި ޚިލާފުވާކަމުގެ ޝަކުވާ މަދުން ނަމަވެސް ލިބޭކަން މިނިސްޓްރީން މީގެ ކުރިން ފާހަގަކޮށްފައިވެއެވެ.