ތުލުސްދޫގައި ސަރފް ޝެކެއް ތަރައްގީކުރަން ހުޅުވާލައިފި
ބިޑު ހުށަހަޅަންޖެހެނީ ޖޫން 28ގެ މެންދުރުފަހު 1:00ށް
ކ. ތުލުސްދޫ
ތުލުސްދޫގައި ސަރފް ޝެކެއް ތަރައްގީކުރަން އެރަށު ކައުންސިލުން ހުޅުވާލައިފިއެވެ.
ތުލުސްދޫ ކައުންސިލުން ބުނީ އެކައުންސިލުން ދޭ ކުރެހުމާ އެއްގޮތަށް ކައުންސިލުން ދައްކާ ބިމުގައި ސާރފް ޝެކެއް އަޅަން ބޭނުންވާ ފަރާތްތަކަށް އެފުރުސަތު ހުޅުވާލާފައިވާ ކަމަށެވެ. އަދި އަމިއްލަ ތަކެތީގައި ސަރފް ޝެކް އަޅަން ޝައުގުވެރިވާ ފަރާތްތަކުން، ޖޫން 21 ވަނަ ދުވަހުގެ މެންދުރުފަހު 1:00ށް ތުލުސްދޫ ކައުންސިލްގެ އިދާރާއަށް ގޮސް މައުލޫމާތު ސާފުކުރުމަށްފަހު ޖޫން 28ގެ މެންދުރުފަހު 1:00ށް އަގު ހުށަހެޅުމަށް ވަނީ އެދިފައެވެ. އަދި ހުޅުވުން އޮންނާނީ ބިޑު ހުށަހަޅާ ދުވަހުގެ މެންދުރުފަހު 1:05ގައި ބިޑު ހުށަހަޅާ ފަރާތްތަކުގެ ހާޒިރުގައިކަމަށް ކައުންސިލުން ބުނެއެވެ.
ކައުންސިލުން ބުނީ އެ އިދާރާއިން ބާއްވާ މައުލޫމާތު ދިނުމުގެ ބައްދަލުވުމުގައާއި ބީލަން ހުށަހެޅުމުގެ ބައްދަލުވުމުގައި ބައިވެރިވެވޭނީ، ވިޔަފާރި ރަޖިސްޓްރީކުރުމުގެ ގާނޫނުގެ ދަށުން މިނިސްޓްރީ އޮފް އިކޮނޮމިކް ޑިވެލޮޕްމަންޓްގައި ރަޖިސްޓްރީ ކޮށްފައިވާ ކުންފުނިތަކަށާއި، އަމިއްލަ ފަރުދުންގެ ވިޔަފާރީގެ ގާނޫނުގެ ދަށުން ފަރުދުންގެ ވިޔަފާރި ރަޖިސްޓްރީކޮށްފައިވާ ފަރާތަކަށް ކަމަށެވެ. އެހެންކަމުން އަންދާސީ ހިސާބާއެކު ރަޖިސްޓްރޭޝަން ސެޓްފިކެޓްގެ ކޮޕީ ހުށަހަޅަން ޖެހޭނެއެވެ.
ކައުންސިލަށް ހުށަހަޅާ އަންދާސީ ހިސާބު ހުށަހަޅަންވާނީ ބަންދުކޮށްފައިވާ ސިޓީ އުރައެއްގައެވެ. ސިޓީއުރައިގެ ބޭރުގައި، އިއުލާނު ނަންބަރު އަދި "ތުލުސްދޫ ސާރފް ޝެކް ތަރައްޤީކުރުން" މިހެން ލިޔެފައި އޮންނަންޖެހެއެވެ. މަޢުލޫމާތު ދިނުމުގެ ބައްދަލުވުމަށާއި އަންދާސީ ހިސާބު ހުށަހެޅުމުގެ ބައްދަލުވުމަށް ބަދަލުގައި އެހެންފަރާތަކުން ދާނަމަ، އެކަން ބަޔާންކޮށް ސިޓީއެއް ހުށަހަޅަން ޖެހޭކަމަށާއި މިފަދަ ލިޔުމެއްނެތި ހުށަހެޅޭ އަންދާސީ ހިސާބުތައް ބަލައި ނުގަނެވޭނެ ކަމަށް ކައުންސިލުން ބުނެއެވެ.
ރަށު ފަތުރުވެރިކަން ތަރައްގީކުރުމުގެ މަސައްކަތް ސަރުކާރުން ކުރަމުން އަންނަ އިރު، ތުލުސްދޫ އަކީ ދުނިޔޭގެ ފެންވަރުގައި ފާހަގަކޮށްލެވޭ ސަރފިންގ ޕޮއިންޓެކެވެ. ތުލުސްދޫ ވަނީ ފަތުރުވެރިންގެ މެދުގައި ބޮޑު މަގުބޫލުކަމެއް ހޯދާފައެވެ.
