ކަޝްމީރުގެ ޕާކިސްތާނާވީ ފަޅިން ގިނަ އަދަދެއްގެ ހެރޮއިން އަތުލައިގެންފި

ޖައްމު ކަޝްމީރުގެ ޕާކިސްތާނާވީ ފަޅިން 27 ކިލޯގެ ހެރޮއިން އަތުލައިގެންފައިވާ ކަމަށް އެ ސަރަހައްދުގެ ބޯޑަރު ބަލަހައްޓަމުންދާ ބޯޑަރ ސެކިއުރިޓީ ފޯސްއިން ބުނެފިއެވެ.

ބޯޑަރ ސެކިއުރިޓީ ފޯސްއިން ބުނީ ކަޝްމީރުގެ ޕާކިސްތާނާވީ ފަޅިން އިންޑިއާވީ ފަޅިއަށް އެތެރެކުރަން އުޅުމުގެ ތެރޭގައި 27 ޕެކެޓް ހެރޮއިން އަތުލައިގެންފައިވާ ކަމަށާއި، މި ތަކެތީގައި 27 ކިލޯ ހުރި ކަމަށެވެ. އަދި މި ތަކެތީގެ މަގުމަތީ އަގު 135 ކްރޯޑް އަށް އަރާކަމަށް ބޯޑަރ ސެކިއުރިޓީ ފޯސްއިން ބުނެއެވެ.

މި މައްސަލައިގައި ތިން މީހަކު ހައްޔަރު ކޮށްފައިވާ ކަމަށް އިންޑިއާގެ ފުލުހުން ވަނީ ބުނެފައެވެ. އަދި މައްސަލަ މިހާރު ތަހުގީގު ކުރަމުން އަންނަ ކަމަށް ފުލުހުން ވަނީ ބުނެފައެވެ. ފުލުހުން އިތުރަށް ބުނީ ކަޝްމީރު ބޯޑަރުން އިންޑިއާއަށް ގިނަ އަދަދެއްގެ މަސްތުވާތަކެތި އެތެރެކުރަމުން އަންނަ ކަމަށް މައުލޫމާތު ލިބިފައިވާ ކަމަށާއި، އެހެންކަމުން ކަޝްމީރު ބޯޑަރު ސަރަހައްދުގެ ސަލާމަތީ ކަންކަން އިތުރަށް ވަރުގަދަކޮށްފައިވާ ކަމަށެވެ.