މި މަހުގެ 15ވަނަ ދުވަހުގެ ނިޔަލަށް މީރާގެ ކައުންޓަރުތަކުން ޚިދުމަތެއް ނުދޭނެ
ރަސްމީ ގަޑީގައި އޮތޯރިޓީގެ ހޮޓްލައިން އަދި ވައިބަރ މެދުވެރިކޮށް މައުލޫމާތު ފޯރުކޮށްދެވޭނެ
ނިއު ނޯމަލްގައި މީރާއިން މަސައްކަތް ކުރަމުންދާ ގޮތް
މި ހިނގާ ޖޫން މަހުގެ 15ވަނަ ދުވަހުގެ ނިޔަލަށް މޯލްޑިވްސް އިންލޭންޑް ރެވެނިއު އޮތޯރިޓީ (މީރާ)ގެ ކައުންޓަރުތަކުން ޚިދުމަތް ނުދޭނެކަމަށް އެ އިދާރާއިން ބުނެފިއެވެ.
މީރާއިން އާންމުކޮށްފައިވާ އިއުލާނެއްގައި ވަނީ ކޮވިޑް-19 ފެތުރުން ހުއްޓުވުމަށް ސަރުކާރުން އެޅި ފިޔަވަޅުތަކުގެ ތެރޭގައި މި މަހުގެ 15ގެ ނިޔަލަށް މާލެ ސަރަޙައްދުގެ އޮފީސްތައް ހުޅުވައިގެން މަސައްކަތް ނުކުރާ ގޮތަށް ހަމަޖައްސާފައިވާތީ، އެ މުއްދަތުގައި އެ އޮތޯރިޓީގެ ކައުންޓަރުތަކުން ޚިދުމަތް ނުދޭނެ ކަމަށެވެ.
ނަމަވެސް އެ އޮތޯރިޓީއަށް ދައްކަންޖެހޭ ޓެކުހާއި ފީތައް، އޮތޯރިޓީގެ އޮންލައިން ޚިދުމަތް މީރާކަނެކްޓް އަދި ވާރުގެ މެދުވެރިކޮށް ދެއްކޭނެ ކަމަށާއި، މީރާއިން ފޯރުކޮށްދޭ އެހެނިހެން ޚިދުމަތްތައް ވެސް އޮންލައިންކޮށް ހޯދޭނެ އިންތިޒާމުތައް ހަމަޖެހިފައިވާނެ ކަމަށް މީރާއިން ބުނެއެވެ. އެހެންކަމުން ހުރިހާ ޚިދުމަތްތަކެއް ވެސް އޮންލައިންކޮށް ހޯދުމަށް މީރާއިން އިލްތިމާސްކުރެއެވެ.
މީރާއިން ބުނީ މި މުއްދަތުގައި އެ އޮތޯރިޓީއާ ގުޅަން ބޭނުންވާ ފަރާތްތަކަށް، ރަސްމީ ގަޑީގައި އޮތޯރިޓީގެ ހޮޓްލައިން 1415 ގެ ޚިދުމަތް ލިބޭނެ ކަމަށެވެ. އަދި ރަސްމީ ގަޑީގައި، ވައިބަރ ނަންބަރު 9821415 އަށް މެސެޖް ކުރައްވައިގެން ވެސް މައުލޫމާތު ލިބޭނެ ކަމަށް މީރާއިން ބުނެއެވެ.
މީރާއިން ކައުންޓަރުތަކުން ޚިދުމަތް ނުދޭން ނިންމާފައިވާއިރު، ޓެކުހާއި އަދި އެހެނިހެން ފީތައް ދައްކަން ޖެހޭ މުއްދަތު ވެސް ވަނީ ފަސްކޮށްފައެވެ.
މީރާގެ އޮފީސްތަކުގެ ޚިދުމަތް ވަގުތީ ގޮތުން މެދުކަނޑާލާފައިވާއިރު މީރާގެ ހޮޓްލައިން ނަންބަރަށް ސަރުކާރު ބަންދު ނޫން ކޮންމެ ދުވަހަކު ހެނދުނު 9:00ން ފެށިގެން 14:00ށް ގުޅޭނެކަމަށް މައުލޫމާތު ލިބެއެވެ.
އޭޕްރިލް މަހު މީރާ އިން ވަނީ 1.41 ބިލިއަން ރުފިޔާގެ އަމްދަނީއެއް ބަލައިގެންފައެވެ. އޭޕްރީލްމަހު މީރާއަށް ބަލައިގެން ފައިސާއަކީ ވޭތުވެދިޔަ އަހަރުގެ މި މުއްދަތުގައި ލިބުނު އާމްދަނީއަށްވުރެ 173.8 އިންސައްތަ އިތުރު އަދަދެކެވެ. އަދި އެއީ އޭޕްރީލް މަހު ލިބޭނޭ ކަމަށް މީރާއިން އަންދާޒާކުރި އަދަދަށްވުރެ 82.6 އިންސައްތަ އިތުރު އަދަދެކެވެ
