172 މީހުން ކޮވިޑަށް ޕޮޒިޓިވްވެއްޖެ
މާލެ ސަރަހައްދުން ޕޮޒިޓިވްވީ 66 މީހުން
ކޮވިޑް19 އަށް ޓެސްޓު ކުރުމަށް ސާމްޕަލް ނަގައިގެންދަނީ
ފާއިތުވެދިޔަ 24 ގަޑިއިރުގެ ތެރޭގައި 172 މީހުން ކޮވިޑަށް ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން އާންމުކޮށްފައިވާ ތަފާސްހިސާބުތަކަށް ބަލާއިރު ޕޮޒިޓިވްވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 66 މީހުންނާއި، ރަށްރަށުން ޕޮޒިޓިވްވި 96 މީހުންނެވެ. މީގެއިތުރުން ރިސޯޓްތަކުން 10 މީހަކު ޕޮޒިޓިވްވެފައި ވެއެވެ.
މި އަދަދާއެކު މިހާތަނަށް ރާއްޖޭން ޖުމްލަ 72،466 މީހަކު ވަނީ ކޮވިޑަށް ޕޮޒިޓިވްވެފައެވެ. މިހާތަނަށް ޖުމްލަ 67،886 މީހުން ވަނީ ބަލިން ރަނގަޅުވެފައެވެ.
އެކްޓިވް ކޭސްގެ ގޮތުގައި ހިމެނެނީ 4،362 މީހުންނެވެ. މީގެ ތެރެއިން 41 މީހަކު އެޑްމިޓް ކޮށްގެން ދަނީ ފަރުވާ ދެމުންނެވެ. މި ބަލީގައި މިހާތަނަށް 207 މީހަކު ވަނީ ނިޔާވެފައެވެ.
ރާއްޖޭގައި ކޮވިޑްގެ ހާލަތު އެންމެ ގޯސްވާން ފަށާފައިވަނީ މިދިޔަ މެއިމަހުގެ ތެރޭގައެވެ. އެއާއެކު ސަރުކާރުން އެޅި ހަރުކަށި ފިޔަވަޅުތަކަށްފަހު ކޭސްތައް މިހާރު ވަނީ މަދުވާން ފަށާފައެވެ. ކޭސްތައް މަދުވާން ފެށުމާއެކު، ސަރުކާރުން ވަނީ ބައެއް ފިޔަވަޅުތަކަށް ލުއިދޭން ފަށާފައެވެ.
