މާލެ ސަރަހައްދުގައި އަޅާފައިވާ ފިޔަވަޅުތައް އިތުރު ހަފްތާއަކަށް އިތުރުކޮށްފި

ކޮވިޑް-19އާ ގުޅިގެން މާލެ ސަރަހައްދުގައި އަޅާފައިވާ ރައްކާތެރިކަމުގެ ފިޔަވަޅުތައް އިތުރު އެއް ހަފްތާއަށް ދިގު ދަންމަން ނިންމާފައިވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

އަންގާރަ ދުވަހު ރައީސް ބޭއްވެވި ނޫސްވެރިންގެ ބައްދަލުވުމުގައި ވިދާޅުވީ ރާއްޖެއިން ކޮވިޑް-19 ކޭސްތަކުގެ އަދަދުތައް އިތުރުވުމާ ގުޅުގެން އަޅާފައިވާ ފިޔަވަޅުތަކުގެ ޑެޑްލައިންއާ ގާތްވެފައިވާއިރު އެ ފިޔަވަޅުތަކަށް ލުއި ދެވެން އަދި ނެތް ކަމަށެވެ. އެގޮތުން ކޭސްތައް މިހާރު ހުރި ގޮތަށް ބަލާފައި ޓެގް ޓީމުގެ ނިންމުމަކީ އަދި އެ ފިޔަވަޅުތައް ދިގު ދެންމުން ކަމަށާއި، އެގޮތުގެ މަތިން ފިޔަވަޅުތައް އިތުރު އެއް ހަފްތާއަށް ދަންމަން ނިންމާފައިވާ ކަމަށެވެ. ރައީސް ވިދާޅުވީ އަނެއްކާ ވެސް ހަފްތާއެއް ފަހުން ބެލުމަށް ފަހު ކޭސްތަކުގެ އަދަދު ހުރިގޮތަށް ރިއާޔަތްކޮށް ފިޔަވަޅުތަކާ މެދު ގޮތް ނިންމަވާނެ ކަމަށެވެ. އަދި އޭރުން ވެސް ފިޔަވަޅު އިތުރަށް ދިގުދަންމަން ފެންނަ ނަމަ އެގޮތަށް ކަން ކުރައްވާނެ ކަމަށް ވިދާޅުވިއެވެ.

ރައީސް ވިދާޅުވީ ކުއްލިއަކަށް ލުއިތަކެއް ދިނުމުން ވާނެ ގޮތް އޭޕްރިލްމަހުގެ ތެރޭގައި ފެނިފައިވާ ކަމަށެވެ. އެގޮތުން މިދިޔަ ޖެނުއަރީގައި ރާއްޖެއަށް ކޮވިޑްގެ ތިން ވަނަ ރަޅެއް ބިންދާލާފައިވާއިރު އޭރު އެޅި ފިޔަވަޅުތަކަށް ކުއްލި ބޮޑު ލުއިތަކެއް ދިނީ އޭޕްރިލް މަހުގައެވެ. ރައީސް ވިދާޅުވީ އެފަހަރު ވީ ގޮތަށް ބެއްލެވުމަށް ފަހު މިފަހަރުގެ އަމާޒަކީ އެހެން ވިޔަ ނުދީ މަޑުމަޑުން ލުއިތައް ދެމުން ދިއުން ކަމަށެވެ. އަދި އެކަމުގައި ރަނގަޅު އުސޫލެއް ކަނޑައެޅުމުގެ މަސައްކަތް ކުރިއަށްދާ ކަމަށާއި އަވަސް މުސްތަގުބަލެއްގައި އާންމުކުރައްވާނެ ކަމަށް ވިދާޅުވިއެވެ.

ރައީސް ވިދާޅުވީ މީގެ ކުރިން ކުއްލިއަކަށް ލުއިތައް ދިނުމުން ކޭސްތައް އިތުރުވެ އަނެއްކާ ވެސް ފިޔަވަޅުތައް ވަރުގަދަ ކުރަން ޖެހިފައިވާ ކަމަށާއި، އެހެންކަމުން އިތުރު ހަފްތާއަކަށް ބެލުމަށްފަހު އަންނަ ހަފްތާގައި ލުއިތައް ދިނުމާއި ގުޅޭގޮތުން މަޝްވަރާ ކުރާނެ ކަމަށެވެ. އަދި އެއަށްފަހު ހާލަތަށް ބެލުމަށްފަހު ޓެގް ޓީމުގެ ލަފާގެ މަތިން ލުއިތައް ދިނުމާއިމެދު ގޮތެއް ނިންމާނެ ކަމަށެވެ. އަދި ކޭސްތައް ރިވިއުކުރުމަށްފަހު ލުއި ނުދެވޭނަމަ އިތުރު އެއް ހަފްތާއަށް ފިޔަވަޅުތައް ދިގުދައްމާލާނެ ކަމަށެވެ.

މެއި މަހުގެ ކުރީކޮޅުން ފެށިގެން މާލެ ސަރަހައްދާއި މުޅި ރާއްޖޭގެ ކޭސްތައް ވެސް އިތުރުވެފައިވާއިރު މެއި މަހުގެ ފަހު ހަފްތާއާ ޖެހެންދެން ވެސް 1،000ން މަތިން ކޮންމެ ދުވަހަކު ވެސް ކޭސްތައް ރިޕޯޓުކުރިއެވެ. އޭގެ ސަބަބުން މާލެ ސަރަހައްދުގެ ރައްކާތެރިކަމުގެ ފިޔަވަޅުތައް ވަރުގަދަ ކުރީ މެއި މަހުގެ 26 ވަނަ ދުވަހުއެވެ.

އެޗްޕީއޭއިން މިހާރު އަޅާފައިވާ ފިޔަވަޅުތަކަށް ބަލާއިރު، ސަރުކާރު އޮފީސްތައް ބަންދުކުރުމާއި، ސްކޫލްތައް ބަންދުކުރުމާއި، ޕާކު ތަކާއި މައިޒާންތައް އަދި ކުޅިވަރު ކުޅޭ ތަންތަން ބަންދުކުރުމުގެ އިތުރަށް ޖިމްތަކާއި ސެލޫންތައް ވެސް ވަނީ ބަންދުކޮށްފައެވެ. އަދި ކެފޭ ރެސްޓޯރަންޓުތަކުން ވެސް ޑައިންއިން ޚިދުމަތް ދިނުން ވަނީ މަނާކޮށްފައެވެ.

މީގެ އިތުރަށް ހަވީރު ހަތަރަކުން ފެށިގެން އަނެއް ދުވަހުގެ ހެނދުނު އަށަކާ ހަމައަށް ކާފިއު އިއުލާންކޮށްފައިވާއިރު، ކާފިއު ނޫން ގަޑިތަކުގައި ވެސް ބޭރުގައި އުޅެވެނީ ފުލުހުން ދޫކުރާ ވަކި ހުއްދައަކާއި، ވަޒީފާގެ ގޮތުންނާއި މަސައްކަތުގެ ގޮތުން ލިބޭ ވަކި ހާއްސަ ހުއްދައެއްގެ ދަށުންނެވެ. އެގޮތުން ކާފިއު ނޫން ގަޑިތަކުގައި ވެސް ބޭރުގައި އުޅުމުގެ ހުއްދަ އޮންނަނީ ކޮންމެ ގޭބީސީއަކުން ދެމީހަކަށެވެ. އެއީ ވެސް މީހަކަށް ހަތަރު ގަޑި އިރުގެ އުސޫލުން ދެމީހުން ވެސް ދެ ދަންފަޅިއަކަށް ބަހައިގެންނެވެ. އެ ހުއްދައިގަ ވެސް ޒަރޫރީ ބޭނުންތަކަށް ނޫނީ ނުނިކުތުމަށް ވަނީ އިލްތިމާސްކޮށްފައެވެ.