ޒިންމާ އަދާ ކުރެވޭނެ ކަމުގެ ފުރިހަމަ ޔަގީންކަން އެބައޮތް - ޝާހިދު

އދ. ގެ އާންމު މަޖިލީހުގެ ރިޔާސަތުގައި ހުންނަވައިގެ އުފުއްލަވަން ޖެހޭ ޒިންމާ ފުރިހަމައަށް އަދާ ކުރެއްވޭނެ ކަމުގެ ޔަގީންކަން އެބައޮތް ކަމަށް ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.

އިންތިޚާބަށްފަހު ރާއްޖޭގޭ މީޑިއާއަކަށް ދެއްވި ފުރަތަމަ ބަސްދީގަތުން "ރާއްޖެ ޓީވީ"އަށް ދެއްވަމުން މިނިސްޓަރ ވިދާޅުވީ، އެމަނިކުފާނު ހަވާލުވެވަޑައިގަތީ ބޮޑު ޒިންމާއަކާ ކަމަށާއި، 193 ގައުމުގެ އުންމީދުތަކާއެކު މަސައްކަތް ކުރައްވާނެ ކަމަށެވެ. އެ ޒިންމާ އަދާ ކުރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށާއި، އަދި ރާއްޖޭގެ ނަމަށް އެއްވެސް ކިލަނބުކަމެއް ނާންނާނެފަދަ ފުރިހަމަ ގޮތަކަށް ޒިންމާ އަދާ ކުރައްވާނެ ކަމަށެވެ.

Advertisement

އެމަނިކުފާނު ހުށަހެޅުއްވީ އުންމީދުގެ 5 ދޯދި ކަމަށާއި، އެ އުންމީދުތައް 143 ގައުމުން ބަލައިގެންފި ކަމަށެވެ. އެ ކަންކަމާއެކު ކާމިޔާބު ދައުރެއް ނިންމާލެވޭނެ ކަމަށް އުންމީދު ކުރައްވާ ކަމަށާއި، އާންމު މަޖިލީހުގެ މަސައްކަތްތައް ހަރުދަނާ ކުރެއްވުމަށް މަސައްކަތް ކުރައްވާނެ ކަމަށް ވިދާޅުވިއެވެ.

143 ގައުމުން އެމަނިކުފާނު ހުށަހެޅުއްވި އުންމީދުގެ ދޯދިތައް ބަލައިގަތުމުން ދޭހަަވަނީ، ދުނިޔެއަށް ބޭނުންވަނީ އުންމީދެއް ކަމަށާއި، ހުރިހާ ގައުމަކުންވެސް އެމަނިކުފާނަށް ކަންކަމުގައި އެއްބާރުލުން ދެއްވާނެ ކަމުގެ ޔަގީންކަން ދީފައިވާ ކަމަށް ވިދާޅުވިއެވެ.

އެމަނިކުފާނު އިތުރަށް ވިދާޅުވީ، ރާއްޖެއިން މިއޮތީ ދުނިޔޭގެ ހުރިހާ ގަައުމެއްގެ ރިޔާސަތާ ހަވާލުވެފައި ކަމަށާއި، މިއި މި ޖީލަށާއި، ދިވެހިންނަށް ފަޚުރުވެރި ކާމިޔާބީއެއް ކަމަށެވެ. އަދި ރާއްޖޭގެ މިނިވަންކަމާ ސިޔާދަތު އެއްވެސް ގައުމަކަށް ބަދަލު ނުކުރެވޭނެ ކަމަށެވެ.

ހޯމަ ދުވަހު، އދ އާންމު މަޖިލީހުގެ 76 ވަނަ ރައީސަކު ހޮވުމަށް ބޭއްވި އިންތިޚާބު ފޮރިން މިނިސްޓަރ ކާމިޔާބު ކުރެއްވީ، ވޯޓުގައި ބައިވެރިވި 191 މެމްބަރު ގައުމުގެ ތެރެއިން 143 މެމްބަރު ގައުމުގެ ވޯޓުންނެވެ.

މި މަގާމާ ރަސްމީކޮށް އެމަނިކުފާނު ހަވާލުވެ ވަޑައިގަންނަވާނީ ސެޕްޓެމްބަރ 14ގައެެވެ.