އައްޑޫސިޓީން ޖުމްލަ 324 މީހުން ކޮވިޑަށް ޕޮޒިޓިވްވެފައިވާ ކަމަށް އައްޑޫ އިމަރޖެންސީ ސެންޓަރުން ހާމަކޮށްފިއެވެ.

އެ ސެންޓަރުން އާންމު ކުރި އެންމެ ފަހުގެ ތަފާސް ހިސާބުތަކަށް ބަލާއިރު ޖުމްލަ 6803 ސާމްޕަލެއް ނަގާފައިވާއިރު، އޭގެ ތެރެއިން 324 މީހަކު މިހާތަނަށް ޕޮޒިޓިވްވެފައިވެއެވެ.

ތަފާސް ހިސާބުތައް ދައްކާ ގޮތުން މިހާރު ހިތަދޫއިން 38 މީހުން، މަރަދޫ-ފޭދޫއިން އެކަކު، ފޭދޫއިން އެކަކު، ހުޅުދޫއިން 7 މީހުން, އަދި މަރަދޫއިން 3 މީހަކު ޕޮޒިޓިވްވެފައިވެއެވެ.

50 އެކްޓިވް ކޭސް ހިމެނޭއިރު 272 މީހަކު ވަނީ ބަލިން ރަނގަޅުވެފައެވެ. އައްޑޫ ސިޓީން މިބަލީގައި ދެމީހަކު ނިޔާވެފައިވެއެވެ. އަދި މިހާރު ހޮސްޕިޓަލުގައި ތިން މީހަކަށް ދަނީ ފަރުވާދެމުންނެވެ.

އައްޑޫ ސިޓީ ދެވަނަ ފަހަރަށް މޮނިޓަރިންގެ ހާލަތަށް ގެނައީ 1 މެއި ވީ ހޮނިހިރު ދުވަހުގެ ވަގުތެއްގައެވެ. އޭގެފަހުން ކޮންމެ ދުވަހަކު ވެސް އެސިޓީން ޕޮޒިޓިވް ކޭސްތައް ރިޕޯޓު ކުރެވެއެވެ.

އައްޑޫގައި ކޮވިޑްގެ ހާލަތު ރަނގަޅު ނޫން ކަމަށާއި، ކޮންޓްރޯލް ކުރުމަށް އާއްމު ރައްޔިތުންގެ އެއްބާރުލުން ބޭނުންވާ ކަމަށް އައްޑޫ ސިޓީ ކައުންސިލުން ބުނެއެވެ.

ކޮވިޑް ކޮންޓްރޯލް ކުރުމުގެ ގޮތުން އެ ސިޓީގައި ވަނީ ގިނަ ފިޔަވަޅުތަކެއް އަޅާފައެވެ. އެގޮތުން ކޮންމެހެން ނުކުންނަން ޖެހިގެން މެނުވީ ނުނުކުތުމަށް އިލްތިމާސްކޮށްފައި ވާއިރު، އަސާސީ ޚިދުމަތްތައް ފޯރުކޮށްދިނުމުގައި ރައްޔިތުންނަށް ލުއި ފަސޭހަވާނެ ގޮތަށް ކަންކަން އިންތިޒާމް ކުރުމުގެ މަސައްކަތް އައްޑޫ ސިޓީ ކައުންސިލުން ދަނީ ކުރަމުންނެވެ.