"ޓޫރިޒަމް ޑައިވަރސިފިކޭޝަން އެންޑް ލޯކަލައިޒޭޝަން" ޕްރޮޖެކްޓްގެ ދަށުން ރަށު ފަތުރުވެރިކަން ތަރައްގީކުރުމަށް ކުރެވެމުންދާ މަސަތްކަތުގެ ދަށުން ކޮންމެ އަތޮޅެއްގެ އަތޮޅު ކައުންސިލް އިދާރާގައި ޓޫރިސްޓް ޑެސްކެއް ގާއިމު ކުރުމަކީ އަމާޒެއް ކަމަށް ޓޫރިޒަމް މިނިސްޓްރީން ބުނެފިއެވެ.

ރާއްޖެޓީވީގެ "ވިޔަފާރި މިއަދު" ޕްރޮގްރާމްގައި ޓޫރިޒަމް ޑައިވަރސިފިކޭޝަން އެންޑް ލޯކަލައިޒޭޝަން ޕްރޮޖެކްޓްއާ ގުޅޭގޮތުން ވާހަކަދައްކަވަމުން މިނިސްޓްރީގެ ސީނިއަރ އެގްޒެކިއުޓިވް ޑިރެކްޓަރ އަލީ ރައްޒާން ވަނީ މިނިސްޓްރީން ކައުންސިލްތަކާ އެކު މިހާރު ކުރިއަށް ގެންދާ މަޝްވަރާބައްދަލުވުންތަކުގައި އެންމެ ބޮޑު އިސްކަމެއް ދެނީ ރަށްރަށުގެ ލޭންޑްޔޫސް ޕްލޭން އެކުލަވާލާ އިރު، ބޭނުންވާ ޓެކްނިކަލް އެސިސްޓެންޓް އެންމެ ފުރިހަމަ ގޮތުގައި ފޯރުކޮށްދިނުމަށް ކަމަށް ވިދާޅުވެފައެވެ. އެގޮތުން މި ތިން މަސް ދުވަހު މިނިސްޓްރީގެ ސްޓާފުން މިކަމަށް ހާއްސަ އިސްކަމެއް ދީގެން މަސައްކަތް ކުރާނެ ކަމަށް ރައްޒާން ވަނީ ވިދާޅުވެފައެވެ.

އޭގެ ފަހުން މިނިސްޓްރީގެ ޕްލޭނަކީ ކޮންމެ އަތޮޅެއްގެ އަތޮޅު ކައުންސިލް އިދާރާގައި ޓޫރިސްޓް ޑެސްކެއް ގާއިމުކުރުން ކަމަށާއި އަދި ކޮންމެ ރަށެއްގެ ރަށުކައުންސިލް އިދާރާ އަކީ އެރަށެއްގެ ފްރަންޓް އޮފީސްގެ ގޮތުގައި މަސައްކަތްކުރާނެ އިދާރާކަމުގައި ހެދުން ކަމަށް ރައްޒާން ވިދާޅުވިއެވެ. އޭގެ އިތުރުން ރަށު ކައުންސިލްތަކުގައި ޓޫރިސްޓް ޑެސްކް ތަރައްގީކޮށް، އާންމުކޮށް ރަށަށް ޒިޔާރަތްކުރާ ފަތުރުވެރިން ޒިޔާރަތްކުރާ ތަންތަން ކަމަށްވާ ފެރީ ޓަރމިނަލް އާއި އެއަރޕޯޓް ތަކުގައި ވެސް ޓޫރިސްޓް ޑެސްކްތައް ގާއިމުކުރެވިގެންދާނެ ކަމަށް ރައްޒާން ވިދާޅުވިއެވެ.

ރައްޒާން ވިދާޅުވީ މިޑެސްކްތަކުން ފޯރުކޮށްދޭނެ މައުލޫމާތުތައް އެއްކުރެވޭނެ ކަމަށާއި އޭގެ ތެރޭގައި އަތޮޅުގެ ރަށްރަށުގައި ހުންނަ ސެލިންގް ޕޮއިންޓްސްތަކުގެ މައުލޫމާތާއި ގަދީމީ ތަންތަނާއި އަސާރީ ތަންތަނުގެ އިތުރުން ރަށްރަށުގެ ސަގާފަތާއި އާދަކާދަ ދައްކައިދޭ ތަންތަނުގެ މައުލޫމާތުތައް ހިމެނޭނެ ކަމަށެވެ. އެގޮތުން މި މައުލޫމާތުތައް އެއްތަނަކުން ފެންނާނެ ޕްލެޓްފޯމެއް ގާއިމުކުރެވިފައިވާ ކަމަށާއި ޔޫއެންޑީޕީއާ ގުޅިގެން މި ޕްލެޓްފޯމް އިތުރަށް ތަރައްގީކުރުމުގެ މަސައްކަތްކުރަމުންދާ ކަމަށް ރައްޒާން ވިދާޅުވިއެވެ. ރައްޒާން ވަނީ މި ޕްލެޓްފޯމަކީ ރަށު ފަތުރުވެރިކަން މާކެޓްކުރުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް (އެމްއެމްޕީއާރްސީ) އަށް ބޭނުންކުރެވޭނެ ޕްލެޓްފޯމެއް ކަމަށާއި އަމިއްލަ ފަރާތްތަކުގެ މާކެޓިންނަށް ވެސް މި ޕްލެޓްފޯމް ބޭނުންކުރެވޭނެ ކަމަށް ވިދާޅުވެފައެވެ.

މި ޕްރޮޖެކްޓުގެ ދަށުން ކައުންސިލްތަކާ ގުޅިގެން އެކިއެކި ޓްރެއިންގ ޕްރޮގްރާމްތައް ހިންގާނެ ކަމަށާއި ފަތުރުވެރިވެރިކަމުގެ ދާއިރާއަށް ނުކުންނަށް ބޭނުންވާ ފަރާތްތަކަށް ތަމްރީން ޕްރޮގްރާމްތައް ކުރިއަށްގެންދާނެ ކަމަށް ވިދާޅުވިއެވެ.

ރާއްޖޭގެ ފަތުރުވެރިކަން ސިންދަފާތުކޮށް ރަށްރަށުގެ ކައުންސިލްތަކާއި އަތޮޅު ކައުންސިލްތަކާއި ސިޓީ ކައުންސިލްތަކާ ގުޅިގެން ފަތުރުވެރިކަން ކުރިއަރުވައި ސަރުކާރުގެ ސްޓްރެޓެޖިކް އެކްޝަން ޕްލޭންގެ ދަށުން ހާސިލްކުރަން ބޭނުންވާ ފަތުރުވެރިކަމުގެ ސިޔާސަތުތަކުގެ ތެރެއިން ހަތަރު ސިޔާސަތެއް ހާސިލުކުރުމަށް ޓޫރިޒަމް މިނިސްޓްރީން ވަނީ ޓޫރިޒަމް ޑައިވަރސިފިކޭޝަން އެންޑް ލޯކަލައިޒޭޝަން ޕްރޮޖެކްޓްގެ ދަށުން މިހާތަނަށް 8 އަތޮޅެއްގެ އަތޮޅު ކައުންސިލަރުންނާއި ރަށު ކައުންސިލަރުން އަދި ސިޓީ ކައުންސިލަރުންނާ އެކު މަޝްވަރާބައްދަލުވުންތައް ބާއްވާފައެވެ.