ޗައިނާއާ ވާދައަށް އެމެރިކާއިން ނެރޭ ޕްލޭން ދިރާސާކުރާނަން - އިންޑިއާ

ޖީ7 ސަމިޓުގައި ޗައިނާއާ ވާދައަށް އެމެރިކާއިން ނެރޭ "ބިލްޑް ބެކް ބެޓާ" ޕްލޭން ދިރާސާ ކުރާނެ ކަމަށް އިންޑިއާއިން ބުނެފިއެވެ.

އެމެރިކާއިން ޖީ7 ސަމިޓުގައި ހުށަހަޅާފައިވާ "ބިލްޑް ބެކް ބެޓާ" ޕްލޭންގައި ވާގޮތުން ކޮވިޑް-19 ގެ ސަބަބުން އިގްތިސާދީ ގޮތުން ގެއްލުންވި ތަރައްގީވަމުން އަންނަ ގައުމުތަކުގެ އިގްތިސާދު އަލުން ނަގާ ކޮޅަށް ޖެހުމަށް 40 ޓްރިލިއަން ޑޮލަރު ހޭދަކުރުމަށް ވަނީ ހުށަހަޅާފައެވެ.

އިންޑިއާއިން ވަނީ އެމެރިކާގެ ޕްލޭން ދިރާސާ ކުރާނެ ކަމަށް ބުނެފައެވެ. އިންޑިއާގެ މިނިސްޓްރީ އޮފް އެސްޓާނަލް އެފެއާޒްއިން ބުނީ ބިލްޑް ބެކް ބެޓާ ޕްލޭންގައި ބައިވެރިވުމަށް އިންޑިއާއިން އެ ޕްލޭން އިތުރަށް ދިރާސާކުރާނެ ކަމަށާއި، އެކަން މިހާރު ކުރިޔަށްދާ ކަމަށެވެ. އަދި އެ ޕްލޭންގައި ބައިވެރިވުމާއި ނުވުން ނިންމާނީ ޕްލޭން ދިރާސާ ކުރުމަށް ފަހު ކަމަށެވެ.

އެމެރިކާއިން ބިލްޑް ބެކް ބެޓާ ޕްލޭންއެއް ހުށަހަޅާފައިވާއިރު ޗައިނާއިން ވެސް ވަނީ ޖީ7 ސަމިޓުގައި "ބެލްޓް އެންޑް ރޯޑް އިނީޝިއޭޓިވް" ޕްލޭނެއް ހުށަހަޅާފައެވެ. މި ޕްލޭންގައި ބައިވެރިވުމަށް އިންޑިއާއިން ދެކޮޅު ހަދާފައިވާއިރު، އަވަށްޓެރި ޕާކިސްތާނާއި، ނޭޕާލް އަދި ސްރީ ލަންކާއިން ވަނީ މި ޕްލޭންގައި ބައިވެރިވުމަށް ނިންމާފައެވެ.