ކުޑަ ކުއްޖަކު ރަހީނުކޮށް މަރާލާފައިވާ މައްސަލައާ ގުޅިގެން މިކުޑަ މުޖުތަމައުގައި އެފަދަ ޖަރީމާތައް ޖެހިލުމެއްނެތި ހިންގަން މެދުވެރިވާ ސަބަބުތައް ދެނެގަތުމަށްދިވެހިރައްޔިތުންގެ ޑިމޮކްރެޓިކްޕާޓީ (އެމްޑީޕީ)ން ގޮވާލައިފިއެވެ.
13 އަހަރުގެ މިކުއްޖާގެ މަރާ ގުޅިގެން އެމްޑީޕީން ކަންބޮޑުވުންފާޅުކޮށް ނެރުނު ބަޔާނުގައި ބުނީ ރަހީނުކުރުމަށްފަހު އަނިޔާކޮށް އެ ނާޒުކު އުމުރު ފުރައިގެ ކުއްޖަކު މަރާލުމަކީ އެޖަރީމާ ހިންގި ބައެއްގެ އަނިޔާވެރިކަން އިންތިހާ ދަރަޖައަށް ގޮސްފައިވާކަމުގެ ހެއްކެއް ކަމަށެވެ.
އެ އަމަލު އެންމެ ހަރުއަޑުން ކުށްވެރިކޮށް އެމްޑީޕީން ބުނީ، މިކުޑަ މުޖުތަމައުގައި މިފަދަ ޖަރީމާތައް ޖެހިލުމެއްނެތި ހިންގަން މެދުވެރިވާ ސަބަބުތައް އިތުރަށް ދެނެގަންނަން ޖެހޭ ކަމަށެވެ. އަދި ހަށިފުރާނައިގެ ރައްކާތެރިކަން ކަށަވަރުކުރުމަށް ވަރުގަދަ އަޒުމަކާއެކު ހަރުދަނާ ގޮތެއްގައި މުޅިދައުލަތް އެކުގައި މަސައްކަތް ކުރުން ވަރަށް މުހިންމު ކަމަށް އެމްޑީޕީން ބުނެއެވެ.
އެމްޑީޕީން ބުނީ މިކުއްޖާގެ މަރުގެ މައްސަލައިގައި އަވަސް، އަދި ފުރިހަމަ ޖިނާއީ ތަހުގީގެއް ހިންގަން ޖެހޭ ކަމަށެވެ. މުޖުރިމުންނަށް ހައްގު އަދަބު ލިބިދިނުން ކަށަވަރުކުރުމުގައި ފަރުވާކުޑަކުރުމެއްނެތި އަމަލުކުރުމަށް ދައުލަތުގެ ކަމާބެހޭ މުއައްސަަސާތަކަށް އެމްޑީޕީން ވަނީ ގޮވާލާފައެވެ.
