ޕޯޗުގަލް ބަލިކޮށް ޖަރުމަނުން އުއްމީދު އާކޮށްފި

ޔޫރޯ 2020 ގެ މަރުގެ ގްރޫޕް ކަމަށްވާ ގްރޫޕް އެފް ގެ އެންމެ ފަހުގެ ޗެމްޕިއަން ޕޯޗުގަލް ބަލިކޮށް ޖަރުމަނުން އުއްމީދު އާކޮށްފިއެވެ.

އެލިއާންޒް އެރީނާގައި ކުޅުނު މެޗުން ޖަރުމަން މޮޅުވީ 4-2 ގެ ނަތީޖާއަކުންނެވެ.

މި މެޗު ފަށައިގެން ފަސްވަނަ މިނެޓުގައި ޖަރުމަނުން ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށްފަހު ރެފުރީ ވަނީ އެއީ އޮފްސައިޑް ލަނޑެއް ކަމަށް ނިންމާފައެވެ. އޭގެ ފަހުން މެޗުގެ 15 ވަނަ މިނެޓުގައި ޕޯޗުގަލުގެ ތަރި ކްރިސްޓިއާނޯ ރޮނާލްޑޯ ވަނީ ލަނޑު ޖަހައި ޕޯޗުގަލަށް ލީޑު ނަގައިދީފައެވެ. މިއީ ޖަރުމަން ކޮޅަށް ރޮނާލްޑޯ ކާމިޔާބުކުރި ފުރަތަމަ ލަނޑެވެ.

އެކަމަކު މެޗުގެ 35 ވަނަ ޖަރުމަނުން ވަނީ ލަނޑު ޖަހައި ނަތީޖާ އެއްވަރުކޮށްފައެވެ. މިއީ ޕޯޗުގަލުގެ ރުބިން ޑިއާސް އަތުން ބައިކޮޅަށް ވަން ލަނޑެކެވެ. އަދި އޭގެ ހަތަރު މިނެޓު ފަހުން ޕޯޗުގަލުގެ ރަފައެލް ގުއެރެއިރޯ އަތުން ބައިކޮޅަށް ވަން ލަނޑާއެކު ޖަރުމަނުން ވަނީ ލީޑު ފުޅާކޮށްފައެވެ.

މި މެޗުގެ ދެވަނަ ހާފުގައިވެސް ޖަރުމަނުން މޮޅު ކުޅުމެއް ދެއްކިއިރު، މި ހާފު ފަށައިގެން ހަވަނަ މިނެޓުގައި ކައި ހާވަޓްޒް ވަނީ ޖަރުމަނުގެ ތިންވަނަ ލަނޑު ޖަހާފައެވެ. އަދި އޭގެ ނުވަ މިނެޓު ފަހުން ޖޯނަސް ހޮފްމަން ވަނީ ޖަރުމަނަށް އިތުރު ލަނޑެއް ކާމިޔާބުކޮށްދީފައެވެ. އެކަމަކު މެޗުގެ 67 ވަނަ މިނެޓުގައި ރޮނާލްޑޯގެ އެހީތެރިކަމާއެކު ޑިއޯގޯ ޖޮޓާ ވަނީ ޕޯޗުގަލަށް ލަނޑެއް ކާމިޔާބުކޮށްދީ ފަރަގު ކުޑަކޮށްފައެވެ.

މިނަތީޖާއާއެކު ގްރޫޕް އެފް ގެ ފޯރިގަދަވެފައި ވާއިރު، ޖަރުމަން އަދި ޕޯޗުގަލަށް ވަނީ ތިން ޕޮއިންޓް ލިބިފައެވެ. އަދި އެއްވަނައިގައި އޮތް ފްރާންސްއަށް ވަނީ ހަތަރު ޕޮއިންޓް ލިބިފައެވެ. މީގެ އިތުރުން ފުލުގައި އޮތް ހަންގޭރީއަށް ވަނީ ޕޮއިންޓެއް ލިބިފައެވެ.