13 އަހަރުގެ ކުއްޖާ މަރާލި މައްސަލާގައި ނަގާފައިވާ ބަޔާންތައް ޕްރޮސެކިއުޓަރ ޖެނެރަލް (ޕީޖީ) ޙުސައިން ޝަމީމްއާ ފުލުހުން ހިއްސާކޮށްފިއެވެ.

ޝަމީމްގެ އަމިއްލަ ބްލޮގްގައި ނެރުނު އޯޑިއޯ ޕޯސްޓެއްގައި ވިދާޅުވީ މި މައްސަލައިގެ ތަހުގީގު ފުލުހުން ވަރަށް ބާރަށް ކުރިއަށްގެންދާ ކަމަށާއި، ފުލުހުންގެ އިންވެސްޓިގޭޝަން ޓީމާއި ޕްރޮސެކިއުޓަރުން އާދިއްތަ ދުވަހު ބައްދަލުކޮށްފައިވާ ކަަމަށެވެ. އެގޮތުން މައްސަލާގައި ކުރިއަށްދާނެގޮތާ ގުޅޭގޮތުންނާއި އިތުރަށް ހޯދަން ޖެހޭ ކަންތައްތައް ޕްރޮސެކިއުޓަރުން ވިދާޅުވި ކަމަށް ޝަމީމް ފާހަގަކުރެއްވިއެވެ.

އެ ކުއްޖާ މަރާލި މައްސަލާގައި ނަގާފައިވާ ބަޔާންތައް ޕްރޮސެކިއުޓަރ ޖެނެރަލްއާ ފުލުހުން ހިއްސާކޮށްފައިވާއިރު ކުއްޖާގެ ހަށިގަނޑު ޕޯސްޓްމޯޓަމް ހެދުމަށް މިހަފްތާ ތެރޭގައި އިންޑިއާއަށް ފޮނުވާލުމަށް މަސައްކަތް ކުރަމުންދާ ކަމަށް ފުލުހުން ވަނީ ދާދިފަހުން ހާމަކޮށްފައެވެ.

13 އަހަރުގެ ފިރިހެން ކުއްޖަކު ރަހީނުކޮށްގެން ގެންގުޅޭ މައްސަލައެއް ޖޫން މަހުގެ 20 ވަނަ ދުވަހު ފުލުހުންނަށް ރިޕޯޓުކޮށްފައިވުމާއެކު އެ ކުއްޖާ ހޯދުމުގެ މަސައްކަތް ކުރަމުންދަނިކޮށް، ކުއްޖާ މަރާލާފައި އޮއްވައި ފެނުނީ ޖޫން މަހުގެ 21 ވަނަ ދުވަހުގެ ރޭ، ދަންވަރު 2:38ހާއިރުއެވެ.

މި މައްސަލައާ ގުޅިގެން 17 އަހަރުގެ ދިވެހި ފިރިހެން ކުއްޖަކާއި، 27 އަހަރުގެ ދިވެހި ފިރިހެނަކު ހައްޔަރުކޮށްފައިވެއެވެ. 27 އަހަރުގެ މީހާ ޝަރީއަތް ނިމެންދެން ބަންދުކުރުމަށް ނިންމާފައިވާއިރު، 17 އަހަރުގެ ކުއްޖާގެ ބަންދަށް 15 ދުވަސް ވަނީ ޖަހާފައެވެ. ދެ މީހުންގެ މައްޗަށް ވެސް ގަސްދުގައި މީހަކު މެރުން، މާރާމާރީ ހިންގުން، ރަހީނުކުރުން، އަދި ކުޑަކުއްޖަކަށް ޖިންސީ ގޯނާކުރުމުގެ ތުހުމަތު ވަނީ ކޮށްފައެވެ.

ފުލުުހުން މި މައްސަލަ ވަރަށް ސީރިއަސް މައްސަލައެއްގެ ގޮތުގައި ތަހުގީގު ކުރަމުން އަންނައިރު، ފުލުހުން ބުނެފައިވަނީ ތަހުގީގަށް ބޮޑު ކުރިއެރުމެއް ލިބިފައިވާ ކަމަށެވެ.