ކާއެއްޗެއް ނުލިބިގެން ބަދިގެ ފަޅާލާފައި ވަނީ އެތެއް!

ދިރިއުޅެމުންދާ މާހައުލު ކުޑަވެ ކާއެއްޗެއް ހޯދަން ގެއެއްގެ ބަދިގެ ފަޅާލާފައި އެތެއް ވަދެއްޖެއެވެ.

ދަންވަރު ވަގުތެއްގައި އަޑުފައްގަޑެއް އިވިގެން ތައިލެންޑުގު ހުވާ ހިން އަވަށެއްގައި ދިރިއުޅެމުން އައި އަންހެނެއް އޭނާގެ ބަދިގެ ބެލިއިރު އިރު، ބަދިގޭގެ ބިތް ފަޅާލައިގެން ކާ އެއްޗެއް ހޯދަން ވަދެ އޮތީ އެތެއް ކަމަށް ސީއެންއެންގައި ވަނީ ރިޕޯޓްކޮށްފައެވެ. އެގޭގެ ވެރިމީހާ ބުނީ ދަންވަރު ގަޑީގައި އަޑެއް އިވިގެން ބަލާލި އިރު އުދުން ހުންނަ ދިމާލުން ފާރު ފަޅާފައި އެތް އޮތީ ކާއެއްޗެއް ހޯދަން ބޯ ދިއްކޮށްގެން ކަމަށެވެ.

ސީއެންއެންގައި ރިޕޯޓްކޮށްފައިވާ ގޮތުން އެގޭގެ ބަދިގެ ފަރާތު ފާރުގައި ލޯވަޅެއް ހެދިފައި ހުއްޓެވެ. އަދި އެތް ބަދިގެއަށް ވަނީ އެ ދިމާލުން ފާރު ފަޅާލާފައެވެ. އަދި ކާއެއްޗެއް ހޯދަން އެސޮރުގެ ނޭފަތް އެކި ތަންތަނަށް ހޫރަމުން ގެންދިޔަ ކަމަށެވެ. އަދި އެތަނުން ޕްލާސްޓިކް ކޮތަޅެއް ކެއި މަންޒަރު ގޭގެ ވެރި މީހާ ކުރި ވީޑިއޯގައި ފެންނަ ކަމަށް ރިޕޯޓްކޮށްފައިވެއެވެ.

އެގޭގެ ވެރިމީހާ ބުނީ އެ ސަރަހައްދުގައި އުޅޭ ވަލު އެތް ކާ އެއްޗެހި ހޯދުމަށް އެ ހިސާބުގަނޑުގައި އުޅޭ މަންޒަރު ކުޑަ އިރުން ފެށިގެން ވެސް ފެންނަ ކަމަށެވެ. އަދި މިއީ ކާއެއްޗެއް ހޯދަން ގެއަށް ގެއްލުމެއް ދީގެން ވަތް ފުރަތަމަ ފަހަރުކަމަށް ގޭގެ ވެރި މީހާ ރަޗާޑަވަން ވަނީ ބުނެފައެވެ. އަދި އެ ހާދިސާ ހިނގި އިރު ބަދިގޭގައި އެއްވެސް ކަހަލަ ކާއެއްޗެއް ނުހުންނާނެ ކަމަށާއި، ނަމަވެސް އެތަނުގައި ހުރި ލޮނު ފުޅި ނަގަން އުޅުނު ކަމަށް ބެލެވޭ ކަމަށެވެ.

ތައިލެންޑުގެ ޑިޕާޓްމަންޓް އޮފް ނެޝަނަލް ޕާކް، ވައިލްޑްލައިފް އެންޑް ޕްލާންޓް ކޮންސަރވޭޝަނުން ބުނެފައިވަނީ ބަދިގެ ފަޅާލާފައި އެތް ވަނީ ކާއެއްޗެހީގެ ވަސް ދުވައިގެން ކަމަށާއި، އެތަކީ ފަތްޕިލާވެލީގެ ބާވަތް ކައި އުޅޭ ޖަނަވާރެއް ކަމުން، އެ ތަކެއްޗަށް މިނެރަލް ގިނަ އަދަދަކަށް ބޭނުންވާ ކަމަށެވެ.

ރަޗާޑަވަންގެ ގޭގެ ބަދިގެ އެތް ފަޅާލާފައިވަނީ އެ ގެ ހުންނަނީ އެ އަވަށުގެ ނެޝަނަލް ޕާކަށް ވަންނަ ދިމާލުގައި އެ ގެ ހުންނާތީ ކަމަށް ޑިޕާޓްމަންޓުން ވަނީ ބުނެފައެވެ. މިފަދަ އެހެން ހާދިސާތައް ވެސް ހިނގަމުންދާ ކަމަށް ރިޕޯޓްކޮށްފައިވާ އިރު، އެ ރިޕޯޓްތައް ދައްކާ ގޮތުން މިފަދަ ހާދިސާތައް ހިނގަނީ އެސޮރުމެން އުޅޭ މާހައުލާއި މާ ބޮޑަށް ކައިރީގައި އިންސާނުން ދިރިއުޅޭތީ ކަމަށް ބުނެފައިވެއެވެ. އަދި އާންމުކޮށް މިފަދަ ހާދިސާތައް ރިޕޯޓުކުރަނީ މޭވާ ދޮންވެ ފައްކާވާ ދުވަސްވަރު ކަމަށް ވެސް ބުނެފައިވެއެވެ. މީގެ ކުރިން ވެސް ގެއެއްގެ ތެރޭގައި ރައްކާ ކޮށްފައި ހުރި މޭވާތަކެއް ކާން ވެގެން ގެއެއް ފަޅާލާފައި އެތެއް ވަތް ކަަމަށް ރިޕޯޓްތައް ބުނެއެވެ.

ފާއިތުވި އަހަރުތަކުގައި މިފަދަ ހާދިސާތައް ހިނގާފައިވާ އިރު، އޭޝިއާގެ އެކި ހިސާބުތަކުގައި އެތް ހަމަލާ ދީގެން ވެސް ރިޕޯޓްތައް ވަނީ ކޮށްފައެވެ. ސަބަބެއްގެ ގޮތުގައި ތަޖްރިބާ ކާރުން ބުނަކީ އިންސާނުން އެސޮރުމެން ދިރިއުޅޭ މާހައުލު ހަލާކު ކުރުމާއި، އެ ސޮރުމެންގެ މާހައުލާއި މާ ކައިރީގައި ދިރިއުޅެމުން ދިއުން ހިމެނެއެވެ.